Presidentja Osmani: Kosova ka përmbushur kushtet për statusin e vendit kandidat për në BE

Kosova ka përmbushur të gjitha kushtet për ta fituar statusin e vendit kandidat të BE-së, tha sot Presidentja Vjosa Osmani në takim me Shefin e ri të Zyrës së BE-së në Kosovë, Aivo Orav, të cilit duke i uruar mirëseardhje dhe sukses e siguroi përkushtimin dhe angazhimin e vazhdueshëm të Republikës së Kosovës drejt anëtarësimit në Bashkimin Evropian.

“Kosova vazhdon të jetë në ballë të reformave në të gjitha fushat, duke harmonizuar legjislacionin e saj me atë të BE-së, si dhe duke qenë plotësisht e bashkërenduar me politikën e përbashkët të jashtme dhe të sigurisë së BE-së,” tha Presidentja e Kosovës në takim me Shefin e ri të Zyrës së BE-së në Prishtinë duke vlerësuar:

“Kosova ka mbushur të gjitha kushtet për ta fituar statusin e vendit kandidat të BE-së.”

Në takim u diskutua edhe për zhvillimet e fundit në vend, duke përfshirë sigurinë, si dhe bashkëpunimin e institucioneve të Kosovës dhe atyre të Bashkimit Evropian me qëllim të përmbushjes së objektivave të përbashkëta.

Në këtë frymë, Presidentja e Kosovës, Vjosa Osmani, ka përsëritur rëndësinë e madhe të trajtimit të shteteve aspiruese bazuar në merita dhe në përqafimin e vlerave që qëndrojnë në themelet e BE-së.