Presidentja Osmani: Masakra e Dubravës, krim i tmerrshëm i regjimit kriminal serb!
Duke përkujtuar 24-vjetorin e Masakrës së Dubravës, Presidentja e Kosovës, Vjosa Osmani, tha se ky është një nga krimet me të tmerrshme të regjimit kriminal serb gjatë vitit 1999, ndërsa drejtësia për viktimat dhe të mbijetuarit do të jetë triumf i së vërtetës.
“Afër një muaj përpara se Kosova të bëhej e lirë, makineria e pushtetit gjenocidal të Serbisë, manifestoi egërsinë ndaj të burgosurve shqiptarë në Burgun e Dubravës, me ç`rast në periudhën 19-24 maj 1999, vrau brenda burgut 160 të burgosur shqiptarë dhe plagosi 300 të tjerë,” tha Presidentja e Kosovës duke folur për ata që 24 vjet më parë po mbaheshin në burg padrejtësisht si pengje të luftës, e në kundërshtim me të gjitha rregullat e të drejtës ndërkombëtare.
“Masakra e Dubravës është një nga krimet me të tmerrshme të regjimit kriminal serb gjatë vitit 1999, prandaj drejtësia për të gjitha viktimat dhe të mbijetuarit do të jetë triumf i së vërtetës.”
Në këtë përvjetor, duke kujtuar sakrificat, vuajtjet dhe mundimet e këtyre të burgosurve që kontribuuan për çështjen kombëtare, Presidentja e Kosovës, Vjosa Osmani, thekson se ata qëndruan stoikisht e nuk u thyen deri në frymën e fundit ndërsa përfundoi:
“Kujtim dhe nderim i përhershëm për ta, sikurse edhe angazhim i pareshtur për ndëshkimin e këtij krimi duke sjellë autorët para drejtësisë.”
Ndryshe, nga 19 deri më 24 maj të vitit 1999, brenda Burgut të Dubravës janë vrarë 160 të burgosur shqiptarë dhe janë plagosur më shumë se 300 të tjerë, nga regjimi i Sllobodan Millosheviçit.
