Presidentja Osmani përfaqëson Kosovën në Samitin BE-Ballkani Perëndimor në Tiranë
Presidentja e Kosovës, Vjosa Osmani, do të përfaqësojë Kosovën në Samitin BE-Ballkanit Perëndimor, që do të mbahet më 6 dhjetor në Tiranë .
Ftesën e Presidentit të Këshillit Evropian, Charles Michel, Presidentes Vjosa Osmani, ia dorëzoi Ambasadori i BE-së në Kosovë, Tomas Sznunyog.
“Në takim u vlerësua fakti që për herë të parë, ky samit do të mbahet pikërisht në Ballkanin Perëndimor, duke konfirmuar gatishmërinë e vendeve të BE-së për një angazhim më të madh drejt bashkëpunimit dhe partneritetit me vendet e rajonit,” thuhet në njoftimin e lëshuar nga Zyra e Presidentes së Kosovës pas takimit me Ambasadorin Sznunyog.
Në Deklaratën e përbashkët të Samitit BE-Ballkani Perëndimor në Tiranë e cila tashmë është dakordësuar dhe pritet vetëm miratimi formal në Samitin e Tiranës më 6 Dhjetor, të cilën PaFrikë.al e ka publikuar ditë më parë, Bashkimi Europian bënë thirrie për përshpejtimin e procesit të aderimit të vendeve të Ballkanit perëndimor dhe ofron mbështetje të plotë perspektivës së anëtarësimit në BE.
Në Deklaratë shprehet mbështetje e plotë ndërmjetësimit të Josep Borrell dhe Miroslav Lajçak, në dialogun Kosovë-Serbi dhe gjetjen e zgjidhjes për çështjet tjera rajonale.
Në Deklaratën e Samitit i cili për herë të parë më 6 dhjetor do të mbahet në njërin nga vendet e rajonit, liderët e BE mbështesin idenë e integrimit gradual të rajonit tashmë në fazën e aderimit, paralajmërojnë ndihmë financiare prej 1 miliardë euro për zbutjen e pasojave të krizës energjetike dhe theksojnë rëndësinë e partneritetit të BE me Ballkanin Perëndimor ndërsa vazhdon lufta në Ukrainë.
Deklarata e përbashkët tashmë e dakordësuar bënë thirrje në integrimin më të fortë të rajonit për një treg të përbashkët të BE dhe paralajmërojnë heqjen e roamingut në mes të BE dhe Ballkanit Perëndimor.
Njëkohësisht, BE i bën thirrje vendeve të Ballkanit Perëndimor që ti përmbahen vlerave themelore evropiane si dhe parimeve, në përputhje me të drejtën ndërkombëtare, parimeve të demokracisë dhe sundimit të ligjit, dhe të shfaqen më qartë në opinion mbi përparësitë e partneritetit me BE.
