Presidentja Osmani: Sakrifica e Pajazitit, Zejnullahut e Hoxhës – themel për Kosovën

Presidentja Vjosa Osmani e cilësoi 31 janarin si një nga ditët më me peshë për vendin, pas nderimeve që bëri te shtatorja e heroit Zahir Pajaziti në Prishtinë në 29-vjetorin e rënies heroike të tij, Hakif Zejnullahut dhe Edmond Hoxhës.

“31 janari është një prej ditëve më me peshë në historinë e Republikës së Kosovës, është një prej ditëve më frymëzuese për rritjen e Ushtrisë Çlirimtare të Kosovës dhe është po ashtu një prej ditëve më frymëzuese për gjithë popullin e Kosovës që luftoi për liri,” tha Vjosa Osmani duke theksuar se sakrifica e tre heronjve përbën themelin e shtetit të Kosovës.

“Në këtë ditë ranë Zahir Pajaziti, Hakif Zejnullahu, Edmond Hoxha, të tre heronj të Republikës së Kosovës, duke dhënë kështu kumtin e lirisë dhe duke inspiruar një popull të tërë që të luftojë për lirinë që na ishte mohuar me shekuj. Natyrisht që kjo sakrificë e tyre ka dhënë themelet e forta të Republikës së Kosovës,” tha Presidentja e Kosovës, Vjosa Osmani duke përfunduar:

“Themelet në të cilat edhe sot qëndron shteti ynë sovran, i pavarur, i cili u ndërtua me gjak, i cili u ndërtua me mund dhe me shumë sakrifica, ndër sakrificat më të rëndësishme që vërtet i dhanë peshë lirisë sonë dhe i japin dritë rrugës sonë përpara ishte edhe sakrifica e Zahir Pajazitit me shokë të cilët i kujtojmë sot.”

Kurti: Rënia e tyre i dha hov UÇK-së e vetëbesimit popullor

Ndërsa Kryeministri në detyrë, Albin Kurti, pas homazheve tha se rënia e tyre i dha hov vetëbesimit popullor dhe shtimit të radhëve të UÇK-së.

“Zahir Pajaziti kishte veprimtari të dendur si pak kush tjetër. Ai ishte një luftëtar i paepur tërë jetën dhe njëkohësisht një gueril me aksione fort të suksesshme. Bashkë me Hakif Zejnullahun dhe Edmond Hoxhën, në janarin e vitit 1997, u vranë nga pusia e forcave serbe për shkak se nuk ishte edhe e mundshme ndryshe.

Aq shumë ishin tmerruar forcat armike të Serbisë nga Zahir Pajaziti, sa që vetëm kurthi, pusia, prita, mund t’i jepte shans forcave okupatore që ta eliminonin Zahir Pajazitin. Rënia e tyre i dha një hov të jashtëzakonshëm edhe vetëbesimit popullor, por gjithashtu edhe shtimit të radhëve të Ushtrisë Çlirimtare të Kosovës,” tha Albin Kurti duke theksuar se çdo janar që përkujtohet ata është rikujtim i çmimit për liri ndërsa përfundoi:

“Në çdo janar ne i përkujtojmë ata, i kujtojmë ata në mënyrë që t’ia kujtojmë e përkujtojmë vetes sonë çmimin e lartë që kemi paguar për shtetin që kemi dhe lirinë që gëzojmë, por në të njëjtën kohë edhe për të shprehur zotimin tonë për përgjegjësitë më të larta shtetërore që kemi, se do të vazhdojmë rrugës së dëshmorëve dhe martirëve të kombit, gjaku i të cilëve është në themelet e Republikës së Kosovës.”