Presidentja Osmani: Të zhdukurit me dhunë gjatë luftës, plaga më e thellë e Kosovës
Mbi 1600 të zhdukur me dhunë gjatë luftës së fundit në Kosovë, shumë prej tyre fëmijë, ende mbesin plaga më e thellë e Kosovës, tha Presidentja e Kosovës, Vjosa Osmani, në Ditën Ndërkombëtare për Përkujtimin e Viktimave të Zhdukur me Dhunë.
“Synim i regjimit gjenocidal të Serbisë ishte shfarosja dhe shkatërrimi i identitetit tonë, i të ardhmes sonë. Duke e mohuar të vërtetën, Serbia po e përsëritë vazhdimisht krimin. Duke mbajtur arkivat e mbyllura, pavarësisht dakordimit të Brukselit që e kërkon të kundërtën, Serbia po shkel edhe marrëveshjet e arritura,” tha Presidentja e Kosovës, Vjosa Osmani në reagimin e tij përmes rrjetit social Facebook duke rikujtuar se Serbia ende fle mbi varreza masive të civilëve të pafajshëm ndërsa përfundon:
“E vërteta nuk mund të fshihet prapa propagandës se kinse Serbia qenka pro paqes dhe pro integrimit në BE. E vërteta është një dhe e vetme: në vitin 2024, Serbia ende fle mbi varreza masive të civilëve të pafajshëm.”
Ndërkohë pas homazheve te përmendorja dedikuar personave të zhdukur me dhunë gjatë luftës, Kryeministri Albin Kurti tha se Serbia nuk ka vullnet për epilogun e çështjes së të pagjeturve.
“Pjesa dërrmuese, afër 94% të të zhvarrosurve janë në muajt e parë pas rrëzimit të Milosheviçit dhe më pastaj nuk ka pasur vullnet në Serbi për gërmime të mëtutjeshme. Në Kosovë i kemi 2800 gërmime në 25 vjet liri. Ndërkaq në Serbi janë vetëm këto 5 varreza masive,” tha Albin Kurti duke kërkuar vëmendjen ndërkombëtare për ndryshimin e vendimit të mbylljes së arkivave të “Brigadës 37”, e cila njihet si një nga autorët kryesor të krimeve në Drenicë e më gjerë.
“Sivjet janë bërë 20 vjet prej kur në krye të Komisionit për personat e pagjetur në Serbi ndodhet Velko Odaloviç, i cili ka qenë njeriu kryesor i Milosheviçit gjatë luftës në Kosovë. Merreni me mend, ai që do të duhej të ishte në bankën e të pandehurve, të ketë gjykim të drejtë dhe ndëshkim të merituar, sot udhëheq komisionin për persona të zhdukur në Serbi. Sikur kjo të mos mjaftonte, në vitin 2014, pra para 10 vjetësh, arkiva e ‘Brigadës 37’ të motorizuar të ushtrisë jugosllave është klasifikuar me vendim në Serbi, kjo i bie që nuk do të hapet deri në vitin 2044. A duhet të presim ne edhe 20 vjet që të hapet kjo arkivë?”
Duke folur për punët që po kryhen nga Komisioni Qeveritar për Persona të Zhdukur në Kosovë, Kryeministri Albin Kurti tha se sikur të punohej nga institucioni i njëjtë serb, procesi do të ishte më i lehtë ndërsa përfundoi:
“Këto ditë janë duke u bërë gërmime vlerësuese në 13 lokacione në Kosovë. Ankthi i familjeve është i madh, pikëllimi i tyre i thellë, mirëpo qëndrueshmëria e tyre është e lartë dhe ne i kemi borxh që me gjithë dijeninë, mundësitë e aftësitë tona të bëjmë gjithçka që të zbardhet fati i të pagjeturve.”
