Presidentja Vjosa Osmani: 17 shkurti, e arritura jonë më e madhe historike!

Në seancën solemne të Parlamentit të Kosovës në shënim të 16-vjetorit të Pavarësisë, Presidentja Vjosa Osmani e vlerësoi 17 shkurtin si të arriturën tonë më të madhe historike.

“17 shkurti është reflektim i idealit tonë, i gjyshërve e stërgjyshërve tanë, i brezave të tërë ndër shekuj për të ndërtuar shtetin e lirë e të pavarur, në të cilin liritë e të drejtat njerëzore, paqja e harmonia janë thelbësore për suksesin tonë. Republika jonë po konsolidohet  çdo ditë, duke i nderuar qytetarët e vet dhe emrin e vet në botë,” tha Vjosa Osmani duke theksuar se për qytetarët e Kosovës të kesh shtet ka qenë gjithmonë sakrificë e ideal.

“Ky ideal i rrëmbeu zemrat, e shumë herë edhe jetët e brezave të tërë, të etërve tanë, të nënave, motrave e vëllezërve, gjyshërve dhe stërgjyshërve tanë, të cilët dhanë shumë për këtë tokë dhe e mbajtën ndezur flakadanin e lirisë deri te brezi ynë. E ne do ta shpjermë tutje sepse liria nënkupton për ne vetë karakterin e ekzistencës njerëzore.”

17 Shkurti po aq sa është datë unike për datën e saj historike, shtoi Presidentja e Kosovës, është po kaq shumë e veçantë në rrafshin emocional, duke u shquar si dita që na përbashkon rreth një kauze – dashurisë për Republikën dhe përkushtimit për ta ngritur lart emrin e saj.

“Rrugëtimi ynë i shënuar nga sfidat dhe triumfet është dëshmi e qëndrueshmërisë së shpirtit njerëzor dhe është një histori që vazhdon të zhvillohet  çdo ditë që kalon. Përkundër vështirësive shekullore, ne rezistuam dhe e mbajtën kokën me shumë krenari e vendosmëri lart, jo vetëm duke u shpërfaqur si shembull i shtetndërtimit, i rrënjosur në vlerat demokratike, por edhe duke u zotuar se çdo ditë e re do të na gjejë më mirë se dita paraprake.

Kosova sovrane është dëshmi e asaj që mund të arrihet kur vullneti i pamposhtur i qytetarëve bashkohet rreth një qëllimi të përbashkët. Prandaj, le ti gëzohemi lumturisë që sjell fakti se ne jemi popull i lirë mes popujsh të lirë”, ka shtuar e para e shtetit,” tha Presidentja e Kosovës, duke përfunduar:

“Sot i përulemi së pari brezave që iu dedikuan lirisë. Le ta bashkojmë fuqinë tonë në kujtim të etërve themelues, të grave e burrave, të bijve e bijave të kësaj toke të cilët sakrifikuan gjithçka, që nuk u dorëzuan pavarësisht se historia u soll pabesisht me ta!”

Fjalën e rastit para deputetëve dhe trupit diplomatik për nder të Ditës së Pavarësisë kanë mbajtur dhe Kryetari i Parlamentit, Glauk Konjufca, dhe, Kryeministri i Kosovës, Albin Kurti, dhe krerët e grupeve parlamentare.

Ndryshe, seanca solemne e Parlamentit të Kosovës në shënim të 16-vjetorit të Pavarësisë u zhvillua pas homzheve që krerët e shtetit, Presidentja Vjosa Osmani, Kryetari i Parlamentit Glauk Konjufca, Kryeministri i Kosovës, Albin Kurti, bashkë me anëtarë të kabinetit qeveritar bënë te varri i ish-presidentit Ibrahim Rugova, tek varri i veprimtarit të çështjes kombëtare, Adem Demaçi, dhe, në Kompleksin Memorial “Adem Jashari”.