Presidentja Vjosa Osmani: Ardhja e refugjatëve afganë është çështje ditësh

Kosova është e gatshme për pranimin e qytetarëve që do të evakuohen nga Afganistani, mirëpo koha e saktë e ardhjes së tyre nuk dihet ende. Kështu shprehet Presidentja e Kosovës, Vjosa Osmani, në një intervistë për kanalin televiziv britanik, Skynews duke shtuar se autoritetet po presin informacione lidhur me datën e saktë të arritjes së këtyre personave në Kosovë.

“Është vetëm çështje ditësh. Do të varet sigurisht në atë sesi do të organizohet transportimi i tyre, sepse procesi organizohet nga Shtetet e Bashkuara. Ne do ta dimë kohën e ardhjes së tyre ndoshta deri në fund të kësaj jave,” tha Vjosa Osmani duke shtuar se ndonëse nNumri i saktë i refugjatëve afganë që do të pranojë Kosova ende nuk dihet, po punohet në zgjerimin e kapaciteteve për të pranuar sa më shumë prej tyre.

“Ne veçse jemi gati t’i pranojmë refugjatët e parë. Tani ne po i rrisim kapacitetet që të mund të pranojmë më shumë refugjatë. Prandaj nuk mund të përmend numrin final të refugjatëve që do të vijnë derisa të përfundojë studimi i secilit lokacion që mund t’i pranojnë ata në Kosovë.”

Pesë qytetarë kosovarë deri më tani janë evakuuar nga Afganistani, sqaroi Presidentja e Kosovës, dhe Ministria e Jashtme ka vënë në dispozicion linja telefonike për qytetarë tjerë që mund të kenë nevojë për evakuim nga atje.

Ndryshe, Kosova ka qenë ndër shtetet e para që i është përgjigjur pozitivisht kërkesës së SHBA-së për të strehuar afganët, të cilët kanë bashkëpunuar me forcat amerikane, pasi talibanët kanë marrë kontrollin e Afganistanit.

Qeveria e Shteteve të Bashkuara do të mbulojë të gjitha shpenzimet për afganët që do të strehohen në vende të ndryshme të botës, përfshirë edhe në Kosovë, raporton RFE, derisa të përfundojnë procedurat ligjore që ata të vendosen në SHBA.

Nga shtetet e rajonit, edhe Shqipëria dhe Maqedonia e Veriut janë shprehur të gatshme që të strehojnë afganët që kanë bashkëpunuar me forcat e SHBA-së, të NATO-s dhe që kanë punuar për organizata të huaja.