Presidentja Vjosa Osmani fillon konsultimet për datën e zgjedhjeve
Data e zgjedhjeve të reja do të caktohet pasi Lëvizja Vetëvendosje të pranojë aktgjykimin e plotë të Gjykatës Kushtetuese lidhur me Qeverinë e Kosovës. Kështu u shpreh kryetari saj Albin Kurti pas takimit me ushtruesen e detyrës së Presidentit të Kosovës, Vjosa Osmani, e cila ka nisur konsultimet me partitë politike për të caktuar datën e zgjedhjeve.
“Ne na duhet, që ta marrim njëherë aktgjykimin e plotë të Gjykatës Kushtetuese dhe varet nga data kur ne na vije ai aktgjykim i plotë, si palë që jemi në këtë çështje, e cila tashmë është zgjidhur, por nuk e ka përgjigjen e plotë që të jetë aktgjykim i plotfuqishëm dhe pas kësaj do të mund të shpallet data e zgjedhjeve nga ushtruesja e detyrës së presidentit, në një hark të caktuar kohor, siç e parasheh Kushtetuta”, tha Kurti.
Anëtari i Kryesisë së Lidhjes Demokratike të Kosovës, Arban Abrashi, pas takimit me Vjosa Osmanin, tha se subjekti i tij politik është i gatshëm për zgjedhje. Në këtë takim, tha Abrashi është përmendur 7 shkurti si datë e mundshme e zgjedhjeve. Por, para se të mbahen zgjedhjet, raporton RFE, LDK ka kërkuar që të votohet buxheti për vitin 2021.
“Datat të cilat sot i kam përmendur ka qenë data 7 shkurt, pra 40 ditë pas dy-tre ditësh pasi ta kalojmë buxhetin, prandaj kjo është përmend. Gjithsesi ky është takim preliminar dhe besoj që në takimet pas aktgjykimit të plotë e caktojmë edhe më saktë datën,” tha Abrashi duke shtuar se LDK edhe më herët është deklaruar se është e gatshme për zgjedhje, edhe në muajin janar.
Ndërkohë në konsultime me ushtruesen në detyrë të Presidentit, Vjosa Osmani, nga Partia Demokratike e Kosovës u paraqit Kryetari i Grupit Parlamentar të PDK-së, Memli Krasniqi.
Pas takimit, Memli Krasniqi tha se e ka mirëpritur vendimin, pasi në vazhdimësi si PDK kanë kërkuar të mblidhen partitë parlamentare për t’u dakorduar për një datë për shpërndarjen e Parlamentit.
Data e zgjedhjeve, tha ai, PDK pret që të shpallet sa më shpejt të jetë e mundur brenda harkut kohor pas vendimit të plotë të Gjykatës Kushtetuese.
“Besojmë që fundi i janarit është datë e përshtatshme. Besojmë që është e domosdoshme që të mos humbet kohë pasi edhe viti i ardhshëm po vjen me shumë pikëpyetje lidhur me krizën ekonomike,” tha Kryetari i Grupit Parlamentar të PDK-së, Memli Krasniqi, duke mos bërë të ditur nëse në zgjedhje do shkojnë të vetëm apo si koalicion, duke shtuar se ky nuk është prioriteti i tyre esencial.
Ndërsa AAK në konsultime me Presidenten e Kosovës për datën e zgjedhjeve u përfaqësua nga Zv/kryeministri në detyrë i Kosovës, Besnik Tahiri. Pas takimit ai bëri të ditur se është biseduar për afatet kohore të mbajtjes së zgjedhjeve.
“I diskutuam afatet kohore kushtetuese të cilat ndërlidhen me afatin që e ka jap vendimi i të Gjykatës Kushtetuese, por edhe ajo që dihet saktësisht që 5 maji është një datë kur skadon mandati i ushtrueses së detyrës së presidentit. I diskutuam këto. Presidentja u zotua se do të ketë konsultime të gjata me të gjitha partitë e pastaj të caktohet një datë që do të jetë në kornizën e këtyre afateve kohore,” tha Besnik Tahiri duke përfunduar:
“Të gjithë ne tanimë e kemi një qartësi, vendimi është te qytetarët, te populli, Kosovë urime zgjedhjet.”
Nesër, Presidentja e Kosovës, Vjosa Osmani vazhdon takimet me subjektet e tjera politike.
Ndryshe, dje Gjykata Kushtetuese vendosi se Qeveria e Kosovës, e udhëhequr nga Avdullah Hoti, është zgjedhur në mënyrë jokushtetuese. Kjo për shkak të votës së deputetit Etem Arifit, i cili, më 3 qershor votoi për Qeverinë Hoti, ndonëse kishte një dënim të formës së prerë për veprën penale “mashtrim me subvencione”, prej një vit e tre muaj burgim. Ai aktualisht është në vuajtje të dënimit.
Presidenti i Republikës së Kosovës, sipas vendimit të Gjykatës Kushtetuese, shpall zgjedhjet, të cilat duhet të mbahen jo më vonë se 40 ditë nga dita e shpalljes së tyre.
