Presidentja Vjosa Osmani: Pezullimi i vendimit për viza e vret dialogun Kosovë-Serbi!

Presidentja e Kosovës, Vjosa Osmani, tha sot se pezullimi i vendimit për heqje të vizave për qytetarët e Kosovës nga 1 janari i vitit 2024, do ta vriste dialogun mes Kosovës dhe Serbisë.

 “Kjo është mënyra për ta vrarë dialogun një herë e përgjithmonë. Në qoftë se dëshiron dikush që të mos ketë më dialog, atëherë ndërmerr masa të tilla, që janë masa ndëshkuese ndaj popullit të Kosovës. Nuk janë ndaj ndonjë lideri, nuk janë ndaj një politike, janë ndaj popullit të Kosovës. Dhe një ndëshkim i tillë i paprecedentë, që edhe ashtu ka qenë padrejtësi e madhe për popullin e Kosovës, do të rezultojë me vdekjen e dialogut. Nuk ka më askush mandat që të shkojë në Bruksel, kur populli i Kosovës ndëshkohet,” tha Vjosa Osmani duke reaguar pas deklaratës së Presidentit të Francës, Emmanuel Macron, se vendi i tij do t’i rishikojë zotimet që i ka bërë për çështje ekonomike dhe politika të vizave për Kosovën dhe Serbinë, nëse ato nuk sillen me përgjegjësi.

Kosova ka arritur pajtueshmëri me Bashkimin Evropian për shtensionim të situatës, tha Presidentja Osmani, duke rikujtuar se marrëveshja parashikon zvogëlimin e pranisë së Policisë së Kosovës në dhe rreth ndërtesave komunale në veri, hap që ajo ka thënë se Kosova e ka bërë, dhe se është duke u punuar në organizimin e zgjedhjeve të reja.

Baza ligjore për mbajtje të këtyre zgjedhjeve, siguroi ajo, do të jetë gati më 1 shtator, dhe kështu pret që BE t’i heqë masat ndëshkuese ndaj Kosovës, të cilat ajo i ka vlerësuar si të padrejta dhe joproporcionale.

Një tjetër pikë e marrëveshjes së Bratislavës parasheh edhe kthimin sa më të shpejtë në dialog në nivel të lartë. Presidentja e Kosovës, Vjosa Osmani, tha se pret lëvizje në këtë drejtim në muajin shtator.

Ndryshe, këto deklarata Presidentja e Kosovës, Vjosa Osmani, pas homazheve që bëri te Memoriali për të Pagjeturit, në Ditën Ndërkombëtare të të Zhdukurve së bashku me Kryetarin e Parlamentit, Glauk Konjufca.