“Presionet e halabakëve”, Agron Tufa padit në gjykatë për fyerje dhe shpifje, Brahon, Brokajn, Vukajn…

Drejtori i Institutit të Studimeve për Krimet dhe Pasojat e Komunizmit, Agron Tufa, ka paditur sot në Gjykatën e Tiranës, Spartak Brahon, Sabit Brokajn, Shaqir Vukajn, Arben Dukën dhe Fatos Tarifën, duke i akuzuar për fyerje dhe shpifje ndaj personit të tij.

“Kjo është bërë për shkak të detyrës dhe dëshirës së një segmenti të trashëgimisë Enveristë, të cilët kërkojnë rikthimin e diktaturës më të pistë të shekullit. Përmes padisë unë kërkoj që drejtësia e shtetit tonë ti vendose përpara provave të pakundërshtueshme dhe tu gjej vendin shpifjeve dhe kërcënimeve dhe frymës përçarës rracore mes shoqërisë tonë për rikthimin edhe më të egër të luftës së klasave,” u shpreh Agron Tufa pas padisë në Gjykatën e Tiranës.

Keni besim tek drejtësia?

Siç tha i nderuari deputet Taulant Balla, drejtohu organeve të drejtësisë së re dhe unë e kam marrë të mirëqenie dhe s’kam pse të mos e besoj.

Dosja e Gramoz Ruçit

Unë ende nuk di ndonjë fakt, nëse do të kishim një dijeni do ta trajtonim në respekt të ligjeve.  Unë flas këto që janë aktualisht  të dukshme dhe që nuk kam nguruar ti bëj publike. Kjo është një çështje që i përket një institucioni më të specifikuar që merret me gjërat personale. Për këtë çështje mund të merret Autoriteti i Hapjes së Dosjeve.

A keni pasur presion?

Vazhdimisht kam pasur presion. Presion në punë, presion halabakësh, presion nga makina në makinë, presion me mesazh, pra të gjitha format e presionit që mua vetëm sa më zbavitin.

Është sulm i orkestruar?

23 ditë resht si një front i kuq është drejtuar kundër një personaliteti të ndershëm që nuk jam përfolur kurrë në këto nivele. Por e kaluara jonë është përfshirë në çdo qelizë.

Emra konkretë

Spartak Braho, mund të lexoni gazetat, nuk është detyra ime. Unë jam një njëri, ata janë një trase e kuqe.

Ndryshe, pas akuzave të deputetit të Partisë Socialiste, Spartak Braho në Komisionin Parlamentar të Sigurisë, kundër Drejtorit të Institutit të Studimeve për Krimet dhe Pasojat e Komunizmit, Agron Tufa, duke e konsideruar “nxirje të luftës, heronjëve dhe dëshmorëve” zbulimin  e krimeve të komunizmit nga ky Institut, ndërsa vetë Institutin “seksion të Ballit Kombëtar”, Braho kërkoi “shkarkimin e Agron Tufës derisa t’i thërrasë mendjes e të jetë më i ekuilibruar në veprimtarinë e tij.”

Dhe, jo e gjitha përfundoi këtu!

Duke filluar nga 7 Prilli, Drejtori i Institutit të Studimeve për Krimet dhe Pasojat e Komunizmit, Agron Tufa, iu nënshtrua një fushate linçuese që tejkaloi edhe përmasat e komunistëve kriminel shqiptar.