Presioni i monopolistëve, Kryetari i AKEP jep dorëheqje: Nuk lejova nëpërkëmbjen e interesave publike!
Duke e pranuar prezencën e presionit të pandërprerë të interesave monopoliste, dy vite pas marrjes së detyrës, sot ka dhënë dorëheqje Kryetari i Këshillit Drejtues të Autoritetit të Komunikimeve Elektronike dhe Postare, AKEP, Ilir Zela, duke theksuar se nuk ka lejuar nëpërkëmbjen e interesave publike.
“Me paqen e njeriut që i ka shërbyer publikut me përkushtim shembullor, në këtë detyrë apo në angazhime publike të mëhershme, pa lejuar në asnjë moment që interesat publike të nëpërkëmben nga presioni i pandërprerë i interesave monopoliste, ju njoftoj dorëheqjen time nga detyra e Kryetarit të Këshillit Drejtues të AKEP,” thekson Ilir Zela në letrën e dorëheqjes drejtuar Kryetarit të Parlamentit, Gramoz Ruçi, dhe për dijeni Kryetarit të Grupit Parlamentar të PS, Taulant Balla.
Letra e plotë
“Prej datës, 22 nëntor 2017 kam patur privilegjin që me besimin dhe mbështetjen e plotë të Kuvendit të Republikës së Shqipërisë ti shërbej publikut në detyrën e Kryetarit të Këshillit Drejtues të Autoritetit të Komunikimeve Elektronike dhe Postare (AKEP).
Me paqen e njeriut që i ka shërbyer publikut me përkushtim shembullor, në këtë detyrë apo në angazhime publike të mëhershme, pa lejuar në asnjë moment që interesat publike të nëpërkemben nga presioni i pandërprerë i interesave monopoliste, ju njoftoj doreheqjen time nga detyra e Kryetarit të Këshillit Drejtues të AKEP.
