Presioni ndërkombëtar, Haradinaj: Nuk kërkoj garanci por kontratë…
Në kohën kur presioni ndërkombëtar për pezullimin e taksës është në rritje ashtu si edhe lëvizjet brenda koalicionit qeverisës, Kryeministri i Kosovës, Ramush Haradinaj pas mbledhjes së Qeverisë ka treguar se çfarë është biseduar në dy takimet e fundit, atë me N/Sekretarin amerikan për Çështje Politike, David Hale dhe dy këshilltarët kryesorë të kancelares gjermane Angela Merkel.
Haradinaj tha se e pozicioni i Berlinit është i qartë:
“Dialogu është i rëndësishëm duhet të vazhdojë, taksa është pengesë; hiqeni taksën,” tregoi Haradinaj qëndrimin gjerman, ndërsa sqaroi se nëse Serbia po qet kushte për mos me ardhë në dialog, Kosova nuk mundet ta kërcënojë Serbinë që të vijë në dialog.
Sipas Haradinajt, bashkësia ndërkombëtare nuk mund të bëjë presion te Serbia, por i bën presion viktimës, Kosovës.
Ai sqaroi edhe takimin e së shtunës në rezidencën e Ambasadorit amerikan Philip Kosnet. Duke e quajtur nder të jashtëzakonshëm ardhjen e N/Sekretarit amerikan për Çështje Politike, David Hale, tha se nuk ka kërkuar kurrë garanci se çka do të ndodhë në dialog, por ka kërkuar kontratë.
“S’kam lyp garanci. Kam fol për kontratë. I besoj Amerikës dhe kur ata thonë diçka e di se është ashtu. Por për shumë arsye ne po kërkojmë një kontratë me elementet përbërëse të saj, përfshirë ekonominë dhe tregtinë e lirë. Kjo është ajo që po kërkojmë. Garanci më të madhe se njohja e Amerikës s’mund të kemi. Megjithatë, për marrëdhëniet Kosovë-Serbi na intereson të dimë elementet e kontratës. Unë u besoj amerikanëve dhe si të më thonë kjo është formula, unë u besoj. Ne po kërkojmë kontratë të dimë ka shkon dialogu. Dialogun e ka bllokuar Beogradi sepse ata thonë se pa u heq taksa s’ka dialog. S’e kemi bllokuar ne. Ne ishim në dialog edhe duke e ditur se jemi viktimë e kemi mijëra të zhdukur e viktima. Më mirë është të themi tash jo se të marrim një kontratë pasi të shkojmë atje e s’do të ishte mirë t’u themi atëherë jo. Të dimë për çka po shkojmë në dialog.”
Me presidentin dhe kryeparlamentarin kanë pikëpamje të ndryshme në disa pika, tha Haradinaj por janë unikë për platformën për dialog.
“S’mund të thuhet se Kosova s’po flet me një zë. Kemi delegacionin që është votuar edhe me ligj dhe ky është uniteti i Kosovës. Jemi të gatshëm të dialog, kur të jenë pala tjetër gati ne i presim.” Në mbledhjen e Qeverisë sot është miratuar drafti i platformës vjetore të politikës së inteligjencës dhe sigurisë. Gjithashtu është aprovuar propozim vendimi për ndarjen e mjeteve financiare për komunën e Mitrovicës nga nën-programi shpenzimet e paparashikuara.
