Prespë, të dielën firmoset e marrëveshja për emrin e Maqedonisë

Të dielën në mëngjes në pjesën greke të Prespës, ministrat e jashtëm Nikolla Dimitrov dhe Nicos Kotsias do të firmosin marrëveshjen për zgjidhjen e problemit me emrin e Maqedonisë, raporton AlSat-M .

Fjalime zyrtare do të mbajnë dy kryeministrat, Alexis Tsipras dhe Zoran Zaev. Pas zyrtarizimit dhe firmosjes së marrëveshjes, ceremonia do të vazhdojë në anën maqedonase në Prespë. Qeveria e Maqedonisë nuk ka bërë të ditur vendet e sakta të takimeve në Greqi dhe Maqedoni, ndërsa nesër do të njoftojnë për përfaqësuesit e bashkësisë ndërkombëtare që do të jenë pjesëmarrës në firmosjen e marrëveshjes. Lokacionet mbeten sekret të paktën deri nesër, kur nga Qeveria pritet të dërgohet agjenda zyrtare.

Kujdesi i autoriteteve greke ka qenë për shkak të disa paralajmërimeve për protesta, pas njoftimit se përfundimisht i jepet fund kontestit mes Maqedonisë dhe Greqisë.

Paralelisht me firmosjen në Greqi dhe takimin në pjesën maqedonase të Prespës, VMRO-DPMNE në Manastir ka caktuar një marsh protestues kundër ndryshimit të emrit kushtetues. Nga ana tjetër, informacionet nga pala greke janë se nuk përjashtohen protesta edhe në anën greke në afërsi të vendit ku do të nënshkruhet marrëveshja. Është paralajmëruar se rreth vendit do të ketë sigurim policor dhe ndalesë qarkullimi për makinat civile për shkak të protestave të paralajmëruara.

Ndërkohë sot në Greqi debatin në parlament për mosbesimin e qeverisë së kryeministrit Tsipras e shënoi përjashtimi i partisë Agimi i Artë nga sesionet parlamentare. Deri te kjo erdhi pasi një deputet i kësaj partie i bëri thirrje ushtrisë ta arrestojë Tsiprasin, kryetarin dhe ministrin e mbrojtjes për të parandaluar tradhtinë. Ky akt u karakterizua si tentim për puç dhe partia u përjashtua nga debati. Partia në pushtet Siriza theksoi se zgjidhja e kontestit të emrit është e domosdoshme, ndërsa marrëveshjen e arritur e cilësoi si të mirë.

Komisioneri për zgjerimin pranë BE,  Johannes Hahn tha se zgjidhja e çështjes së emrit është shumë e rëndësishme për rajonin. Ai paralajmëroi mbështetjen e tij për referendum në mënyrë që të rezultojë i suksesshëm. Megjithatë, Hahn nuk pajtohet që në pako me referendumin të ketë edhe zgjedhje të parakohshme parlamentare