Prezantohen kandidatët për 28 dhjetor, Listat zgjedhore nuk premtojnë ndryshim në Kosovë!
Përkundër bujës së madhe që u munduan të proklamojnë liderët politik me publikimin e listave me kandidatë për deputetë për zgjedhjet e parakohshme të 28 dhjetorit në Kosovë, figurat qendrore në të gjitha listat kanë ngelur të pandryshuara, kështu që nuk pritet edhe ndonjë ndryshim i madh në rezultat pavarësisht entuziazmit që shprehu lideri i pakuptimtë i devollëve, Lumir Abdixhiku!
Kështu, Listën e Lëvizjes Vetëvendosje e kryeson kryetari Albin Kurti dhe pavarësisht që nuk mungojnë Glauk Konjufca, Donika Gërvalla-Schwarz, Avni Dehari, Albulena Haxhiu, Hekuran Murati, Xhelal Sveçla, Mimoza Kusari-Lila, Hajrulla Çeku, Shqipe Mehmeti Selimi, e Andin Hoti, të gjithë i referohen liderit Albin Kurti.
Dikush i quajti prurje, dy analistët që u munduan të përballen me propagandën e batonëve dhe buzhalëve, Viktor Buzhala dhe Blerim Gashi, por, çfarë vlere mund të ketë një analist kur përballë ka llumin e batonëve dhe buzhalëve që përveç zgjedhjeve i bënë pa interes edhe debatet televizive.
Nëse projektuesit e fitores së Lëvizjes Vetëvendosje e kanë projektuar fitoren me bindjen se rivalët e tyre politikë do të humbin elektorat është shumë gabim! Sot qytetarët i kanë listat përpara, por, jo edhe njerëzit me një ofertë ndryshe për të zgjidhur përsëritjen e mundshme të ngërçit të 9 Shkurtit!
Partia Demokratike e Kosovës, PDK, që konsiderohej si shpresa e vetme për ndryshim jo vetëm pse po futet në garë elektorale me një lideri të ri dhe shumë cilësor, siç është, Bedri Hamza, por, dhe me mbi 50 kandidatë që garojnë për herë të parë, bëri hapin e parë gabim ende pa e publikuar listën e kandidatëve për deputetë!
Pa memorie të partisë, të paktën nga strategjia e fitores së vitit 2007, nuk mjafton për të bërë ndryshime thelbësore “me mbi 50 kandidatë që garojnë për herë të parë dhe 37 gra që e forcojnë përfaqësimin, PDK mbetet e përkushtuar për ta çuar Kosovën përpara.”
Qytetarët duhet të njihen me vlerat e atyre që do të qeverisin, dhe me 50 kandidatë të rinjë nuk është ndonjë shkencë për të qeverisur ndryshe, nëse vërtetë synohet!
Por, sa mund t’ja arrij këtij qëllimi Bedri Hamza kur në vijën e parë sërish qëndrojnë deputetët e konsumuar që nuk prodhojnë më asgjë të re si Uran Ismaili, Vlora Çitaku, Enver Hoxhaj, Rrahman Rama, Ganimete Musliu, Blerta Deliu Kodra, Xhavut Haliti ose dhe Përparim Gruda me idetë e tij shterpe që nuk ngjitën më 9 shkurt, këtë nuk duhet ta konfirmoj 28 dhjetori sepse edhe 50 kandidatët që garojnë për herë të parë do të jenë në hall nga kjo kastë politike që do t’ju zgjidhë edhe dilemën atyre që janë zhgënjyer shumë kohë parë!
Askush nuk mund t’ju mohojë këtyre veteranëve politik të PDK-së të zënë vend në këtë listë ndërsa kanë elektoratë që i voton, por, vendi që zënë në listë, në këtë rast japin mesazh negativ!
Lista e Devollëve nuk ka se si të ishte ndryshe, jo fitore por nuk prodhoi as debat!
Për vetë faktin se pas publikimit të listës së kandidatëve të LDK-së, i gjithë produkti i inteligjencës së Lumir Abdixhikut është se i ndryshoi vendin Doarsa Kica Xhelilit dhe ngriti të paditurën energjetike Hikmete Bajrami, si dhe nuk e futi fare në listë Agim Veliun.
Përdorimi i të birit të Dr.Rugovës pasi ke ftuar si ligjërues në LDK kundërshtarin e tij më të madh Edi Ramën, ashtu si përdorimin e Fetah Rudit pas dështimit të negociatave me partinë NISMA, nuk tregojnë vetëm mungesë koherence të partisë por dhe strategji të tregtisë politike që dominon në kokën e këtij njeriu të paaftë për gjithçka!
Se cili do të jetë rezultati i 28 dhjetorit kjo nuk varet nga mendjendriturit batonë e buzhalë që shkatërruan LDK-në, por, nga horoskopi i Devollëve, nëse do të vazhdojnë ta financojnë këtë parti të dërrmuar nga njeriu që e drejton, Lumiri Abdixhiku, që vetëm politikë nuk bënë dot!
Në fund, Ramush Haradinaj dhe Fatmir Limaj, futen në garë me një rrezikshmëri mbijetese shumë më të madhe se sa Veton Surroi kur u zhduk nga skena politike me partinë e tij, me pragun që përcaktoi vetë!
Ramush Haradinaj nuk është se nuk ka njerëz të mirë në listën e kandidatëve për deputetë të AAK-së, por nuk ka parti! AAK nuk lëvizi me hapin e kohës, dhe nuk ndryshoi asgjë edhe në momentin kur Lëvizja Vetëvendosje u fut me mbi 50 për qind në skenën politike.
U ngjizë dhe ngeli vetëm si parti e Ramushit, që jo vetëm nuk prodhoi mendim ndryshe brenda partisë por as politikë që pretendon të jetë mbi partinë e dytë në rang kombëtar!
Ideja që lista mund të mbushet me personalitete të njohura është logjikë e ngritjes së një universiteti ose kompanie mediatike, por, nëse qytetarët dëgjojnë nga kjo parti vetëm fushatë negativiste dhe linçuese se “Albin Kurti është tradhëtar” dhe “Albin Kurti punon për Serbi”, dhe jo një ide për ndaljen nga kjo krizë që e kanë futur propaganda e batonëve e buzhalëve, asnjë qyteti nuk i duhet AAK që ti mësoj se si shahet ose akuzohet Albin Kurti ose dhe Glauk Konjufca kur mundohet të ulet në fronin e tij!
AAK lehtësisht mund të ngelet jashtë parlamentit dhe kjo do të ishte humbje jo vetëm për Rrafshin e Dukagjinit por për fatin e Kosovës, humbje shumë më serioze se sa në rastin e çdo partie tjetër që lehtësisht mund të gjejnë vend në PDK ose LDK! Gjithësesi, ky është vendimi i një individi!
Dhe, ndryshe nga AAK, NISMA-n e pret një tjetër fat edhe nëse nuk e kalon pragun dhe asfiksohet.
Por, skena politike humb frutin e një përpjekje e cila nga mendimi ndryshe në PDK përfundoi në një parti socialdemokrate që nuk arriti së fundi ti jap Kosovës asgjë as sociale dhe aq më pak demokratike!
Kështu, nëse dikush para mbrëmjes së 7 dhjetorit kishte ndonjë shpresë se kjo politikë mund të prodhojë ndryshe nga 9 shkurti, sot, e ka të qartë, Kosova nuk po mbetet çdo ditë e më shumë vetëm pa qytetarë, por, dhe me liderë vizionarë që dijnë ta sakrifikojnë jo vetëm veten, por, edhe ta projektojnë shtetin para partisë!
