Prezantohet instalacioni që shënon 100 vjetorin e minierave të Trepçës

Në përvjetorin e parë të themelimit të muzeut “Reporting House”, u prezantua instalacioni artistik “100”, një ekspozitë që shënon 100 vjetorin e minierave të Trepçës, e kuruar nga Gazmend Ejupi.

Instalacioni përmban minerale origjinale të nxjerra nga miniera Stantërg, pjesë e kompleksit historik të Trepçës.

“Mineralet janë nxjerrë nga thellësia prej 750 metrash nga minatorë që punojnë në kushte të vështira me temperatura deri në 50 gradë Celsius. Këto minerale përfaqësojnë më shumë se thjesht kristale; ato janë dëshmi e historisë së punës së palodhur dhe rezistencës së minatorëve në një prej rajoneve më të rëndësishme ekonomike të Kosovës,” thuhet në komunikatën e kësaj galerie.

Instalacioni është një bashkëpunim mes muzeut, kompanisë Trepça Sh.A, dhe Open Art Gallery, me hulumtime të mbështetura nga ESI, BIRN dhe Bridget Storrie.

Historia e minierave në Trepçë nis që nga epoka romake dhe vazhdon me periudha të ndryshme historike, duke përfshirë periudhën e kontrollit britanik në vitet 1920, periudhën nën Gjermaninë Naziste gjatë Luftës së Dytë Botërore, si dhe epokën e artë të minierave nga viti 1960 deri në vitin 1988. Trepça ka luajtur një rol kyç edhe gjatë ngjarjeve politike dhe shoqërore në Kosovë, duke qenë vendtakim i grevave dhe rezistencës ndaj regjimit serb-sllav.