Prezantohet kreu i ri i AKSHI-t, Kryeministri Rama: Do t’ju rrisim pagat, i keqardhur për presionin

Prezantohet Drejtori i ri i Agjencisë Kombëtare të Shoqërisë së Informacionit, AKSHI, Igli Tafa.

Kryeministri Edi Rama gjatë prezantimit të drejtorit të ri të është ndalur edhe te puna e ish drejtoreshës të AKSHI-t, Linda Karçanaj.

“Vendosa të vij vetë për të prezantuar drejtorin e ri, por edhe për të falënderuar Linda Karçanaj, me të cilën kemi punuar bashkë për dy dekada, dhe e njoh që nga drejtimi i Bashkisë në Tiranë.

Jam i pikëlluar për gjithçka ajo po kalon, në radhë të parë për agresionin barbar të portaleve dhe rrjeteve të dhunës verbale, që e asociojnë me gjera që s’kanë lidhje me Lindën.

Nuk kam dijeni për detaje që lidhin me aktivitetin e këtyre kompanive të përfshira në hetim, por kam dijeni për faktin që Linda është nënë e vetme me fëmijë. Ka një karrierë të shkëlqyer në administratën publike.

Në partnerët ndërkombëtare të AKSHIT, Microsoft etj kam dëgjuar fjalët më entuziaste për ju, stafin, dhe drejtuesen Linda.

E them këtë pasi është një person që po kalon një kalvar, që do të dalë e pastër, por kjo i takon drejtësisë ta thotë këtë gjë.

Po ndodh transformim i sistemit të drejtësisë.

Nëse në botën tuaja virtuale ndryshimet bëhen me algortime, në këtë botën e drejtësisë bëhen me jetën e njerëzve. Nuk është një kompjuter që fiket, por një jetë.

Në këtë sistem nuk udhëheq prezumimi i pafajësisë.

Nëse mbi AKSHI-n ka një hetim, në një botë të drejtë të gjithë duhet të prezumoheshin të pafajshëm, por ndodh e kundërta. Por në fund e drejta del. Ka një kosto, por del. Për më tepër për ne është e rëndësishme që ky institucion të vazhdojë punën, të jetë fari që orienton lëvizjen e anijeve dhe tregon ku është porti, për sa i përket revolucionit dixhital”, pohoi ndër të tjera Rama.

Kryeministri foli edhe për politikën e re të rritjes së pagave që do të zbatohet për punonjësit e AKSHI-t.

“Kemi vendosur për të bërë një ndërhyrje në legjislacion, për të bërë rritje domethënëse të pagave. Për t’iu treguara se sa vleni, të mos dekurajoheni, të mos braktisnin vendin për pozicionin privat, sepse kjo është shtëpia juaj dhe ju shërbeni gjithë shqiptarëve.

Ky është një moment solidar, për të qenë një skuadër që shkon në të njëjtën drejtim dhe që iu gëzohet të njëjtave suksese. Ne do të bëjmë që AKSH-i të ketë pagat më të larta në Shqipëri, dhe asnjë kompani private në vend nuk do të mund ta konkurrojë.

Jam i keqardhur për ata prej jush që janë venë në presion, të përballur me metoda presione të papranueshme për një qeverisje demokratike. Më dhemb çdo goditje e padrejtë që i bëhet këtij institucioni, që ka rrugën e vet.

Është fatkeqësi e madhe që emri i AKSHI-t të njolloset, por nuk mund të pretendojmë që për shkak të barrës që mbani, aktiviteti i AKSHI-t të jetë i pahetueshëm”.

Ministrja e Ekonomisë dhe Inovacionit, Delina Ibrahimaj, së bashku me Kryeministrin Edi Rama, prezantuan drejtorin e ri të Agjencisë Kombëtare të Shoqërisë së Informacionit (AKSHI), Igli Tafa.

Në fjalën e saj, ministrja e Ekonomisë dhe Inovacionit Delina Ibrahimaj, e vuri theksin te roli strategjik i Agjencia Kombëtare e Shoqërisë së Informacionit, AKSHI, në transformimin digjital të vendit.

Ministrja vlerësoi punën e deritanishme të AKSHI-t, duke e cilësuar atë si shtyllën kryesore të qeverisjes elektronike në Shqipëri.

“AKSHI përfaqëson një nga institucionet më të rëndësishme për qeverisjen moderne. Arritjet në digjitalizimin e shërbimeve publike janë një krenari për vendin tonë dhe një dëshmi e kapaciteteve profesionale të stafit. Shqipëria sot renditet ndër vendet me nivel të avancuar të ofrimit të shërbimeve elektronike, falë një pune të qëndrueshme dhe vizioni afatgjatë”, u shpreh ministrja.

Duke u ndalur te prioritetet për periudhën në vijim, ajo theksoi se objektivat për vitin 2026 janë ambicioze dhe kërkojnë vijimësi të ritmit të lartë të punës. Fokus i veçantë do të jetë zhvillimi i platformës “e-Albania 2.0”, me shtrirje të plotë edhe në pushtetin vendor, si dhe ofrimi i shërbimeve proaktive të bazuara në ngjarje jetësore, me qëllim reduktimin e procedurave dhe lehtësimin e aksesit për qytetarët dhe bizneset.

Një tjetër prioritet madhor mbetet modernizimi i portalit të prokurimeve publike, si një hap i rëndësishëm drejt rritjes së transparencës, efikasitetit dhe integritetit në menaxhimin e fondeve publike.

Ministrja Ibrahimaj theksoi se transformimi digjital nuk është vetëm një proces teknologjik, por një reformë thelbësore që rrit cilësinë e shërbimeve, ul kostot administrative dhe forcon besimin e qytetarëve te institucionet./Monitor/