Prezanton Platformën, Hoti: Dialogun Kosovë-Serbi do ta udhëheq Kryeministri!

Kryeministri i Hashim Thaçit, Avdullah Hoti, duke prezantuar kornizën e Qeverisë së Kosovës për dialogun me Serbinë tha se dialogu do të udhëheqet nga kryeministri.

“Dialogun e udhëheq kryeministri i Kosovës. Ka pasur diskutime nga më të ndryshmet, javët dhe muajt e fundit, unë nuk do të bëj kurrfarë gare me bartësit tjerë institucionalë, pasi që kompetencat e mia kushtetuese janë të qarta, përfshirë edhe kompetencat për dialog,” tha Hoti në Akademinë e Shkencave dhe të Arteve të Kosovës duke saktësuar se integriteti territorial i Kosovës është i panegociueshëm dhe nuk do të ketë marrëveshje pa njohje reciproke që siguron ulësen në OKB dhe njohjen nga pesë vendet e BE-së që ende nuk e kanë njohur Kosovën.

Akademia e Shkencave dhe e Arteve e Kosovës, ASHAK, nga ana tjetër u shpreh se Kosova duhet t’i qaset seriozisht procesit të dialogut për normalizim të raporteve me Serbinë.

ASHAK ka kërkuar, raporton RFE, që të ruhet integriteti territorial i Kosovës, në bazë të kufijve të njohur ndërkombëtarisht, sipas Deklaratës së Pavarësisë 2008.

Dialogu Kosovë-Serbi, i ndërmjetësuar nga Bashkimi Evropian, ka filluar më 2011 në Bruksel.