Primare apo Kunat!
nga Agim Popoci
Primaret, proces ky i përzgjedhjes së kandidatëve për garë zgjedhore nga anëtarësia e partisë u realizua më në fund sot nga Partia Demokratike!
Duke i dhënë një leksion të madh të demokracisë jo vetëm rivalit politik Edi Rama dhe minuesit të PD Ilir Meta, por edhe Lulzim Bashës i cili për 8 vjet ofroi lista në 12 pa 5 ose atëherë kur Kunati përfundonte pazarin, Komisioni i Rithemelimit të PD e ktheu në bazë procesin për të nisur një rrugëtim të ri të Partisë Demokratike e cila pas zgjedhjeve të 25 Prillit po shkonte drejt shuarjes!
Sot Komisioni i Rithemelimit PD dëshmoi se karta morale me të cilën Lulzim Basha iu fut garës zgjedhore 2021 me Procesin e Vlerësimit të kandidaturave për deputetë, që rrugës u bë më pis se Lana, ishte thjeshtë vetëm çështje e vullnetit politik, i cili i mungoi Bashës jo vetëm në zgjedhjet e fundit parlamentare.
Dhe, deri sa sot po transmetohej drejtëpërdrejt numërimi i votave me përfundimin e Primareve në 6 bashki për zgjedhjet e pjesshme vendore të 6 Marsit, nga selia e partisë së Lulzim Bashës erdhi një zë këmbues komunist duke e quajt proces ku Berisha voton, emëron dhe numëron!
I kompleksuar si i zgjedhur nga një proces ku Berisha votoi, emëroi dhe numëroi votat për kryetarin e ri të PD, si dhe nga paaftësia që të aplikoi Primaret si kreu i kësaj partie, Lulzim Basha nuk e futi në gojë teserën e PD dhe duke i futur aty ku e ka me shumë qejf Sekretari i tij që ka në krah, për tu larguar në pakthim nga selia e partisë të cilën nuk e drejtoi dot, por vazhdoi me akuzat kundër njeriut që e bëri kryetar, Sali Berisha, dhe atë që po e mbanë në këtë post, Edi Rama, duke theksuar se po bëjnë një parti të re për të dëmtuar PD-në!
Po, Sali Berisha po krijon një parti të re por jo me Edi Ramën, por me Komisionin e Rithemelimit dhe jo për ta dëmtuar Partinë Demokratike sepse ajo nuk dëmtohet më shumë! Aty ku e katandisi Lulzim Basha, nuk arriti ta çoj për 30 vjet as Partia e Punës me Sigurimin e Shtetit, me gjithë ëndrrën e madhe që kishte Edi Rama dhe zellin e madh të sejmenit të kuq Ilir Meta!
Karta morale me të cilën u rikthye lideri historik Sali Berisha deri sot mund të quhej dhe një skenar i parë nga dora e Berishës, por sot gjithçka është ndryshe sepse u bë realitet.
Sot anëtarësia e PD zgjodhi se kush do të jetë kandidat për Kryetar në zgjedhjet e pjesshme vendore për 6 bashki, duke shprehur dhe vullnetin se pse janë përcaktuar me mënyrën e drejtimit të partisë, siç e ofron Komisioni i Rithemelimit të PD!
Po, për të gjetur gjilpërën në kashtë sot mund të themi se Primareve i munguan ofertat e kandidatëve për Kryetar të bashkive por efekti kohë gjithsesi dha një produkt të Primareve.
Sot edhe pjesa më skeptike e demokratëve për këtë nismë kishte mundësinë që të shoh se partia e tyre mund të përzgjedhë kandidatë edhe 36 ditë para ditës së zgjedhjeve duke mos pritur sekondën e fundit për ta mbyllur listën Kunati!
Si do ta vazhdojnë jetën e tyre politike këta skeptikë, me Primare apo Kunat, kjo nuk është çështje as e Berishës dhe as e Bashës, as e Metës dhe as e Ramës; Dhe, tashmë është e qartë se prej sot dhe në të ardhmen, në Partinë Demorkatike askujt nuk do ti imponohen më as Primaret nëse ata vërtetë e duan diktaturën e Lulzim Bashës, por këtë nuk do ta gjejnë në PD?! Kjo nuk do të ndodhë kurrë, as atëherë!
Pavarësisht videove idiote që publikon Zyra e Gebelses së Bashës, minimit në vijimësi që Ilir Meta i bënë Partisë Demokratike duke shitur “dashurinë për Berishën” si dhe ndihmës që i jep Edi Rama me FNSH e SPAK, demokratët janë të lirë të zgjedhin, siç ishin në vitin 2013, nëse dëshirojnë të jenë anëtarë të denjë të Partisë Demokratike, do ti bashkohen LSI-së në emër të “ruajtjes së vendit të punës” ose do ti pranojnë ofertat nga PS e Edi Ramës që nuk mungojnë!
Dhe, prej sot sekptikët arritën të shohin se si demokratët hapën një kapitull të ri, ku nuk kanë se pse ta paguajnë Kunatin nëse mendojnë se meritojnë të jenë Kryetar të Bashkisë, këshilltar bashkiak ose deputet!
Në fund, sot Komisioni i Rithemelimit të PD e demonstroi dhe faktin se nuk ka hatërmbetje me ata që janë kënaqur me dhunën që ofroi Lulzim Basha me 8 Janar dhe ishin të gatshëm të votojnë në Primare për kandidatin e Partisë Demokratike që mendojnë se do të mbrojë interesat e qytetit të tyre! Madje, u bë e qartë dhe për të tjerët që janë dashuruar në regjimin Rama-Basha-Meta dhe nuk ju hyjnë në punë Primaret, për të cilët mesazhi është i qartë: Kunatin e deshët, Kunatin ju lamë!
