Primaret e PD në Sarandë, dy kandidatët e balotazhit zgjedhin modelin e Tiranës

Kandidatët e Partisë Demokratike në balotazhin e Primareve në Sarandë sot kanë vendosur të mos presin 11 Dhjetorin dhe me modelin e Tiranës të vendosin që kandidati i cili u rendit i pari më 4 dhjetor, Ardit Cikuli, të zyrtarizohet si kandidat i PD për zgjedhjet e 14 Majit 2023 ndërsa Ilir Nikolla si i rendituri i dytë, në rast të fitores në zgjedhjet lokale i garantohet posti i Nënkryetarit të Bashkisë Sarandë.

“Një falenderim për lidershipin e PDSH, është një falenderim për deputeten e zonën, znj.Ina Zhupa, e cila mundësoi falë përpjekjeve të saj këtë format pajtues dhe bashkëpunues, për fitoren e padisuktueshme të PD për Bashkinë Sarandë,” tha Ilir Nikolla ndërsa Ardit Cikuli shtoi:

“Ashtu si i madhi Skënderbe na ka përçuar një mesazh shumë të vyer prej shekujsh që: ‘Bashkimi bën fuqinë’, ashtu si atëherë, ashtu veprojmë edhe ne sot. Iliri si njeriu i dytë më i votuar nga ju të nderuar demokratë, nesër do të jetë bashkëpunëtori më i mirë. Do të jetë nënkryetari i Bashkisë Sarandë,” tha Cikuli i bindur se të gjithë bashkë do ia dalin.

Ndryshe, në Primaret e 4 dhjetorit në Sarandë, Ardit Cikuli mori 582 vota, Ilir Nikolla 310, Spiro Vaso 252 dhe Armando Magllara 33 vota. Mësohet se rezultati i kësaj marrëveshje në mes të kandidatëve të PD për balotazh, Ilir Nikolla dhe Ardit Cikuli, erdhi pas angazhimit të deputetes demokrate të zonës Ina Zhupa.

Deklaratë

Ina Zhupa: Procesi i Primareve ishte historik, jo vetëm për PD, por për të gjithë shoqërinë shqiptare, sepse ishte hera e parë ku anëtarët, simpatizantët e një force politike, shpreheshin me votë dhe me vullnetin e tyre të lirë, se kë donin që të ishte qytetari i parë, shërbëtori i parë i bashkive të tyre.

Në fakt jam shumë krenare që në Bashkinë Sarandë ne kishim një pjesëmarrje rekord të anëtarëve dhe simpatizantëve të PD. 1181 anëtarë dhe simpatizantë që votuan për të katërt kandidatët të cilët ishin në garën e Primareve në Bashkinë Sarandë.

Kjo pjesëmarrje na motivon, sepse tregon edhe njëherë besimin që kanë qytetarët për ndryshim, besimin që kanë për atë që vjen më pas, për shërbimin që do t’ju bëhet në Bashkinë e Sarandës.

Tregoj edhe njëherë që fryma e bashkimit është forcuar në Bashkinë Sarandë, dhe kjo frymë bashkimi ka sjellë këtë pjesëmarrje rekord. Nga Bashkia Sarandë, sot kemi një lajm shumë të mirë. Një lajm të jashtëzakonshëm për bashkimin dhe fitoren për bashkimin e kësaj bashkie.

Unë jam sot këtu me dy kandidatët që kanë dalë në balotazh, të ciilët do t’i drejtohen qytetarëve të Sarandës, por edhe shqiptarëve të gjithë Shqipërisë me mesazhet e tyre. Z. Ilir Nikolla…

Ilir Nikolla: Faleminderit znj.deputete. Fjala ime e parë është një falenderim për lidershipin e PDSH, është një falenderim për deputeten e zonën, znj.Ina Zhupa, e cila mundësoi falë përpjekjeve të saj këtë format pajtues dhe bashkëpunues, për fitoren e padisuktueshme të PD për Bashkinë Sarandë.

Fjala e radhës është për demokratët e Sarandës. Jemi së bashku këtu me Arditin për t’i siguruar ata që beteja jonë ka vetëm një sukses, atë të fitores së 14 majit dhe për ne është detyrim.

Fjala e radhës është për qytetarët e Sarandës, të cilëve iu sigurojmë së bashku me Arditin që do t’ju kthejmë qytetit bukurinë dhe qytetarëve krenarinë e tyre të nëpërkëmbur. Dua ta mbyll me dy fjalë drejtuar pjesës tjetër të PDSH, e cila vazhdon të jetë në rrugën e drejtë pa krye.

Iu the atyre se vetëm bashkimi dhe vetëm bashkimi është modeli i cili do të sjellë fitoren e PDSH në zgjedhjet e radhës dhe në zgjedhjet e përgjitshme të rradhës. Faleminderit!

Ardit Cikuli: Të nderuar demokratë, të nderuar qytetarë të Sarandës.

Ashtu si i madhi Skënderbe na ka përçuar një mesazh shumë të vyer prej shekujsh që: ‘Bashkimi bën fuqinë’, ashtu si atëherë, ashtu veprojmë edhe ne sot. Iliri si njeriu i dytë më i votuar nga ju të nderuar demokratë, nesër do të jetë bashkëpunëtori më i mirë. Do të jetë nënkryetari i Bashkisë Sarandë.

Të gjithë bashkë do ia dalim. Do ia dalim të gjithë ne! Do ia dalim që fëmijët tanë, ta shikojnë Sarandën si një alternativë për të jetuar, dhe jo të emigrojnë. Mirë u takofshim për në betejën e 14 majit 2023.

Ina Zhupa: Faleminderit shumë! Ky ekip do të zgjerohet nga intelektualët, dhe nga qytetarët që do t’i bashkohen për fitoren e PD, për fitoren e qytetarëve të Sarandës më datë 14 maj…