Primaret në 72 degët e PD, KOKOE: Procedurat për kandidatët dhe simpatizantët, afatet…

Komisioni i Organizimit dhe Kontrollit të Operacioneve Elektorale në Partinë Demokratike, sot ka sqaruar gjithë procedurën e zhvillimit të procesit të Primareve i cili mbi të gjithë ka për qëllim fitoren e PD në zgjedhjet lokale të 14 Majit 2023 duke garantuar zgjedhje të lira dhe të barabarta.

Pasi të vetpropozohen, ose propozohen nga anëtarësia ose dhe vetë Kryesia e Partisë Demokratike, kandidatët duhetë të dorëzojnë dokumentacionin për primare për bashkinë Tiranë, Durrës dhe Elbasan deri më 6 nëntor ora 20:00 ndërsa për të gjitha bashkitë e tjera afati është 8 nëntor, ora 20:00, dhe është data 13 nëntor kur Kryesia e PD bën lançimin e kandidatëve, ka sqaruar KOKOE ndërsa afate ka dhe për regjistrimin e simpatizantëve që votojnë, proces i cili ka filluar më 18 tetor dhe do të mbyllet 5 ditë para datës së zgjedhjeve.

Në fillim, Kryetarja Albana Vokshi për procesin gjithërfshirës në 72 degët e Partisë Demokratike:

“Primaret do të zhvillohen në 72 degët e Partisë Demokratike. Çdo qytetar mund të regjistrohet si simpatizant në afatet e përcaktuara dhe të vendosë të votojë për kandidatin për qytetar të parë në bashkinë ku jeton.

Ajo që unë dua të theksoj është fakti që primaret janë një process gjithëpërfshirës. Është risi. Për herë të parë është aplikuar nga Partia Demokratike në zgjedhjet e pjesshme të 6 marsit, në 6 bashkitë ku u zhvilluan zgjedhjet. Por tashmë primaret do të zhvillohen në 72 degët e Partisë Demokratike.

Ato jo vetëm nuk lënë jashtë askënd, por kushdo që beson që ka mbështetje në elektoratin opozitar, por jo vetëm, mund të kandidojë sipas rregullave të caktuara që ne do t’i shpjegojmë edhe sot. Çdo qytetar që beson se vota e tij vlen mund të regjistrohet si simpatizant në afatet e përcaktuara dhe të vendosë të votojë për kandidatin për qytetar të parë në bashkinë ku jeton,” tha Albana Vokshi e bindur:

“Primaret janë themeli i besueshmërisë së Partisë Demokratike, e cila lindi dhe vazhdon të jetë parti e votës së lirë, parti e njerëzve të lirë. Primaret do t’u tregojnë edhe njëherë qytetarëve ,për tej Partisë Demokratike, se ne jemi alternativa më e mirë për të qeverisur jo vetëm bashkitë, por për të qeverisur vendin.”

Ndërsa anëtarja e KOKOE, Fatbardha Kadiu zbardhi afatet e dorëzimit të dokumentacionit:

“Deri më datë 4 dhjetor përmbyllen primaret. Afati i fundit për dorëzimin e dokumentacionit të kandidatit për primare për bashkinë Tiranë, Durrës dhe Elbasan është data 6 nëntor ora 20:00. Dhe për të gjitha bashkitë e tjera është 8 nëntor, ora 20:00.

Pas këtij afati nuk do të pranohet asnjë aplikim pasi dokumentacioni do i kalojë Kryesisë së Partisë Demokratike për vlerësimin e kandidaturave dhe është data 13 nëntor kur Kryesia e PD bën lançimin e kandidatëve,” Fatbardha Kadiu duke sqaruar dhe mënyrën e kandidimit:

“Bazuar në nenin 12 të statutit të PD, pika 3, kandidatët kanë tre opsione: mund të vetpropozohen; të propozohen nga anëtarësia; mund të jenë propozime nga vetë Kryesia e Partisë Demokratike. Afati i fushatës është një afat përafërsisht 21 ditor.”

Procesi i regjistrimit të simpatizantëve, tha anëtari i KOKOE, Ervin Minarolli, është i hapur prej datës 18 tetor dhe do të mbyllet 5 ditë para datës së zgjedhjeve.

“PD nxit pjesëmarrjen e simpatizantëve në zgjedhjet për primare. Neni 25/ quhet simpatizant çdo qytatar që mbështet politikën apo veprimtarinë e Partisë Demokratike dhe voton për të. Prandaj PD nxit pjesëmarrjen e tyre në këto zgjedhje.

Procesi i regjistrimit të simpatizantëve është i hapur që në datën 18 tetor dhe do të mbyllet 5 ditë para datës së zgjedhjeve.

Regjistrimi i kandidatëve kryhet nga njësia bazë e PD që është seksioni. Kryetari, sekretari apo nënkryetari i seksionit në bashkëpunim me kryetarin, sekretarin apo nënkryetarin e grupseksionit bëjnë identifikimin dhe regjistrimin e simpatizantëve. Formularët janë fletë unike me numër serial, me kondrabiletë. Në momentin e regjistrimit simpatizanti merr kondrabiletën të vulosur në të dyja pjesët e saj,” tha Ervin Minarolli duke përfunduar:

“Çdo simpatizant që do të jetë pjesë e përzgjedhjes nga primaret e PD duhet të kontaktojë degën e PD për t’u regjistruar. Të gjitha këto të dhëna hidhen në një regjistër në format elektronik në Partinë Demokratike dhe do u shprëndahet degëve para votimit.”

Në fund, anëtari i KOKOE, Keltis Kruja, garantoi pa asnjë përjashtim aksesin e barabartë të çdo kandidati në lista, logjistikë dhe në degët e PD.

“Në funksion të një procesi sa më transparent dhe gjithëpërfshirës që ka qëllim kryesor fitoren e PD në këto zgjedhje vendore të 14 majit, kandidatën në gjykimin e Kryesisë së PD, sigurisht edhe nga detyrimet që vijnë në bazë të statutit të PD, të kodit të sjelljes dhe etikës së PD, do të duhet të plotësojnë një formular vetëdeklarimi në të cilin të angazhohen për kontributin maksimal që do japin kësaj partie, për një fushatë pozitive dhe një process të lirë, të ndershëm dhe të barabartë brenda partisë.

Ky komision do të garantojë pa asnjë përjashtim, aksesin e barabartë të çdo kandidati në lista, logjistikë, në degët e PD në mënyrë që të kemi një garë të barabartë mes kandidatëve kudo ku kandidoijnë në primare,” tha Keltis Kruja duke përfunduar:

“Ky proces mbi të gjithë ka për qëllim fitoren e PD në këto zgjedhje vendore dhe për këtë ne do të garantojmë zgjedhje të lira dhe të barabarta.”