Primaret në PD, balotazhi përmbyll listën e kandidatëve kundër Edi Ramës më 14 Maj
Balotazhi i Primareve në Partinë Demokratike i cili u zhvillua në pesë bashki, përveç se shënoi një pjesëmarrje më të lartë se në raundin e parë, përmbylli dhe listën e kandidatëve që do të përballen me Edi Ramën në zgjedhjet lokale të 14 Majit 2023.
Me përfundimin e procesit, Komisioni i Organizimit dhe Kontrollit të Operacioneve Elektorale të Partisë Demokratike bëri të ditur përfundimin e procesit të Primareve në pesë bashki ndërkohë rezultatet përfundimtare japin dhe fituesit e kësaj gare:
Dibër – 1137 votues, fitues: Ismail Uka 566 vota
Mat – 676 votues, fitues: Skender Gjuci 478 vota
Librazhd – 659 votues, fitues: Shefki Çota 417 vota
Fier – 964 votues: Evdar Kodheli 579 vota
Mirditë – 880 votues, fitues: Albert Mëlyshi 528 vota
TOTAL (5 degët): 4.316 votues
Në fund, Komisioni i Organizimit dhe Kontrollit të Operacioneve Elektorale falënderoi çdo anëtar e simpatizant të degëve të mësipërme që edhe në kushte të rënduara atmosferike, besuan në procesin e Pimareve e votuan në mënyrë masive në dy raunde.
Ndryshe, balotazhi në Tiranë dhe Sarandë nuk u zhvillua sot pasi kandidatët e dy bashkive të renditur si të dytët në raundin e parë janë dakordësuar të tërhiqen nga gara duke i dhënë mundësi Belind Këlliçit përkatësisht Ardit Cikulli të përballen në garën e14 Majit 2023 me rivalët socialistë, dhe në rast të fitores Ilir Alimehmeti përkatësisht Ilir Nikolla do zënë postet e Nënrkyetarëve të bashkive përkatëse.
Ndërsa në Krujë, i rendituri i dytë me 346 vota të marra në raundin e parë të Primareve në PD, Ndriçim Babasi, u tërhoq duke mos pasur asnjë shans ndaj të renditurit të parë Agron Loka me 548 vota të marra nga gjithsej 961 votues që kishin marrë pjesë në këtë proces.
