Prishtina në karantinë

Ministri i Shëndetësisë, Arben Vitia, ka marrë vendim për shpalljen e Prishtinës zonë karantine, duke ndaluar hyrjet dhe daljet në këtë komunë.

Këtë vendim, raporton RFE, e ka marrë në konsultim me kryetarin e Prishtinës, Shpend Ahmeti, dhe pas konfirmimit të marrë nga Instituti Kombëtar i Shëndetësisë Publike për 33 raste të reja të prekura me sëmundjen COVID-19 që shkakton koronavirusi.

Në një komunikatë për media është thënë se 20 nga 33 personat e prekur janë nga Prishtina.

Kryetari i Prishtinës, Shpend Ahmeti, në reagimin e tij përmes rrjetit social Facebook, tha se ditëve në vijim do të ashpërsohen masat, pasi që sipas tij, qyteti po hyn në fazë kritike.

“Ditë jo e mirë për Prishtinën. Nga 25 kontaktet e personit të infektuar ditë më herët, 20 janë testuar pozitiv sot. Lajmi i mirë është që të gjitha janë kontakte të personit të infektuar. Lajmi i keq është se tani duhet të shtojmë masat restriktive në Prishtinë,” tha Shpend Ahmeti duke shtuar se masat e shtuara do të vërehen në lagjen Mati 1 dhe se policia nuk do të lejojë grumbullimin e më shumë se dy personave.

Autoritetet kanë paralajmëruar se nesër do të mbajnë konferencë të jashtëzakonshme për media për të njoftuar për masat e reja.

Duke marrë parasysh të dhënat e fundit, në gjithë Kosovën është raportuar për 283 persona të prekur nga koronavirusi, 58 janë shëruar derisa 7 të tjerë kanë vdekur.

Përveç Prishtinës, në karantinë është edhe Ferizaj.