Prishtinë, më 9 qershor Bashkimi Kombëtar i Arkivave

Drejtoria e Përgjithshme të Arkivave të Shqipërisë me homologen e saj kosovare organizojnë Konferencën e Dytë Mbarëkombëtare të Arkivistikës e cila do të zhvillohet më 9 qershor në Prishinë

Zëdhënësja e DPA, Elsa Saka sqaron për PaFrikë.al edhe qëllimin e organizimit të kësaj Konference: “Qëllimi i kësaj konference është të mbledhë bashkë arkivistët e Shqipërisë dhe të Kosovës, arkivistët shqiptarë të viseve jashtë Shqipërisë, por që veprojnë ndër shqiptarë, nga Maqedonia dhe Mali i Zi, si dhe të tjerë arkivistë që punojnë apo studiojnë në fushë të arkivistikës. Temat që propozohen për diskutim lidhen specifikisht me arkivistikën, por edhe me historinë e arkivave apo institucioneve arkivore në zonat shqipfolëse.”

Veç arkivistëve të rrjeteve arkivore kombëtare, ftesa për pjesëmarrje u drejtohet të gjithë profileve të tjerë të arkivistëve, institucioneve që ruajnë apo atyre që ndërveprojnë me ruajtjen e kujtesës kolektive.

Viti Mbarëkombëtar Gjergj Kastrioti Skënderbeu është një shans i artë për të gjithë arkivistët dhe historianët për të përafruar praktikat profesionale në viset kombëtare. DPA u bën thirrje të gjithë studiuesve të bashkohen në këtë përpjekje për të trajtuar historinë kombëtare njëjtrajtshmërisht pavarësisht kufijve politikë