Problemet, u shkaktuan nga Edi Rama!

nga Edi Paloka

Edi Rama vazhdon të gjej “fajtorë” jashtë vetes për bllokimin e integrimit dhe mos hapjen për herë të katërt të negociatave.

“Vendet skeptike kanë problemet e tyre të brendshme, nuk kanë lidhje me ne,“ justifikohej Rama.

Në fakt, Holanda dhe Franca, dy nga vendet që janë të vendosura për një “JO” të prerë ndaj Ramës, kanë vërtetë si argument kryesor “problemet e tyre të brendshme”, por problemet e tyre janë të shkaktuara nga Rama.
Holanda e ka shprehur prej kohësh se kriminaliteti i eksportuar nga Shqipëria e Ramës, është një nga plagët më të rënda që i janë shkaktuar atij vendi. 

Rama thotë se në Holandë ka dhe kriminelë nga vende të tjera por “harron” që nuk ka vend tjetër në Evropë që të jetë kthyer në strehë , apo siç e quan Departamenti Amerikan i Shtetit, në “ bazë operacionale të krimit të organizuar” që më pas vepron jo vetëm në Evropë po dhe deri në SHBA.

Dje, Presidenti Macron bëri të qartë se kush ishte “problemi i brendshëm” i tyre që i detyron ti bëjnë “block” Shqipërisë. Shqiptarët, në numra absolut janë të dytët dhe për numër popullsie, të parët në botë si azilkërkues në Francë, duke kaluar dhe sirianët.

Këto shifra azilkërkuesish janë tërësisht “meritë” e Ramës dhe nuk kanë të bëjnë fare me “dëshirat normale për të lëvizur për një jetë më të mirë në Evropë,” siç kërkon të justifikohet palaçoja kryeministër. “Edhe nga vendet e tjera të Evropës ikin qytetarë të tyre drejt vendeve më të zhvilluara,” thotë Rama.

Sigurisht që dhe nga vendet e tjera lëvizin, siç kanë lëvizur dhe nga Shqipëria në gjithë këto vite, po këto largime masive nuk ndodhen as kur shqiptarëve sapo ju liberalizuan vizat, përkundrazi.

Ikje të tilla ka pasur vetëm në kohën e krizave më të rënda në Shqipëri, në ‘91 apo në ‘97! 

E nuk ka si të ndodhë ndryshe. 

Nuk ka vend në botë që familje të tëra hidhen në rrugë pa ju dhënë asnjë mundësi jetese, siç po ndodhë sot në Shkozë apo siç ka ndodhur dhe më parë tek Bregu i Lumit e siç tentohet tek Astiri. E pse? Që Rama dhe pesë hajdutë rreth tij, të pangopur, të vazhdojnë të fusin miliona të tjera në xhepat e tyre.

Vetëm në qeverinë e Ramës burgosen njerëzit se nuk paguajnë dot energjinë, pasi i kanë larguar nga puna e ju kanë hequr dhe ndihmën sociale. Ndërkohë që kriminelët janë bërë zotër të vendit.

Mjerimi dhe pasiguria për jetën kanë pushtuar këtë vend dhe gjithçka për “meritë” të një kryeministri arrogant, antihuman, të paaftë e injorant që mendon vetëm si të grabisë pa pyetur për jetët që shkatërron.

E pra “problemet e tyre”, janë problemet që Rama ju ka shkaktuar duke e kthyer Shqipërinë në pak vite në ferr për qytetarët dhe parajsë për kriminelët.

Prandaj si Holanda ashtu dhe Franca jo vetëm nuk pranojnë të na hapin negociatat por na kërcënojnë dhe me rikthim të vizave.

“Shqipëria si Evropa “ për ne nuk është një koncept burokratik e ca më shumë një mënyrë për të fituar ca pikë politikisht siç kërkon Rama. Ne duam të na hapen negociatat e të pranohemi në BE atëherë kur vërtetë të kemi arritur nivelet evropiane të jetesës e jo sepse kërcënojmë se “përndryshe do shkojmë në krah tjetër” apo sepse kemi shpërndarë ca zhake në formë lobimi tek disa burokratë të korruptuar. 

“Ëndrra evropiane” për ne dhe gjithë shqiptaret nuk janë disa letra të firmosura ku thuhet që jemi pjesë e Evropës vetëm sepse Rama këto letra do që ti paraqesë si fletë lavdërimi për qeverinë e tij. Ne nuk na duhen “çmimet” që fiton Veliaj për ujin, ndërkohë që Tirana nuk ka pikë uji. 

Ne nuk duam një Evropë në letër apo në 3D . 

Ne duam një Shqipëri ku vërtetë të jetohet si në Evropë dhe shqiptarët ndihen realisht qytetarë të Evropës. 

Ne duam të ecim në rrugën ku ishim nisur atëherë kur Evropa po afrohej me shpejtësi e në pak kohë na anëtarësoi në KE, në NATO e na liberalizoi vizat.

Ne duam të dalim dhe një herë nga errësira e natës ku na ka futur prej gati shtatë vitesh kjo qeveri.

Ne duam një Shqipëri ku dielli të lind çdo ditë për gjithë shqiptarët e jo vetëm për Ramën !