Problemi Kosovë-Serbi/ Haradinaj: E zgjidhë vetëm SHBA, sa për Mogherinin kështu mbesim edhe 3000 vjet

Kryeministri i Kosovës, Ramush Haradinaj tha se ka kërkuar që në procesin e dialogut me Serbinë të merr pjesë SHBA sepse problemi mes Kosovës dhe Serbisë mund të zgjidhet vetëm me përfshirjen e SHBA.

Ramush Haradinaj në një intervistë për TV21 përsëri kritikoi Përfaqësuesen e Lartë për Politikë të Jashtme dhe Siguri pranë BE, Federica Mogherini duke shtuar se ajo nuk ka bërë asgjë për problemin mes Kosovës dhe Serbisë. Dhe jo vetëm kaq!

“Po t’ia lëmë në dorë vetëm Mogherinit, do të mbësim kështu edhe 3000 vjet,” tha Haradinaj duke shtuar se lufta në Bosnje dhe Kosovë ka përfunduar vetëm me ndërhyrjen e SHBA-së, dhe përsëriti se problemi mes Kosovës dhe Serbisë mund të zgjidhet vetëm me përfshirjen e Shteteve të Bashkuara.

Me këtë rast ai përmendi edhe rastin e fundit, ku kryeministrja serbe Ana Brnabiç i dërgoi letër kryeministrit shqiptar Edi Rama, duke kërkuar që të rishikojnë njohjen e Kosovës shtet të pavarur dhe sovran.

Kryeministri I Kosovës tha se ndihen të ofenduar nga kjo letër e kryeministres serbe dhe mos veprimi i Evropës, pasi sipas tij nuk pati as edhe një deklaratë nga udhëheqësit e Bashkimit Evropian për këtë çështje.

“Ne na thuhet mos veproni, ndërsa nuk po disiplinohet Serbia,” tha Haradinaj, duke shtuar se as Federica Mogherini, as Johannes Hahn, as Jean Claude Juncker, as Donald Tusk e as Cecilia Malmstrom nuk janë lajmëruar për t’i thënë Serbisë se ajo letër nuk është në frymën e stabilizimit të Ballkanit.

“Ku është Evropa, ku janë ata që nuk reagojnë ndaj Serbisë,” pyet Haradinaj duke shtuar se kur ne aktivizohemi për të mbrojtur sigurinë tonë, udhëheqësit e BE-së aktivizohen sikur të ishin në Beograd e jo në Bruksel. “Ka shkuar koha kur ne kemi dëgjuar secilin çka na thotë. E vetmja mënyrë e përmbylljes së paqes Kosovë – Serbi, e vetmja mënyrë është pranimi i të drejtës së Kosovës,” tha kryeministri i Kosovës, Ramush Haradinaj.