Programi i Biznesit, Berisha: Taksa sheshtë 10%, TVSH zbret në 15%, fund taksave absurde në ndërtim!

Taksa e sheshtë 10 për qind, TVSH zbret në 15 për qind ndërsa i jepet fund taksave absurde në ndërtim, ishte ky zotimi i Kryetarit të Partisë Demokratike, Sali Berisha, ndërsa prezantoi Programin e Biznesit në takim me Dhomën e Tregtisë dhe Industrisë Tiranë dhe Shoqatat e biznesit duke premtuar dhe uljen e detyrimit të sigurimeve shoqërore.

Takimin konsultativ me temë “Hartimi i një platforme për një zhvillim ekonomik të qendrueshëm”, Kryetari i Partisë Demokratike e filloi duke i premtuar biznesit se Qeveria e PD do do bëjë gjithçka që ky vend të prodhojë sa më shumë

“Shfrytëzoj rastin të përshëndes të gjithë biznesmenët e Shqipërisë, të cilët në vlerësimin tim, ushtrojnë veprimtarinë e tyre në kushte të vështira si në asnjë vend tjetër.
Shqipëria e tre viteve të fundit është Shqipëria e rënies dramatike të prodhimit. Është Shqipëria që nga një semestër në tjetrin, prodhimi industrial bie.
Eksportet nga viti 2023-2024 janë ulur me 32 për qind, statistikë zyrtare kjo. Eksportet nga njëri muaj në muajin tjetër të këtij viti vazhdojnë të bien. Prodhimi bujqësor shënoi rënie dramatike.
Pra, ne ecim drejt një ekonomie e cila mbahet sot në dy shtylla kryesore. Mbahet në ndërtimin dhe në një mënyrë ose në një tjetër, në turizmin.
Por historia ka provuar se edhe ekonomitë më të fuqishme të planetit, kur janë mbajtur në dy shtylla, kanë njohur kriza shumë të thella.
Pikërisht për këtë arsye ne kemi shpallur Made in Albania, prodhimin kombëtar si krenari kombëtare.
U garantoj ju dhe të gjithë sipërmarrësit se do bëjmë gjithçka që ky vend të prodhojë sa më shumë, sa më me cilësi dhe sa më me konkurrencë.
Ne kemi shpallur dhe jemi të bindur se alfa dhe omega e programit tonë duhet të jetë ekonomia, ekonomia, ekonomia.
Kjo gropë e tmerrshme që po krijohet në këtë vend nga largimi masiv i shqiptarëve ka në themel ekonominë, ekonominë, ekonominë.
Zoti Jakaj paraqiti këtu shqetësime ndër më seriozet dhe unë po marr sektorin e ndërtimit.
Ai tregoi se në këtë sektor, taksat janë 10 dhe 12 fishuar. Kush i paguan këto të dashur qytetarë? Këto i paguani ju. Qeveria ua vendos ndërtuesve, ndërtuesit janë të detyruar t’i pasqyrojnë në çmimet e banesave. Ato ose shndërrohen në mollë të ndaluar, ose ju duhet të punoni dekada të tëra për të blerë një apartament.
Sektori i dytë ku mbahet, që është sektor i fuqishëm dhe Shqipëria ka një potencial shumë të madh dhe larg të shfrytëzuarit në shkallën e duhur, është turizmi.
Por në vlerësimin e qeverisë, 10 milionë turistë me 7 milionë net fjetje, tregon se në këtë sektor, po të krahasohemi me Malin e Zi, që merr 2.7 milionë turistë në vit, ne kemi një informalitet prej 80 për qind.
Ky informalitet pasqyrohet direkt te qytetari i thjeshtë, sepse qytetari i thjeshtë përfiton nga shitja në këtë sektor gjithsej 7-8 milionë euro në buxhetin e shtetit, në një kohë kur ky qytetar shpenzon për këtë sektor çdo vit 430 milionë euro,” tha Sali Berisha ndërsa prezantoi Programin e Biznesit duke e konsideruar jetike një ndërhyrje emergjente, një revolucion të vërtetë në ekonomi, ku beson se do shënohet një kthesë rrënjësore.
“Së pari, ne jemi dhe mbetemi të zotuar para biznesit për një revolucion të ri të vërtetë fiskal.
Ne besojmë se paratë në kontot e tyre janë më të vlefshme për shoqërinë dhe qytetarët se sa në kontot e qeverisë, sepse kjo u jep mundësi të mëdha punësimi dhe zgjerimi të aktivitetit.
Ndaj dhe ne do kalojmë në një sistem fiskal në të cilin së pari do ketë stabilitet të atij sistemi.
Kodi nuk do mund të ndryshohet siç është ndyshuar gjatë këtyre viteve me ndikime nga më absurdet, por kodi do miratohet në fillim të 4-vjeçarit, dhe ai kod do merret apriori e drejtë e dhënë për biznesmenin dhe nuk mund të ndryshojë në disfavor të tij.
Do vendoset taksa e sheshtë 10 për qind. Ne jemi për taksën 10 për qind, taksa e shekujve dhe mijëvjeçarëve e njerëzimit. Është faktuar si taksa më e drejtë, është faktuar si taksa që i jep frymëmarrje ekonomisë.

E kemi eksperimentuar ne në vitin 2005 dhe jo vetëm që nuk patëm ulje të të ardhurave, por patëm dyfishim. Por, taksa 10 për qind do mbetet ndjellëse për të gjitha taksat e tjera.
Ne do ulim progresivisht detyrimin e sigurimeve shoqërore.
Ne po shkonim drejt saj dhe absolutisht ai ishte një veprim shumë i drejtë. Nuk mund të them se kjo do bëhet në 100 ditët e para, por kjo do bëhet në mënyrë të padiskutueshme.
TVSH-ja nuk ka më tabu. Do zbritet në 15 për qind me qëllim për të zbritur edhe më poshtë.
Nuk mund të besoj unë se ai 20-përqindëshi është një nivel i shenjtë dhe nuk do preket. Do preket, do e ulim në 15 për qind. E kemi pasur dikur 12.5 përqind. Tani do zbresim tek 15-a për të parë se ku mund të zbresim përsëri.
Energjia elektrike do jetë më e lira në Europë. 6 lekë për kilovat orë. Shqipëria ka çdo potencial për të furnizuar biznesin me 6 lekë kilovat orë. Kaskada e Drinit e bën të mundur për çdo sipërmarrje energjetike. I fryjnë ata kostot duke punësuar një armatë militantësh dhe kostot i paguajnë qytetarët dhe biznesi. Pra, nga 18-24 lekë që është tani, do zbresë në 6 jetë dhe do jetë ndër vendimet e para të 100-ditëshit.”

Dje jo vetëm kaq!

“Taksa e shitjes së pronës do ulet në 2 për qind nga 15 për qind që është.
Çmimi i karburanteve në pikat e shitjes me pakicë do jetë plus/minus 10 për qind me çmimin në Kosovë dhe Maqedoni. Nuk do shkojnë më njerëzit me mbushë serbatorët në zonat kufitare. Ata e shesin më lirë se taksa në një litër naftë është 1.1 euro këtu, nuk ekziston në asnjë vend tjetër. Tjerët e shesin 1.1 euro në pompa, ne i vendosim taksë 1.1 euro. Merr fund kjo.
Do reduktohet me 4 herë numri i inspektimeve. Inspektorët janë jo vetëm grabitës të mëdhenj të kohës së bizneseve. Ngulen aty dhe po t’u përllogaritësh ditët që humbet biznesi me inspektorët, mund të shkojnë në 50 ditë. Ne do instalojmë sistemin dixhital të inspektimeve. Kontrollet do bëhen mbi bazën e analizës së riskut.
Ne kemi objektiv të arrijmë në 30 për qind të PBB-së të ardhurat buxhetore, por ne jemi të bindur se kjo ulje jo që nuk do pakësojë, por do rrisë të ardhurat buxhetore.
Do ketë përjashtim nga taksat për 5 vite për të gjithë ata shqiptarë që kthehen dhe investojnë në vendin e tyre.
Sikundër taksa lokale nuk do jetë kurrë më shumë se 1 përqind e xhiros vjetore. Se ky ç’ka bërë? E ka bërë taksën zero për bizneset e vogla dhe janë dhjetëfishuar taksat lokale gjer në taksa antikushtetuese. Bashkia thotë vendos taksë për arsimin po ku e gjen ti të drejtën të vendosësh një taksë për arsimin kur arsimi është një sistem i qendërzuar? Dhe tani nuk dihet ku ka shkuar taksa.
Do bëjmë gjithçka për punësimin e të rinjve. Do marrim përsipër për çdo të ri të punësuar një vit sigurimet shoqërore. Çdo i ri që investon gjer në moshën 25 vjeç, pa taksa. Po kështu edhe gratë kryefamiljare,” tha Berisha dhe ndërsa Biznesi u ankua për drejtësinë ai i porositi se duhet të ngrenë zërin, sepse shqiptarët kanë nevojë për një rireformim të sistemit.

“Ne jemi për krijimin e zonave të lira ekonomike. Në rast se vështron 34 vite, Shqipëria nuk arriti të ketë zonat e lira ekonomike, në një kohë kur fqinjët tanë i kanë sukses të vërteta. Maqedonia ka 6 dhe po shton të tjera. Serbia ka 18.
Pra, ne do të bëjmë gjithçka për të filluar me 4 zona ekonomike dhe pastaj sipas mundësisë.
Në zonat ekonomike nuk do lejohen investime nga offshore sepse kthehen qeveritarët dhe sjellin ato që i kanë vjedhur dhe kjo e bën të pamoralshëm zonën e lirë ekonomike.
Ne kemi pasur dhe kemi ngritjen e një banke zhvillimi. Natyrisht kjo bankë zhvillimi do ngrihet në bashkëpunim me institucionet financiare ndërkombëtare në mënyrë që të ketë të gjitha garancitë.
Ju shtruat disa çështje shumë seriozë dhe unë po ndalem në një prej tyre, çështja e Gjykatës Administrative.
Çfarë ndodh sot? Unë e kam thënë me dhjetëra herë, ne nga kjo që pësoi drejtësia pas reforme, ne humbasim miliarda euro të ngrira, të bllokuara në çështje civile midis jush, midis shtetit, në tërësi.
Unë sot nuk di një investitor serioz të huaj që të vijë në këtë vend ku ka zero siguri juridike. Sepse nuk ka proces. Në qoftë se i thua do presësh 10 vite, ai nuk është proces.
Por unë kërkoj që të ngrini zërin për këtë.
Pse? Ku jemi ne sot? Ne jemi sot në një përballje me pasoja të tmerrshme ekonomike, ligjore, të drejtave të njeriut në këtë reformë, të cilës i dalin zot në një përçmim të vetëdijshëm apo të pavetëdijshëm ndaj shqiptarëve.
Pse e them këtë? Sot për çështjet civile duhet të presësh 10 vjet apo 15 vjet dhe kjo nuk po vjen duke u pakësuar. Ishin 130 mijë dosje, tani janë 150 mijë dosje.
Dhe po të pyesësh, thonë reforma. Çfarë reforme? Reformë që u mohon shqiptarëve të drejtën e procesit ligjor.
Po dënohen zyrtarë, për zyrtarë mbani një statistikë ju lutem, Kina komuniste dënon më shumë se çdo vend tjetër, por dënon edhe politikisht, ndaj edhe quhet diktaturë komuniste. E sjell këtë shembull sepse shqiptarët kanë nevojë urgjente për një rireformim të këtij sistemi me Komisionin e Venecias.
Sepse ky ortek po bëhet gjithnjë e më i madh. Dosjet po bëhen gjithnjë e më të mëdha, biznesmenët, qytetarët nuk marrin të drejtat e tyre.
Ju jap shembullin e Kinës, Kina është më e ashpra për dënimet për korrupsion, por Kina jep edhe dënime politike. E vërteta është se ka një klimë biznesi të pakrahasueshme sepse nuk pret kush 10 vite. Sepse një biznesmen falimenton për 10 vite.

Pra është një çështje që ju duhet të ngrini zërin tuaj.
Sigurisht ne e ngremë zërin tonë sepse nuk mund të pranojmë një drejtësi politike, por ju si biznes, qytetarët duhet të ngrenë çështjen se atyre u mungon procesi ligjor që është një e drejtë themelore e tyre. Prandaj këtu duhet një partneritet i përbashkët, t’i themi gjërat siç janë.
Dakord, u dënuan disa zyrtarë, por kjo nuk justifikon që të presë një popull i tërë për një proces 10 vite, 15 vite. Jemi këtu, 62 për qind e të burgosurve në Shqipëri janë të paraburgosur, për definicion të pafajshëm, të padënuar.
Ne u bëmë një vend, kape e fute sepse nuk ka gjykatës për ta shqyrtuar, nuk ka prokuror për të ndjekur dosjen,” tha lideri i opozitës duke mos harruar dhe taksat absurde në ndërtim për të cilat u zotua se do marrin fund!

“Porti i Durrësit, mos e pyet. Porti i Durrësit ka vetëm një funksion, të mos kapet asnjë kg drogë.
E ka marrë Poja tani, e kishte ky Vengu, tani e administron në aparencë një drejtor, në fakt drejtori i vërtetë është kapobanda e Durrësit, Troplini.
E keni shumë të drejtë që kërkoni, sepse është një keqardhje e madhe për punonjësit e sektorit të turizmit. Ata shpërngulen nga të katër anët dhe ata ngelen. Shteti duhet të ndërhyjë, t’i mbështesë. Këtu duhet mbështetur turizmi, që bashkë me sipërmarrjen, këta punonjës të mbështeten.
Jam dakord plotësisht me vendosjen e bakshishit të pataksueshëm. Ai ekziston, po një gjë që ekziston, më mirë legjitimoje dhe quaje pjesë të shërbimit që ai bën dhe mos ia takso.
Do të kalojmë ligjin e sponsorizimeve, me të cilin biznesi do të ketë lirinë e mjaftueshme për të investuar për bamirësi, për të investuar për kulturë, sport dhe fushat që ai do të kontribuojë.
Unë po vij nga Napoli dhe një biznesmen shqiptar kishte sponsorizuar boksierin që kishte dalë kampion bote dhe më dhuroi dorezën e boksit me të cilën kishte hedhur nokaut kundërshtarin.
Detyrimisht që ky ligj do të kalojë shumë shpejt dhe do jetë ndër ligjet e para që do kalojmë.
Taksat e ndërtimit, këto janë absurde. Do marrin fund në këtë mënyrë. Le që nuk e kemi pasur këtë strehimin social.
Pra rikthehen tek nivelet më të ulëta absolutisht me një indeksi të asaj që ka qenë dhe jo 10 herë më e lartë se sa është sot.
Taksa e plehrave, taksa Rama. Pyesni policët, dilni tek Kthesa e Kamzës dhe polici detyrohet të nderojë kamionin, nuk le një kamion të kalojë. Dheu është mall, dikush e heq, tjetri e blen sepse i duhet. Kurse ky tani do që t’ia dorëzosh të gjithë Edi Ramës dhe Erion Veliajt dhe ata e shesin dhe do shkosh ta blesh tek ata. Ky është një nga aktet më korruptive. Por problemi është se meqenëse del emri i Edi Ramës aty, ata nuk e hetojnë.
Ju lutem, edhe ju u kërkoj që të ngrini zërin fuqishëm kundër narko-euros. Eksportet po vdesin në Shqipëri nga narko-eurot. Sepse ju jeni vetë biznesmenë, por nëse të ulet fitimi 30 përqind, çfarë të mbetet për të fituar pastaj?
Vetëm me euron, këta sipërmarrës gjobiten me 35 përqind dhe po falimentojnë njëri pas tjetrit. Ndaj dhe bie prodhimi dhe punësimi nga viti në vit. Është e domsodoshme të ngremë zërin.
Është krijuar në Shqipëri narko-euro. Nuk ekziston në asnjë vend tjetër të Europës sepse nuk ka narko-shtet, vetëm Shqipëria është narko-shtet.
Ne do krijojmë bordin që do bëjë vlerësim dinamik dhe që do kompensojë çdo eksportues masën e dëmit që i vjen nga lëvizja e kursit të këmbimit nga euro.
Taksa për pronat e pashitura. Dakord jam. Natyrisht që do gjejmë një mënyrë sepse siç e dini ka një ndërhyrje të fuqishme të narko-sektorit. Ndërhyrjen e bën më shumë në ndërtim ai. Do gjejmë një mënyrë që ndërtuesi të mos ndërtojë dhe të presë vetë pa i shitur, por jam dakord që të mos trajtohen sikur janë shitur dhe po përdoren,” tha Kryetari i Partisë Demokratike, Sali Berisha, duke përfunduar:

“Tani, ju keni bërë një platformë shumë të mirë dhe kjo ishte platforma jonë. Ne u garantoj që do pasqyrojmë plotësisht shqetësimet tuaja dhe i gjejmë shumë të arsyeshme dhe shumë të drejta.
Në këtë mënyrë ne shpresojmë t’i paraqesim biznesit shqiptar për të gjithë sektorët një platformë të Made in Albania, pasi Made in Albania është shtyllë kryesore e Shqipërisë Madhështore që duam të ndërtojmë.
Ne do investojmë dhe besojmë se Shqipëria ka potenciale të jashtëzakonshme energjetike, sidomos tani me rënien e çmimeve të paneleve solare, Shqipëria mund ta nxjerrë prodhimin diellor prodhimin më kryesor, mjafton që të përkrahë biznesin dhe kompanitë privatë, por edhe qytetarët në instalimin e paneleve.
Po kështu ne mbetemi të vendosur shumë për shfrytëzimin e erës, ka një potencial shumë të madh eolik Shqipëria dhe ne do bëjmë gjithçka.
Ne kemi një nga gazsjellësit e mëdhenj të Europës.
Ne hapat e para që do bëjmë, gazifikimin e qyteteve dhe do shqyrtojmë akcizën e gazit siç e thatë.
Pra, një transformim i madh na pret përpara dhe gjithnjë ky partneritet është interesi më i mirë i qytetarëve.”