Programi i financuar nga MCC dhe Qeveria, Kurti: Investim i madh në paravarësinë energjetike
Sot po hapim zyrtarisht procesin e parakualifikimit për Dizajnimin dhe Ndërtimin e Sistemeve të Mëdha për Ruajtjen e Energjisë përmes Baterive, tha Kryeministri i Kosovës, Albin Kurti, në konferenca e organizuar në Prishtinë nga Korporata e Sfidave të Mijëvjeçarit, duke saktësuar se 125 MW do të operojnë në koorporatën për ruajtjen e energjisë dhe 45 MW tjera nën KOSTT.
“Për dekada të tëra Kosova është përballur me vështirësi në sektorin e energjisë. Ne nuk kemi pasur vetëm nevojën për investime por vizion që sjellë rezultate që nuk mund të kthehen mbrapshtë. Andaj kemi vënë synime ambicioze, objektiva serioze dhe kemi caktuar një vizion i cili sa është solid është edhe largpamës. Vitin e kaluar kemi përmbyllur me sukses ankandin diellor dhe po në të njëjtin vit kemi lanësuar ankandin e parë të energjisë së erës.
Sot ne po hapim zyrtarisht procesin e parakualifikimit për Dizajnimin dhe Ndërtimin e Sistemeve të Mëdha për Ruajtjen e Energjisë përmes Baterive. 125 MW do të operojnë në koorporatën për ruajtjen e energjisë dhe 45 MW tjera nën KOSTT-in. Projektet e baterive do të kenë ndikim të menjëhershëm. Së pari do ta ulim koston e importit të energjisë si dhe do të rrisim sigurinë e furnizimit,” tha Albin Kurti duke përfunduar:
“Programi kompakt i financuar nga MCC dhe qeveria, përfaqëson një investim të madh në paravaresinë energjetike. Ky është një transformim që synon t’i jap Kosovës një ekonomi më të qëndrueshme.”
Ndërsa, ministrja e Ekonomisë e Kosovës, Artane Rizvanolli tha se nga rezervat e energjisë pas realizimit të këtij procesi, Kosova do t’i kursejë më shumë se 15 milionë euro.
“Rezervat e energjisë do t’i kursejnë sistemit të energjisë më shumë se 15 milionë euro në vit. Të gjitha këto ndikojnë që të ulet kosto përfundimtare e furnizimit me energji. Gjatë kësaj jave Kosova e ka kaluar vleresimin vjetor të MCC-së,” tha Artane Rizvanolli duke përfunduar:
“Kosova është një ndër 26 shtetet që e kanë kaluar këtë vlerësim. Përveç që ka arritur në shumicën e indikatorëve progres, Kosova ka arritur përparim në politikat fiskale, luftimin e korrupsionit dhe punësim.”
Ndryshe, në këtë konferencë, përveç përfaqësuesve nga Korporata e Sfidave të Mijëvjecarit, marrin pjesë dhe përfaqësues nga rreth 200 kompani vendore dhe ndërkombëtare, të cilat kanë shprehur interes për të qenë pjesë e procesit të Dizajnimit dhe Ndërtimit të Sistemeve të Mëdha për Ruajtjen e Energjisë përmes Baterive.
