Programi për Kulturën, Berisha: Dyfishimi buxhetit, lehtësim i taksave mbi librin, ndërtimi i Teatrit

Kryetari i Partisë Demokratike, Sali Berisha, ka prezantuar sot Programin e PD duke premtuar dyfishimin e buxhetit dhe lehtësira në taksat mbi librin ndërsa u zotua solemnisht për ndërtimin ashtu siç ishte të Teatrit Kombëtar i cili u shemb nga dyshja kriminale Rama-Veliaj.

Kryetari i Partisë Demokratike e nisi prezantimin e sotëm me një minutë heshtje për Margarita Xhepën që sot u nda nga jeta, artistja e papërsëritshme që shndriti në skenë dhe ekran.

“Dua të shpreh ngushëllimet e mia të ndjera familjes Xhepa, miqve, bashkëpunëtorëve dhe të gjithë artdashësve të Shqipërisë, pasi sot u nda nga jeta artistja më përfaqësuese e skenës shqiptare në disa dekada, Margarita Xhepa.
Margarita Xhepa është një artistë e papërsëritshme që shndriti në dhjetëra dhe qindra role në skenën e teatrit dhe në film. Me një talent të rrallë. Me një forcë interpretimi të jashtëzakonshëm. Ajo mbeti gjithnjë një nga artistet më të dashura, më të çmuara të Shqipërisë.
Ndaj me këtë rast, duke ndarë dhimbjen dhe zinë me familjen Xhepa, me të gjithë miqtë dhe të afërmit e të ndjerës Margarita Xhepa, me të gjithë artdashësit që e kanë dashur, vlerësuar dhe çmuar kaq shumë, ju ftoj të mbajmë një minutë heshtje në nderim të kujtimit të saj,” tha Sali Berisha duke e vlerësuar Kulturën sot më keq se në çdo pushtim ndërsa prezantoi Programin e PD për Kulturën.

“Sot para jush do të paraqes vizionin dhe programin e PD për kulturën. Situata e kulturës shqiptare është më keq se në çdo pushtim që mund të ketë pasur Shqipëria. Mafia politike në pushtet, për arsye mafioze dhe antishqiptare, ka shkatërruar të gjithë infrastrukturën që ekzistonte dhe që ekziston në çdo kryeqytet të botës për artin dhe kulturën, përveç teatrit të operës dhe baletit.
Rrafshimi i teatrit kombëtar në një akt genocidal ndaj kulturës kombëtare, i njëjti fat me kinematë, me teatrot e fëmijëve dhe institucione të tjera të kulturës, janë dëshmi e qëndrimit përçmues të narkoeksponentëve ndaj kulturës shqiptare.
Buxheti për kulturën është buxheti më qesharak. Trashëgimia kulturore është objekt agresioni barbar të gjithanshëm nga mafia shqiptare dhe ndërkombëtare.
Shqipëria është një nga vendet më të pasura në botë në trashëgiminë kulturore. Ajo po përfundon në partneritetet mafioze dhe shkatërrimtare për këtë pasuri. Artistët janë sot njerëzit më të braktisur, më të pambështetur. Jeta artistike në kryeqendrat tonë është pothuaj inekzistente. Aktivitete të përvitshme, në të cilat piktorë dhe skulptorë, njerëz të arteve pamore, paraqisnin krijimet e tyre, nuk ekzistojnë më.
Galeria e arteve u dyllos pa një aktivitet. Në Shqipëri flitet për artin vetëm për shkarravinat e Edi Ramës, të cilat nuk panë kurrë dritë para se ai të bëhej kryeministër. Mos harroni se në aktin e parë, pasi mori kryeministrinë, ai u paraqit në bienalen e Venecias duke shfrytëzuar postin dhe aty mori damkën nga kritikë të shquar të artit, vlerësimin si shkarravina të një adoleshenti të droguar.
Po, janë dy gazetarë të famshëm italianë që bënë këtë vlerësim për Edi Ramën.
Dhe përfaqësim më në artin kontemporan nga artistë shqiptarë nuk dëgjon sepse nuk kanë këtu asnjë lloj mbështetje, asnjë lloj mundësie, megjithëse ka midis tyre talente të mëdha, talente të vërteta,” tha Berisha duke premtuar ngritjen e Ministrisë së Kulturës, dyfishimin e buxhetit për Kulturën dhe lehtësimin e taksave mbi librin.

“Për të gjitha këto, PD zotohet t’i kushtojë një rëndësi parësore artit dhe kulturës si elementë më thelbësorë të identitetit tonë kombëtar.
Ne shqiptarët, një komb plurireligjioz, në rast se të tjerët kanë identitet besimin fetar, ne identitet kombëtar kemi kulturën dhe gjuhën. Dhe nuk është e rastit që kjo shpërfillje e madhe që i bëhet kulturës dhe artit, të kenë prapamendim, të ketë synim pikërisht identitetin kombëtar.
Ndaj dhe jam këtu për të garantuar artistët dhe të gjithë botën e artit dhe të kulturës, se qeveria e ardhshme do të adaptojë një qëndrim totalisht transformues të kësaj situate.
Së pari, kultura do ketë ministrinë e vet. Kultura është në gjendje e imagjinoni vetë ju. Një ministër antikulture që bën betejë me trashëgiminë, me kulturën e vendit. Pra, do ketë një ministri kulture me misionin më të rëndësishëm të zhvillimit, konsolidimit të mbrojtjes të kulturës kombëtare.
Drejtuesit e institucioneve kulturore do të zgjidhen nga vetë punonjësit. Do të jenë më të mirët e më të mirëve. Imagjinoni ju se çfarë batërdie është bërë me drejtimet. Merrni operën dhe baletin sa herë ia ka ndryshuar drejtuesit. Të gjitha në funksion të parave.
Arti dhe kultura kanë nevojë urgjente për një transparencë të plotë për të gjitha fondet. Dhe i garantoj se borde që vendosin transparencë të plotë do funksionojnë menjëherë pas 11 majit. Meritokracia dhe nxjerrja e këtij sektori jashtë konfliktit të interesit, do jenë bazë e reformës. Reforma në sistemin e arteve dhe të kulturës duhet të angazhohet në një reformë të thellë të burimeve të financimeve të këtij sektori.
Qeveria do rrisë kontributin, do dyfishojë buxhetin për kulturën dhe artin.
Kjo nuk mjafton.
Qeveria do të mundësojë me ligjet më të mira të sponsorizimit kontributin e sektorit privat në sponsorizimin e veprimtarive private, kulturore dhe artistike. Qeveria angazhohet për një bashkëpunim kombëtar. Pra, kultura është çështje e identitetit kombëtar. Qeveria angazhohet të mbështesë artistët dhe njerëzit e kulturës, të letrave, të librit, shqiptarët kudo që ndodhen.
Një transformim rrënjësor i legjislacionit në fushën e artit, kulturës dhe librit.
Ju nuk mund të imagjinoni taksat që janë të vendosura mbi librin, të cilat e largojnë me kilometra librin nga lexuesi për shkak të çmimeve të larta që imponojnë. Rikthimi i detyrueshëm për të gjitha bibliotekat publike për të pasur librat që publikohen të autorëve shqiptarë, por edhe të autorëve të huaj.
Një përpjekje e madhe do bëhet për promovimin e librit, i cili po syrgjynoset. Nuk ka asnjë mbështetje, përkundrazi ka vetëm barriera të mëdha fiskale dhe të tjera.”

Në fund të këtij prezantimi, Kryetari i Partisë Demokratike bëri dhe zotimi solemn se Teatri Kombëtar i shembur nga dora e zezë Rama-Veliaj do ndërtohet ashtu siç ishte.

“Arti skenik dhe kinemaja. Ne angazhohemi të ndërtojmë Teatrin kombëtar siç ishte, aty ku ishte.
Ne paralajmërojmë sipërmarrësin që në kundërshtim me Kushtetutën, vendimet e Gjykatës Kushtetuese, zbaton një marrëveshje të bërë me kryemafiozë. Ajo tokë është tokë e Teatrit Kombëtar. Sado kate që të ngresh ti aty, ato do bëhen të paqena sepse aty do ndërtohet teatri siç ishte. Centimetër për centimetër,
Ndaj dhe ke ndarë para me Edi Ramën apo Erion Veliajn, është puna jote.
Po truallin e teatrit nuk do ta gëzosh. Je i nderuar, në kundërshtim me ligjet e vendit dhe vendimet e Gjykatës Kushtetuese.
Qeveria angazhohet të mbështesë diversitetin kulturor të minorancave. Ato janë një pasuri kombëtare.
Do të sponsorizojë Albfilmin, filmin shqiptar dhe bashkëpunimin e tij ndërkombëtar. Ne konsiderojmë dimensionin e kulturës si ndër më kryesorët për integrimin e Shqipërisë në BE. Kultura është ID evropiane e kombit tonë ndaj dhe ne me këtë dimension do përqasemi drejt Europës me dinjitet.
Institucionet e tjera kulturore, instituti i monumenteve të kulturës, do të mbështetet fuqimisht.
Kornizat ligjore do ndryshojnë.
Pra, në një hark kohor të shkurtër ne do bëjmë gjithçka për transformimin ligjor, institucional, financiar të situatës dramatike në të cilën është kultura shqiptare.
Statusi i artistit. A e dini ju se sot ka artistë që nuk e kanë të sigurt pensionin se nuk u kanë paguar sigurimet shoqërore? Merr fund. Do ketë një status për artistin dhe shkrimtarin dhe do bëhet gjithçka që roli i tyre në shoqëri të jetë një rol i merituar,” tha Kryetari i Partisë Demokratike, Sali Berisha, duke prezantuar disa nga çështjet kryesore të Programit të PD për Kulturën duke përfunduar:

“Garantoj botën e artit dhe kulturës se qeveria e ardhshme do jetë një mbështetje e fuqishme e tyre.
Do i kthejë artit dhe kulturës, dinjitetin, shpresën dhe perspektivën.”