Programi për Shëndetësinë, Berisha: Vitin e parë, për Shëndetësinë 3% e GDP-së

Kryetari i Partisë Demokratike, Sali Berisha, duke shpalosur Programin e Qeverisjes 2025-2029 për Shëndetësinë u zotua se që në vitin e parë për Shëndetësinë do të ndahen 3 për qind e GDP-së me synimin e prerë që brenda mandatit të dalë mbi mesataren e rajonit si financim, derisa sot Rilindja e Edi Ramës që premtoi sistem shëndetësor falas, krijoi një sistem me korrupsionin dku vendos mafia ndërsa shqiptarët të paguajnë më shumë se çdo komb tjetër për shërbimin shëndetësor nga xhepi i tyre.

“Ne hapim paraqitjen e Programit të PD për katër vitet e ardhshme me Shëndetësinë, për disa arsye.
E para, nga të gjitha shërbimet, degët, është më e rëndësishmja, më e lidhura direkt me jetën, me shëndetin e qytetarëve. Dhe në këtë kontekst, nuk mund të ketë asgjë tjetër më përparësi se sa ky sistem.
Nuk mund të ketë asgjë më të rëndësishme për ne se sa ky sistem në programin tonë. Por ka dhe një arsye tjetër, të jemi realistë, dramatike. Rrokullisja e këtij sistemi në mënyrën më të pabesueshme.
Rrokullisja e këtij sistemi me shpejtësi të madhe, pushtimi i tij nga një mafie e egër, mafia më e pashpirt që ekziston, është mafia që pushton shëndetësinë. Duhet të jemi shumë të ndërgjegjshëm për këtë.
OECD ka një sistem të vlerësimit të cilësisë së arsimit, PISA, dhe në atë sistem, nga një ngjitje vertikale, sepse sistemi ynë arsimor nuk ishte cilësor, por ama me reformat e ndërmarra ne arritëm një ngjitje vertikale, të fortë. Ngjitje, e cila për hir të të vërtetës, u kthye në rënie sapo përfundoi efekti i atyre viteve.
Sapo u futën në vlerësim 8 vitet e narkodiktaturës, Shqipëria pati rënien më të madhe në botë, rënien prej 69 pikësh. Iu garantoj se po të kishte një sistem të tillë për shëndetësinë, kjo rënie do tejkalonte këtë të arsimit, por me një dallim shumë të madh.

Kjo rënie nuk do ishte thjesht një rënie në cilësi, por një rënie e shoqëruar me krime kundër njerëzimit.
Rilindja e Edi Ramës, njeriu që premtoi sistem shëndetësor falas, dhe ai ekziston, sistemi britanik, nuk është se nuk ekziston në një vend, bëri me sistemin që vendosi, me korrupsionin dhe mafien që vendosi, bëri që sot shqiptarët të paguajnë më shumë se çdo komb tjetër për shërbimin shëndetësor nga xhepi i tyre.
Dhe jo vetëm kaq, bëri që me qindra të sëmurë, dhe këtu qëndron krimi kundër njerëzimit, të vdesin jo nga sëmundjet, por nga mungesa e ilaçeve që do zgjasnin jetën e tyre, do i shpëtonin ato.
Mungesa e ilaçeve, jo se ky vend e kishte të pamundur t’i blinte, jo, absolutisht, jo se ky vend ishte në izolim të plotë dhe nuk ia shisnin, por sepse fondet për këto ilaçe vidheshin, vidheshin dhe vetëm vidheshin,” tha Sali Berisha duke i cilësuar krime kundër njerëzimit.
“Edi Rama, dje, tha se ajo që ka ndodhur në onkologjik është një krim i rëndë. Në krye të këtij krimi qëndron vetë ai, qëndrojnë ministrat e tij, që shënojnë rekordet më të zeza.
Kurrë ndonjëherë ajo ministri, as në diktaturë, nuk është drejtuar nga hajdutë dhe injorantë siç është drejtuar gjatë këtyre viteve.
Do të më falni, cilido që ka njohur Ilir Beqën, në rini dhe fëmijëri, e ka njohur si debil. Po, ua them haptas këtu dhe më vjen keq që flas në këtë mënyrë. Por një hajdut, siç do thoshte një punonjës i ndershëm i Ministrisë së Shëndetësisë, si ky hajdut, kjo ndërtesë nuk ka pasur kurrë.
Si ajo tjetra, korba e korrupsionit, u kryen kundër njerëzimit. Shqiptarët paguan nga xhepi i tyre për Covidin 1 mijë euro për person. Paguan 180 milionë euro sepse Shqipëria me dyfishin e banorëve, mbante më pak se 50 përqind të shtretërve që mbante Kosova për shtrim.”
Kështu, e shndërruan vendin në një mega-spital ku njerëzit vdisnin pa marrë ndihmën dhe fshihej krimi, tha lideri i opozitës.

“Në turpin dhe krimin më të madh të atyre mjekëve që pranonin fshehjen e krimit. E paimagjinueshme, por doli një ditë një mjek me ndërgjegje dhe dha shifrat. Dhe shifrat e vdekjes nga Covid-i ishin 4-5 herë më të larta se ato që jepte Ministria e Shëndetësisë.
Dhe bashkëpunëtorë në krim si ajo që u bë matrapaze mandatesh, etj.” tha Berisha dhe ndonëse sot Shëndetësia është rrokullisur më keq se në vitet ’60, në vend që të denoncohen krimet, i fshehin ato.

“U ndala në këto raste vetëm për të theksuar se në ç’shkallë të pabesueshme degradoi sistemi ynë.
Nuk mohoj kurrë lumenjtë e djersëve të mjekëve dhe infermierëve të ndershëm.
Por nëse ka ndonjë sistem ku u kryen krime kundër njerëzimit, është sistemi shëndetësor, është spitali onkologjik.
Në qoftë se ti lë 600 gra pa radioterapinë, e domosdoshme për sëmundjen e tyre, ti i përcjell ato, ti i lë në kthetra ato.
Në qoftë se ti mjek harron se kolegu yt dha dorëheqjen dhe u largua për shkak të kësaj situate, ke një problem shumë serioz që pajtohesh me këtë.
E kam pyetur vetën disa herë, çfarë ndodh, me Thedhonin, me Tritanin, me Edmondin, me Nestorin, etj, ne kemi kaluar dekada si mjekë në diktaturë, por kurrë nuk na kanë ardhur të na thonë mos u thuaj ilaçeve se mungon ky ilaç apo ai ilaç. Nuk shkonte. Edhe ai ministër, që e kishim edhe si mik, ai edhe mund të na e thoshte. Por nuk ndodhte ajo. Kurse këtu, në vend që t’i denoncojnë dhe të qëndrojnë në anën e të sëmurit, siç kanë qëndruar, fshehën këto krime,” tha kryedemokratik pa dashur të ndalet gjatë këtu sepse, siç tha, edhe ata vetë janë dëshmitarë se sa mijëra mjekë e infermierë braktisën sistemin, ikën në Gjermani dhe vende të tjera.
“Sot, po të marrësh numrin e mjekëve për frymë, ne kemi zbritur ka rrezik në vitet ’60.
Sot, vdekshmëria foshnjore në Shqipëri është tre herë më e lartë se në Mal të Zi.
Sot kemi 2.5 herë mjekë dhe infermierë më pak për frymë për 1 mijë banorë.
Pra, ne kemi bërë një rrokullisje.
Sot ne shpenzojmë 5 herë më shumë nga xhepi se sa gjermani, francezi apo italiani për kujdesin shëndetësor. Rimbursimi 50 përqind, ndër më të ulëtit,” tha Berisha duke folur për një shpartallim të vërtetë:
“Ndërtohet spitali, digjet sapo ndërtohet. Askush nuk mban përgjegjësi. Në vend që të plotësojmë të sëmurët me ilaçe, do ndërtojmë hotel tek spitalet, se në hotel vjedh, në ilaçe e ke më të vështirë. Kanë gjetur edhe aty tek ilaçet skemën 5D. Po nuk është vetëm onkologjiku, janë edhe të tjerat,” tha Kryetari i Partisë Demokratike duke zotuar për 3 për qind të GDP-së për Shëndetësinë dhe krijimin e sigurimeve private për të nxitur garën.

“Nuk është kohë të ndalemi tani, koha është çfarë do bëjmë.
Ne do angazhohemi që në 100 ditët e para, në një reformim transformues të sistemit shëndetësor.
Ne kemi besim tek kapacitetet tona njerëzore.
Por, dy faktorë e shkatërruan sistemin. Korrupsioni dhe keqfinancimi, keqmenaxhimi.
Korrupsioni nga njëra anë, vidh si Tenargija në fushëbetejën e Vaterlosë.
Dhe keqfinancimi, dhe ato që financon, mbi 300 milionë i morën me PPP-të e famshme të Edi Ramës.
Ilir Beqaj u shpall kryetar i organizatës kriminale. Nuk është Ilir Beqaj kryetar, kryetar është Edi Rama.
Ne jemi mjekë dhe nuk mund të harrojmë kurrë xhiron e tij nga ekrani në ekran me një gërshërë me një krah dhe me një pincë të thyer, ja me se operoheshin njerëzit.
Për të mbuluar PPP-të e tij, me të cilat rriste çmimin 83 herë për sterilizimin. Me të cilat ndante dhjetëra milionë me Vilma Nushin me check-upin, që përjashton pensionistët. Po në qoftë se do të vendosësh një sistem kontrolli me standarde, vendosua pensionistëve atë. Ata përjashtohen sepse do futen emra që nuk janë dhe do vidhen gjysma e fondeve.
Pra e shkatërroi korrupsioni. E shkatërruan PPP-të. U lëshuan si lukuni mbi fondet e përcaktuara për të sëmurët.
Dy vampirë, Vilma Nushi dhe Tom Doshi fitojnë mijëra tendera.
Shkatërruan standardin e ilaçeve. Është e vërtetë që këtu qarkullojnë absolutisht ilaçe jashtë standardit. Dhe çfarë ndodh? Kush ka njerëz jashtë, ose ia dërgojnë ata, ose dërgon paratë për t’i blerë atje.
Aspekte dramatike.
Sot, po u sëmure më apendesit në Gjirokastër, duhet të vish të operohesh në Tiranë.
Këto janë realitete. Nuk ka më pediatër, gjinekolog. Nuk ka as kirurg tani. Imagjino Gjirokastra të sjellë apandesitin në Tiranë,” tha Berisha duke konstatuar se Sistemi i Shëndetësisë ka nevojë për një ndërhyrje urgjente.
“Dhe ky program do hartohet nga ju. Do jeni ju që do të hartoni programin, të cilin ne e kemi projekt, por pas diskutimeve, ai do shndërrohet në program të qeverisë.
Ministria e Shëndetësisë duhet të riorganizohet tërësisht.
Është e domosdoshme një riorganizim i plotë i atij institucioni. Nuk ka pse të ketë ajo sektorë të tjerë, por të bëjë gjithçka me njerëz të zotë për rikthimin e këtij sistemi në standardet tashmë të OBSH-së, të BE, të rajonit.
Sot, 2.1 përqind e GDP-së shkon për shëndetësinë. Do rritet që vitin e parë në 3 përqind, me synimin e prerë që brenda mandatit të dalë mbi mesataren e rajonit si financim.
Ka një institut të sigurimeve shëndetësore. Do i jepet pavarësi nga parlamenti. Do funksionojë si institucion i pavarur.
Por, ligji që 3 muajt e parë do parashikojë krijimin e sigurimeve private, për qëllimin e vetëm për të nxitur garën. Nuk rrihet me monopol. Se ky monopol krijon shumë probleme dhe e nxjerr jashtë kontrolli.”

Me këtë rast, ai bëri të ditur se Onkologjiku do të shkëputet nga QSUT dhe do të krijohet Instituti i Tumoreve me buxhet të pavarur

“Një problem serioz sot është marrëdhënia e sektorit publik me sektorin privat. Nuk jemi ne kundër sektorit privat, por në mënyrë absolute do presim me gërshërët e ligjit të gjitha marrëdhëniet korruptive midis sektorit publik dhe sektorit privat.
Në qoftë se unë e diagnostikoj të sëmurin dhe i them do të mjekoj në privat, kjo nuk do ndodhë kurrë.
Sektori privat do klasifikohet non-profit dhe profit, sektori publik do mbajë lidhje me sektorin privat non-profit.
Ata që janë non-profit dhe do jenë në marrëdhënie me sektorin publik, ata do ndjekin rregullat e këtyre marrëdhënieve. Shteti është i gatshëm të trajtojë atë sektor me përparësi,” tha Berisha duke siguruar se nuk do të bëhet shteti kurrë zhvendosës i fondeve të të sëmurëve në spitale private, të cilat janë edhe jashtë standardit, të themi atë që është.
“Sot ne jemi i vetmi vend në Europë pa kartelën dixhitale. Ishte e gatshme, ishte absolutisht e gatshme.
Mjekët vazhdojnë dhe shkruajnë siç shkruajmë ne në kohën tonë. Jo, do dixhitalizohet sistemi i tëri.
Kartela do dixhitalizohet. Protokollet dhe kostoja e tyre do të jenë baza e praktikës në klinika dhe spitale.
Onkologjiku do të shkëputet nga QSUT sepse është konstatuar se QSUT i ka vjedhur dhe shkatërruar të sëmurët. Ajo drejtori famëzezë ka bërë tendera të përsëritura pa sjellë asnjë ilaç. Askush nuk ka punë më të vështirë se mjekët e onkologjikut, por ama heshtja e tyre nuk mund të pranohet. Po pse duhet të heshtin ata para hajdutëve drejtorë dhe ministra. Dhe kanë heshtur,” tha Berisha duke mos përjashtuar edhe ata që nuk kanë heshtur, kanë ikur dhe e kanë nderuar bluzën e bardhë.
“Ndaj do krijohet Instituti i Tumoreve. Ky institut do ketë buxhetin e vet dhe i garantoj shqiptarët se sado që të kushtojnë ilaçet e tyre, të cilat përdoren në BE, do përdoren në Shqipëri.
Unë e di se këto ilaçe janë shumë të kushtueshme, por e di se ky shtet ka çdo mundësi për t’i blerë ato.
T’u them një gjë, por për kohën që kam qenë kryeministër, nuk më ka ardhur kurrë një lajm se aty mungojnë ilaçet. Mund të ketë ardhur njëherë nga hematologjia dhe e blemë. Kushtonte jashtë mase. Nuk mundet shteti që të mos blejë ilaçet që janë të domosdoshme.
Sepse këta qeveritarë, duke e ndjekur me shumë shqetësim, kam konstatuar se kanë pasur një qëndrim shumë kriminal, në sensin që zëdhënësit e tyre në studiot televizive deklaronin se ata të dënuar janë. Në një kohë kur ata, sot shërohen, ata janë heronjtë më të vërtetë, njerëzit më heroikë me betejën që bëjnë me sëmundjen. Të tjerët e kanë jetëgjatësinë 2 ose 2 herë e gjysmë më të madhe se në Shqipëri. Kështu që kjo praktikë përmbyset,” tha Kryetari i Partisë Demokratike duke u zotuar për dyfishimin e rrogave për mjekët dhe infermierët, rritejen e numrit të ilaçeve të rimbursuara dhe cilësinë e tyre.

“Riorganizim tërësor i shërbimit parësor, baza e sistemit.
E shpartalluan. Qenë hedhur baza shumë të shëndosha në bashkëpunim me BB dhe OBSH.
E zbërthyen.
Sistemi i urgjencës funksionon brenda unazës së vogël të Tiranës. Funksionon si një repart politik, paçka se ka mjekë dhe infermierë që djersitin gjithë ditën. Por e përdor politika në mënyrë të pamëshirë.
Marrin fund këto.
Ne synojmë të kapim standardet e OBSH për vende si ne.
Synojmë të ecim drejt standardeve më të mira të BE. Nuk do futen në Shqipëri ilaçe që nuk kanë certifikantën e institucioneve më prestigjioze ndërkombëtare evropiane dhe amerikane për përdorimin e tyre dhe që nuk shiten më parë se të hyjnë në Shqipëri në të paktën dy vende anëtare të BE.
Po pse do mbledhim ne ilaçe jashtë standardeve? Ne nuk kemi laboratorë që të vërtetojmë.
Atëherë ka një mënyrë. E patëm ligjin, e ndryshoi Edi Rama pasi Vilma Nushi donte të fuste patjetër Profarmën serbe se ishte përfaqësuese e tyre. Ligji ynë nuk i lejonte të futeshin në tregun tonë. Kjo është e vërteta. Një nga aktët e para, modifikuan ligjin.
Merr fund kjo!
Shqiptarët në farmaci do marrin ato ilaçe që blejnë qytetarët europianë në farmacitë e tyre dhe shteti do dyfishojë numrin e barnave që subvencionon, që rimburson.
Rimbursimi nga 50 do shkojë drejt 90 përqind. Do kapë standardet.,” tha Kryetari i Partisë Demokratike, Sali Berisha, duke përfunduar:
“Pra, kemi folur për paketa emergjente. Kemi deklaruar se çështja e pensioneve dhe rrogave të ulëta është emergjencë.
Deklarojmë sot para shqiptarëve se çështja e shëndetësisë është emergjencë.
Rrogat, pa diskutim që do të rriten.
Në mandatet që kishim më parë ne mbidyfishuam rrogat e mjekëve dhe infermierëve.
Tani ne do bëjmë që mjekët në Shqipëri të paguhen më mirë se mjekët e tjerë.
Çfarë bëri Hungaria në epideminë e Covid-it? Vuri rroga gjermane për mjekët sepse mjekët po vraponin drejt Gjermanisë.
Apo do bëjmë ligje që punoni 3 vjet apo 5 vjet. Marrëzira.
Rritim rrogat, krijojmë kushtet dhe shumica nuk kanë asnjë tendencë të largohen, por të shërbejnë në vendin e tyre.
Ndaj dhe ne do shkojmë drejt dyfishimit të rrogave të mjekëve dhe infermierëve dhe rritjes gjersa ata të marrin më shumë se mjekët dhe infermierët në rajon dhe të afrohen me standardin e BE.
Unë u ndala në disa elementë, por kjo reformë do marrë formën përfundimtare vetëm nga mendimet tuaja, propozimet tuaja, sugjerimet tuaja.
Gjendjen aktuale të sistemit shëndetësor ne e konsiderojmë emergjencë.
Është sistem në të cilin janë kryer krime kundër njerëzimit duke lënë së sëmurë në kthetrat e fatit, jo për shkak të sëmundjes, por për shkak të ilaçeve.
Merr fund kjo!”