Projektet e Alabbar u refuzuan nga Zagrebi në Beograd, Rama: Çfarë s’po na dëgjojnë veshët!

Kryeministri Edi Rama edhe sot vazhdoi akuzat kundër opozitës pse baltoset investitori i madh i turizmit nga Emiratet e Bashkuara, kur nga kjo qeveri nuk kërkohet asgjë më shumë se transparencë e projektit, aq më shumë duke pasur parasysh përvojën me pronarin e këtij projekti, Muhammed Alabbar në Zagreb ku qytetarët e refuzuan me protesta ndërsa në Beograd, Aleksandar Vuçiçit iu deshtën 4 vjet deri sa u bë President për ta firmosur marrëveshjen sepse serbët nuk i bindi dot!

Në këtë hall të madh si Vuçiç edhe pse i ka tashmë në dorë të gjitha pushtetet, Edi Rama u zgjua sot për të na treguar se injorante dhe e ligë është opozita shqiptare që nuk pranon shkatërrimin e Portit të Durrësit.

“Në një harmoni fatale të injorancës me ligësinë, motivuar prej urrejtjes politike si mishërim i mallkimit që e përndjek këtë vend në rrugën e shtetbërjes qysh prej 1912, ka plasur e dalë rrugëve një llum i pashoq akuzash mbi gjysmë të vërteta që janë edhe gënjeshtrat më të mëdha,” shprehet Kryeministri Edi Rama përmes rrjetit social Twitter duke u munduar të bindur shqiptarët se investimi më i madh i huaj në rajon,që do të transformojë Durrësin e Shqipërinë dhe do impaktojë drejtpërdrejt ekonominë kombëtare, trajtohet si aferë katundi për pula,ndërsa kontrata më gjatë e negociuar e shtetit shqiptar me një palë tjetër, lexohet si defter hallvaxhinjsh!

Por në këtë tërbim përmes rrjetit social Twitter, Edi Rama ka edhe të drejtë kur thotë se si mund të akuzohen investitorët e këtij kalibri me pazarllëqet e nivelit të Gërdecit. Jo, nuk akuzohen, se ato pazare me gjithë porjektin nuk e kalonin 900 milionë dollarëshin, shifër kjo që ka kohë që nuk lakohet, e në rastin në fjalë i kalon 3 Gërdeca me pazar, me Lul e Kunat, Taulant e Ols nëse merren së bashku, siç akuzon opozita.

Por Kryeministri, që në mëngjes e pyet veten de nuk u beson syve:

“Mirë vetes i thua duro si ke duruar se të dinë si veten e s’ke ç’u bën, po sekëlldi e madhe t’u shpjegosh të huajve se si mund të kulmojnë kaq lart injoranca me ligësinë dhe si mund të akuzohen investitorë të kalibrit të Muhammed Alabbarit për pazarllëqe të nivelit të Gërdecit!”

Gjithë këto vëlime me mëngjes por transparencë asgjëkundi! Ama Kryeministri ynë pengdashës, bënë atë që dinë më së miri të bëjë dhe pret të enjten e tij të shenjtë, për të shitur demagogji në Parlament:

 Në fund, për të ndihmuar Kryeministrin Edi Rama që të mos e haj meraku i madh se si t’u shpjegojë partnerëve ndërkombëtarëve se “si mund të akuzohen investitorë të kalibrit të Muhammed Alabbarit” mund ti kërkoj cilido opozitari në Beograd, historikun se si e përndjeki Aleksandar Vuçiçin firmosja e marrëveshjes nga koha kur ishte Zv/Kryeministër dhe nuk e realizoi dot, u bë Kryeministër dhe dështoi, dhe pasi u bë president dhe mori të gjitha pushtet arriti të projektin “Beogradi në ujë” dhe sot vijon të shtyj afatet sepse premtimet e këtij investitori të madh vazhdojnë të ngelen në letër.

Për ata që i besojnë të vërtetës dhe jo twitteve të Kryeministrit, projekti në Beograd u ideua në vitin 2012, u firmos kontrata në prillin e vitit 2015, për shkak të presionit politik e qytetar u publikua në shtatorin e vitit 2015 kur dhe filluan punimet zyrtarisht, asgjë nga premtimi nuk përfundoi në vitin 2019, u fajësua pandemia dhe u shty edhe në vitin 2020, dhe kur e vizitoi Kullën Beograd në 22 Korrik 2022, ku vazhdojnë punimet, vetë Vuçiç u shpreh ndërsa po qëndronte në një kullë që duhet të përfundonte në vitin 2019:

“Edhe pse shumica e kundërshtonin dhe gënjenin për Beogradin në ujë, sot këtë projekt e mbështesin 75 për qind të qytetarëve,” tha Vuçiç i cili as vetë sot nuk e beson, sepse tashmë i duhet të importojë punëtorë ndonëse në Kullë punojnë 2.500 vetë dhe shtoi:

“Kur këtë e kam thënë në vitin 2015-2016, të gjithë qeshnin me mua, dhe sot kemi kontrata me qeveritë e shteteve tjera që të importojmë punëtorë dhe tu japim leje të përhershme,” tha Presidenti i Serbisë duke shtuar se kjo është dhe arsyeja pse është i rëndësishëm Ballkani i Hapur.

Pra, një hall tjetër që “vëllau” i Edi Ramës e ka edhe pse ka kontratë me investitorin më të madh në Tiranë, Durrës dhe gjithë Shqipërinë, Muhammed Alabbar!

Çfarë s’po na dëgjojnë veshët! Thotë, sot, Kryeministri Edi Rama kur dëgjon rrugëtimin e biznesit të Alabbarit në Zagreb dhe Beograd, që rrëfehet nga goja e shqiptarëve; Rrëfime, që dita ditës, janë shumë më bindëse dhe ndihmohen nga marrëzitë që publikohen në emër të hakerëve iranianë si dhe fjalët që dalin nga goja e Kryeministrit, dhe, sa herë që e shohin Edi Ramën të enjteve të zeza në parlament, u kujtohet Ali Asllani dhe hakërrehen:

“Ç’na pa syri, ç’na pa syri!… Hunda juaj ku nuk hyri:
te i miri, te i ligu, te spiuni më i ndyri!”