Projekti për turizmin i BB, disbursohen 42 milionë USD, ja pikat ku ndërhyhet
Ecuria e zbatimit të projektit të turizmit që mbështetet nga Banka Botërore me një kredi 71 milionë dollarë është vlerësuar si e kënaqshme në mënyrë të moderuar teksa janë disbursuar 42 milionë dollarë.
Vlerësimi i fundit i Bankës për Programin për Zhvillim të Integruar Urban dhe Turizmin që prek katër bashki Sarandë, Gjirokastër, Berat dhe Përmet nxjerr në pah edhe investimet konkrete që janë kryer si dhe ato që janë ende në proces. Kështu në përmbledhjen e grupit të vlerësimit për projektin analiza bëhet sipas tre komponentëve dhe ecurisë që ka secili prej tyre.
“Komponenti 1. Punimet civile të rrugës me kalldrëm të këmbësoreve dhe aksesit të makinave Kalaja e Beratit dhe shëtitores dhe shkalleve të Sarandës, përmirësimi i integruar urban dhe i ndriçimit në Përmet, rruga me kalldrëm e Pazarit të Gjirokastrës, Sistemi i Muzeve dhe punime rehabilitimi në kalanë Gjirokastër kanë përfunduar; Punimet civile të përmirësimit të integruar urban në Berat, Sarandë dhe Gjirokastër janë duke u zbatuar.
Komponenti 2. Punimet për përmirësimin e zonave turistike të Bënjës dhe pikave panoramike përgjatë korridorit turistik janë në vazhdim; dizajni për përmirësimin e zonës turistike të Zvërnecit është finalizuar dhe janë kontraktuar punimet civile; konsulenca e projektimit për sitet turistike të Kalasë së Gjirokastrës si dhe Kalasë së Borshit, Kalasë së Kaninës dhe Shpellës së Spillesë janë në zbatim.
Komponenti 3. Konsulenca për Strategjinë e Kërkimit dhe Zhvillimit të Tregut ka përfunduar. Shërbimet e konsulencës për partneritetin e menaxhimit të destinacionit, Zhvillimin e Tregut për Jugun e Shqipërisë, Zhvillimin e Produkteve Turistike dhe Sistemi i Statistikave të Turizmit janë aktualisht në zbatim” thuhet në përmbledhjen e Bankës Botërore.
Projekti për turizmin nisi në vitin 2016 me një financim 71 milionë dollarë dhe u bë efektiv në vitin 2017. Fillimisht data e parë e mbylljes ishte 31 korriku 2022 por më pas u shty për 31 korrik 2025 dhe Banka miratoi një transh të dytë me vlerë 34.6 milionë dollarë për të njëjtin projekt. Aktualisht për projektin e parë janë disbursuar 60 për qind të fondeve teksa për të dytin që u bë efektiv në dhjetor 2022 ende nuk ka nisur disbursimi duke shënuar një vlerë prej vetëm 0.2% të disbursuar./Monitor/
