Projekti “Unaza e Madhe/ Gjiknuri: Anulohet tenderi me DH Albania, ka falsifikuar dokumentet

Anulohet tenderi për njërin lot të projektit Unaza e Madhe.

Këtë e bëri të ditur ministri Damian Gjiknuri duke shtuar se nuk rezulton të jetë shkarkuar dëm financiar dhe se qëndrimi i institucionit është në përputhje të plotë me ligjin.

“Ne po menaxhojmë situatën, në fund të fundit ngjarjet ndodhin. Ne po reagojmë ndaj paligjshmërisë, para 1 viti nisën hetimet për falsifikimet e dokumenteve të DH Albania, do t’ia çojmë dosjen prokurorisë edhe në SHBA.”- tha ministri.

“Kam komunikuar për të marrë përgjigje për këtë ccështje, nga përgjigjet e ardhura dje, se një pjesë e paraqitur nga DH nuk është e saktë, por e falsifikuar. Pas marrjes së këtij konfirmimi, ARRSH ka zgjidhur kontratën. Sot që flasim ARRSH ka bërë ndërprerjen e kontratës”, tha ai.

Sipas ministrit, falsifikimi i dokumenteve ka ndodhur jashtë Shqipërisë.

Projekti do të vijojë, ka theksuar ministri, sepse në dy lotet e tjera vijon puna.

“Shumë shpejt do të ketë përfunduar në kohë. Për lotin që anuluam kontratën, menjëherë do të shpallet një tender publik, për të qenë në rregull me ligjin”- tha ai.

Duke ju referuar protestës së banorëve në zonën e Astirit, ministri tha ‘mos u politizoni nga problematika e disa personave që po trajtohen sipas ligjit.’

Drejtori i ARRSH, Afrim Qendro, në një deklaratë të mëparshme, ka thënë: “Ideja paraprake për Unazën e Madhe daton që përpara viteve ’90. Gjatësia e Unazës shkon në 27 kilometra në total për gjithë projektin. Aktualisht janë të përfunduara segmentet nga Fusha e Helikopterëve në Farkë deri tek Shkolla Teknologjike që njihet si zona e pallatit me shigjeta. Janë në ndërtim 5 lote: konkretisht 2 lote në segmentin Fusha e Helikopterëve (Farkë) deri në Shkozë- Materniteti i Ri dhe 3 lote rikualifikimi nga Shkolla Teknologjike deri te Sheshi Shqiponja.

Ky është një projekt shumë i rëndësishëm dhe për 100 vitet e ardhshme të këtij qyteti. Ne kemi të standardizuar këtë projekt dhe të uniformizuar në të gjithë gjatësinë e tij. Pra, nga Shkoza deri tek Sheshi Shqiponja do të jetë një projekt i kategorisë A Urbane, me tre korsi kalimi (dy korsi x 3.75m, një korsi emergjence 3 m). Ndarje e mesit të senseve të kalimit dhe të gjithë elementët urbanë pasi kemi të bëjmë me një rrugë që qarkon qytetin e Tiranës. Do të ketë ndriçim, gjelbërim, korsi biçikletash dhe të gjithë elementet që duhen për këtë projekt madhor.”