Projektligji, Kurti: Duhet të dihen burimet e financimit të partive politike!
Duke e konsideruar të nevojshëm miratimin e Projektligjit për financimin e partive politike, sot Kryeministri i Kosovës, Albin Kurti, në diskutimin publik, lidhur me këtë projektligj tha se duhet të dihen saktë burimet e financimit të partive politike dhe rezultatet e zgjedhjeve dhe qeverisja nuk duhet të jenë produkt i korporatave, pasi ato investojnë në parti, për t’iu kthyer të hyrat më pastaj përmes tenderëve.
Ndonëse ftesës së tij nuk i janë përgjigjur pozitivisht partitë opozitare, Kurti kërkoi konsensus ndërpartiak për t’i shtyrë përpara ndryshimet e nevojshme.
“Paratë në fushata zgjedhore, por edhe parti politike ndërmjet fushatave, të cilave nuk iu dihet burimi dhe as shuma paraqesin elemente të korrupsionit dhe ndikojnë në elektorat, kësisoj edhe demokracinë tonë. Kur një korporatë jep milionat për një politikan, nuk i jep ato sepse ka simpati për politikanin, apo politikanen. Por dëshiron që nesër, ajo apo ai të jetë në pushtet, të fitojë shumëfishin e këtij investimi përmes tenderëve dhe licencave shtetërore. Pra për korporatat paratë përmbi partitë politike, apo një politikan janë investim që pret edhe kthim edhe fitim. Ne shpresojmë që në këto parime të kemi konsensus ndërpartiak pasi është për të mirën e përgjithshme, pasi nuk mund të lejojmë qe rezultatet e zgjedhjeve, pastaj edhe qeverisja të përcaktohen nga korporatat. Duke pasur parasysh këto, ne e kemi pa të domosdoshme diskutimin publik për të arritur pajtueshmërinë e partive politike, ashtu që ky projektligj të miratohet në dritë të një procesi të mirëfilltë demokratik,” tha Kurti duke shtuar se ndarja e parave për partitë politike duhet të bëhet në bazën e disa parimeve.
“Ndarja e parave, alokimi i mjeteve është i rëndësishëm në kuptim të funksionimit të partive politike, por kjo duhet bërë në bazën e një kornize të qartë ligjore në të cilën duhet t’i kemi këto parime. Balancë e arsyeshme ndërmjet financimit publik dhe privat, kritere të drejta në lidhje me shpërndarjen e kontributeve ndaj partive politike. Rregulla strikte lidhur me donacionet, vendosje e kufirit të shpenzimeve të ndërlidhura me fushata zgjedhore, transparencë e plotë të llogarive bankare dhe përcaktim i pavarur i auditimit dhe sanksioneve dhe kandidatëve që i shkelin rregullat.”
Pjesë e këtij diskutimi publik, përmes një video-lidhje ishte dhe shefi i zyrës së BE-së në Kosovë, Tomas Szunyog, i cili kërkoi një reformë urgjente në financimin e partive politike.
“Financimi i partive politike është i rëndësisë së veçantë për funksionimin e mirëfilltë të demokracisë dhe sundimit të ligjit. Financimi i partive politike është një fushë e cila duhet të ketë një reformë urgjente dhe gjithëpërfshirëse për të rritur transparencën dhe llogaridhënien në mënyrë që financat e partive politike të jenë më të qarta”, tha Ambasadori Szunyog.
Ndryshimet në këtë projektligj i konsideroi të nevojshme edhe përfaqësuesja e përhershme e UNDP-së në Kosovë, Maria Suokko ndërsao kontribut në këtë debat publik dhanë edhe pjesëtarët e shoqërisë civile.
