Prokurorët dhe gjyqtarët e korruptuar, kreu i SPAK: Do të marrin dënimin e merituar!

Duke evidentuar çdo ditë gjyqtarë dhe prokurorë që përfshihen në veprimtari që shkelin ligjin, kreu i SPAK, Arben Kraja, gjatë fjalës së tij në konferencën me titull “Sfida dhe lufta ndaj korrupsionit”, tha se koha e pandëshkueshmërisë ka marrë fund ndërsa paralajmëroi se do të ketë shumë shpejt arrestime të reja.

“Kemi objektiv vendosjen e kontakteve me BE. Është e rëndësishme. Jemi në proces bashkëpunimi me BE. Ajo që kemi konstatuar ka të bëjë me faktin e pandëshkueshmërisë. Kjo ka ardhur nga mosfunkionimi i sistemit, prokurori, gjykatë që s’ka dhënë atë që duhet të jepte, dënimin e personave që shkelin ligjin. Po shohim çdo ditë gjyqtarë dhe prokurorë që përfshihen në veprimtari që shkelin ligjin. Në këtë sens, është një mekanizëm që duhet të funksionojë si një i tërë. Ndëshkueshmëria e atyre që s’kanë ushtruar detyrën duhet të jetë një vijë ndarëse.

Ose duhet të jemi të gjithë bashkë, ose ata që dalin kundër duhet të marrin përgjegjësitë për atë që bëjnë. Këtë vit kemi pasur në disa raste, edhe dënime për pastrim të produkteve të veprave penale, përfshirë dhe konfiskimet. Mendoj që është risi dhe përparësi që kemi vendosur.”

Në fund, kreu i SPAK tha se janë të vendosur për të ndaluar çdo pasuri kriminale, sepse është e paligjshme ta administrojnë dhe duhet të jetë e dënueshme ndërsa sqaroi se bëhet fjalë për politikanë:

“Kërkohet produkt më shumë në evidentimin e shkeljeve të fondeve publike. Bëhet fjalë për politikanë. Kjo është një përparësi e jona, e cila po vlerësohet çdo ditë dhe shpejt do të kemi rezultate konkrete që do i bëjmë publike. Ne kemi vullnetin e mirë për të punuar dhe vepruar. Ajo që dua të them është që kjo që po bëjmë është në të mirën e vendit, sepse duhet të ikë imazhi i keq, në kuptimin që te ne janë institucionet e korruptuara.”