Prokurorët e rinj të SPAK betohen para Presidentit

Sot në Presidencë u zhvillua ceremonia e betimit të tre anëtarëve të rinj të Prokurorisë së Posaçme kundër Korrupsionit dhe Krimit të Organizuar, SPAK.

“Betohem solemnisht se gjatë kryerjes së detyrës do t’i qëndroj kurdoherë besnik Kushtetutës së Republikës të Shqipërisë, ligjeve në fuqi dhe do të respektoj rregullat e etikës profesionale!” ishte betimi solemn me dorën mbi Kushtetutën e Shqipërisë, i prokurorë të rinj të SPAK-ut, Sotir Kllapi, Vladimir Mara dhe Dritan Prençi ndërsa Presidenti i Republikës teksa i uroi suksese dhe punë të mbarë, u kërkoi të nisin menjëherë nga puna dhe të zhvillojnë hetime të pavarura, ashtu siç duhet të funksionojnë të gjitha institucionet qeverisëse të sistemit të drejtësisë.

Me këtë rast, Presidenti i Republikës apeloi tek të gjithë përfaqësuesit e sistemit të drejtësisë që të përmbushin detyrën e tyre në mënyrë efikase, profesionale dhe të pandikuar nga çdo ndërhyrje e brendshme apo e huaj, si dhe t’i qëndrojnë përherë besnik vetëm Kushtetutës dhe ligjeve në respekt të saj.