Prokurorët rusë kërkojnë që Meta të emërohet “organizatë ekstremiste”

Prokurorët i kanë kërkuar një gjykate ruse që të kategorizojë organizatën amë të Facebookut, Meta Platforms, si një “organizatë ekstremiste”, raportoi sot Agjencia e lajmeve Interfax.

Më herët, Kremlini ka thënë se Rusia do t’i japë fund aktiviteteve të kompanisë Meta nëse janë të vërteta raportet se përdoruesve të Facebook-ut do t’i lejohet të bëjnë thirrje për dhunë kundër rusëve.

Ata i janë referuar një raporti nga Reuters më 10 mars që thoshte se Meta do të lejojë përdoruesit e Facebook-ut dhe Instagram-it në disa vende të bëjnë thirrje për dhunë kundër rusëve dhe ushtarëve rusë pasi Moska pushtoi Ukrainën.

Zëdhënësi i Kremlinit, Dmitry Peskov, u tha sot gazetarëve se Moska do të marrë masat vendimtare nëse raporti është i vërtetë.

“Ne nuk duam të besojmë raportin e Reuters – është shumë e vështirë të besohet,” tha ai.

“Shpresojmë që të mos jetë e vërtetë sepse nëse është e vërtetë do të thotë se do të duhet të merren masat më vendimtare për t’i dhënë fund aktiviteteve të kësaj kompanie”, tha Peskov.

Një zëdhënës i Metës në orët e vona të 10 marsit citoi shprehjen “vdekje pushtuesve rusë” për të ilustruar një përjashtim për deklaratat që normalisht do të kishin shkelur udhëzimet e përdorimit të këtyre rrjeteve sociale.

“Ne ende nuk do të lejojmë thirrje për dhunë kundër civilëve rusë”, shkroi zëdhënësi në Tëitter.

Më herët, më 11 mars, Ambasada ruse në Shtetet e Bashkuara i kërkoi Uashingtonit të ndalonte “aktivitetet ekstremiste” të kompanisë Meta.

“Politika agresive dhe kriminale e Metës që çon në nxitjen e urrejtjes dhe armiqësisë ndaj rusëve është e egër”, thuhet në një deklaratë të Ambasadës.

Rusia ka nisur pushtimin e Ukrainës më 24 shkurt. Nisja e luftës në Ukrainë u përcoll me sanksione të shumt të vendeve perëndimore ndaj Rusisë./RFE/