Prokuroria e Bosnjes lëshon urdhër për ndalimin e Dodikut

Presidenti i entitetit të Republikës Srpska, RS, Milorad Dodik, tha në Banja Lukë se një diskurs kundër RS-së ka filluar nga Sarajeva.

Këto deklarata ai i bëri pasi Prokuroria e Bosnje Hercegovinës lëshoi një urdhër për ndalimin e tij, me qëllim që ta marrë në pyetje.

Urdhër të tillë Prokuroria ka lëshuar edhe ndaj Kryeministrit Radovan Vishkoviç dhe Kryetarit të Parlamentit të këtij entiteti, Nenad Stevandiç. Ata akuzohen se kanë kryer veprën penale të sulmit ndaj rendit kushtetues.

Milorad Dodik përsëriti qëndrimin e tij se ai nuk do t’i përgjigjet thirrjes të Prokurorisë për t’u marrë në pyetje.

“Ne nuk do të përgjigjemi, le të shohim se çfarë do të bëjnë ata,” tha ai gjatë konferencës ku folën edhe Vishkoviç dhe Stevandiç.

Ligji për procedurën penale i Bosnje Hercegovinës parashikon mundësinë e lëshimit të urdhrit për sjellje të detyruar për dhënien e dëshmisë, në rast se personi i thirrur në institucionet gjyqësore refuzon ta bëjë këtë.

Kur u pyet çfarë do të ndodhte nëse lëshohet një urdhër për arrestimin e tij, ai nuk dha një përgjigje specifike, por akuzoi gazetarët se nuk i dinë procedurat.

Dodik u pyet nëse EUFOR do të përfshihet në këtë proces dhe ai u përgjigj se kjo ishte pyetje idiote pasi EUFOR-i nuk ka mandat për një gjë të tillë.

Gjatë bisedës me gazetarë, Milorad Dodik po ashtu njoftoi se shumë shpejt do të zhvillojë një takim të nivelit të lartë në Rusi, ku do të kërkojë nga Moska që të vendosë veto ndaj pranisë së EUFOR-it në Bosnje.

Ai tha se nuk ka nevojë për shqetësim, duke thënë se është një goditje që jam i gatshëm ta përballoj për RS-në.

“Kjo është një çështje e pavlerë, e motivuar politikisht, sepse nuk ka asnjë ligj që përcakton si krime veprat për të cilat po akuzohemi. Ne nuk do të marrim pjesë në këtë. Nëse dikush mendon se jemi frikacakë, e ka shumë gabim. Mesazhi im është vetëm të mos e teproni, përndryshe do të ndiqeni penalisht,” tha Milorad Dodik.

Prokuroria ka lëshuar urdhrin për arrestim ndaj Policisë Gjyqësore të Gjykatës së Bosnje Hercegovinës, duke kërkuar ndihmën e Agjencisë Shtetërore për Hetim dhe Mbrojtje, SIPA.

“Unë nuk do të rekomandoja që SIPA të veprojë dhe besoj se nuk do ta bëjë. Gjithashtu, kam besim te policia e RS-së”, tha ai.

Ai gjithashtu deklaroi se RS mbetet e përkushtuar ndaj ligjeve të miratuara së voni, edhe pse ato janë shpallur antikushtetuese, dhe të cilat ndalojnë punën e Gjykatës dhe Prokurorisë së Bosnje dhe Hercegovinës në territorin e këtij entiteti.

Duke iu drejtuar gazetarëve në Banjallukë, Stevandiç dhe Vishkoviç gjithashtu deklaruan se nuk kanë ndërmend t’i përgjigjen Prokurorisë së Bosnje Hercegovinës.

Njoftimi për lëshimin e urdhrit për ndalim vjen në ditën kur autoritetet në Republika Srpska po diskutojnë që entitetin në Bosnje Hercegovinë ta përcaktojnë si shtet të popullit serb, t’i japin të drejtën për vetëvendosje, të krijojnë ushtrinë e vet dhe të heqin Këshillin e Popujve, sipas një drafti të ri të Kushtetutës të Republikës Srpska, të cilin e ka parë RFE. Këto ndryshime bien ndesh me Kushtetutën e Bosnje e Hercegovinës.

Asambleja Kombëtare e Republikës Srpska po diskuton sot draft-kushtetutën e këtij entiteti, që paraqet edhe një lëvizje tjetër secesioniste nga autoritetet e këtij entiteti, pasi u miratuan ligje që ndalojnë funksionimin e institucioneve gjyqësore dhe hetuese të Bosnjës në territorin e Republikës Sërpska. Këto ligje hyn në fuqi javën e kaluar.

Në seancën e sotme, deputetët në Republikën Srpska po ashtu do të diskutojnë për krijimin e një gjykate speciale dhe zyre të prokurorisë për të mbrojtur rendin kushtetues./RFE/