Prokuroria e konfirmon, Bardhi: Kryetari i Bashkisë Vorë është arrestuar në Greqi!

Prokuroria ka konfirmuar akuzat e Partisë Demokratike se Kryetari i Bashkisë Vorë, Agim Kajmaku, është shtetasi Jorgo Toto, i arrestuar në Greqi për falsifikim parash. Këtë e ka bërë të ditur Sekretari i Përgjithshëm i PD, Gazment Bardhi, pasi mori përgjigjen nga Prokuroria, për përputhshmërinë e gjurmëve të gishtërinjve të Agim Kajmakut me Jorgo Toton.

“Më 20 gusht 2019 PD solli fakte se Kajmaku, i Vorës, ishte një person që ishte arrestuar në flagrancë, në kërkim ndërkombëtar në Greqi. Me ndihmën e Ramës, ai u përpoq të vazhdonte mashtrimin publik se në fakt Jorgo Toto ishte një person tjetër dhe jo ai. PD solli fakte të pakundërshtueshme se Jorgo Toto, i arrestuar në Greqi, ishte Agim Kajmaku, kandidati i Ramës për Bashkinë e Vorës. Sot denoncimi i PD është provuar zyrtarisht nga Prokuroria, e cila ka provuar si tërësisht të vërtetë denoncimin e kryer nga PD,” thekson Sekretari i Përgjithshëm i Partisë Demokratike duke saktësuar:

“Në vendimin e Prokurorisë, i mbërritur pak më parë në PD, rezulton se zyra qendrore kombëtare e Interpol Tirana, më 24.09.2019. ka sqaruar se nga informacioni i marrë nga Interpol Athinë rezulton se nga gjurmët e gishtërinj te shtetasit Agim Kajmaku me gjurmët që gjenden në Greqi, ka përputhshmëri të plotë,” thekson Sekretari i Përgjithshëm i Partisë Demokratike, Gazment Bardhi duke përfunduar:

“Prokuroria ka sqaruar se shtetasi Kajmaku, nga verifikimet e kryera, është provuar se Kajmaku dhe Tota është i njëjti person. Ky fakt konfirmohet nga të dhënat e TIM-s.”