Prokuroria: Hajdari u intervistua si e pandehur! Ministrja, dyshime nëse procesi është i ligjshëm!
Prokuroria Speciale e Kosovës tha sot se ministrja në detyrë e Industrisë, Ndërmarrësisë e Tregtisë, Rozeta Hajdari është thirrur për intervistim në cilësinë e të pandehurës, në kuadër të hetimeve për rastin “Rezervat shtetërore”, ndërsa ministrja Hajdari ngriti dyshime nëse procesi është i ligjshëm, duke pyetur se si Prokuroria Speciale ka hyrë në MINT për të marrë dokumente të klasifikuara si sekret të rezervave shtetërore.
“Prokuroria Speciale e Republikës së Kosovës ka thirrur znj. Rozeta Hajdari, që të paraqitet në prokurori për t’u deklaruar në cilësinë e të pandehurës, në kuadër të hetimeve për rastin “Rezervat shtetërore”. Znj.Hajdari është ftuar me qëllim të konstatimit të plotë dhe të drejtë të gjendjes faktike, për të gjitha dyshimet që janë pjesë e hetimit të këtij rasti penal.
Megjithatë, znj.Hajdari e ka shfrytëzuar të drejtën për t’u mbrojtur në heshtje, sikurse herën e parë kur ishte ftuar në prokurori për këtë çështje. Rasti është duke u trajtuar në përputhje me rregullat dhe standardet e përcaktuara në Kodin e Procedurës Penale,” tha zëdhënëse pranë Prokurorisë Speciale të Kosovës, Arbnora Luta.
Por, ministrja në detyrë Rozeta Hajdari duke ngrit dyshime se sa i ligjshëm është procesi tha se Prokuroria Speciale hyri në Ministrinë e Industrisë, Ndërmarrësisë e Tregtisë për të marrë dokumentet e klasifikuara, sipas saj, si sekret të rezervës shtetërore.
“Bëhet fjalë për kontraktimin e rezervës shtetërore të mallrave një proces shumë jetik, proces i ndjeshëm. Siç e dini Ministria Industrisë, Ndërmarrësisë e Tregtisë ka blerë rezervën shtetërore nuk kohën kur ishim të pambrojtur në shkurt e mars të vitit 2022, dhe për këtë proces jetik për të gjithë ne, unë tani pyetem nga Prokuroria Speciale.
Por një pyetje vjen, a është ky proces i ligjshëm dhe si Prokuroria Speciale hyri në Ministrinë Industrisë, Ndërmarrësisë e Tregtisë për të marr dokumentet e klasifikuara si sekret të rezervës shtetërore,” tha Rozeta Hajdari pasi doli nga Prokuroria Speciale e bindur se asnjë person nuk mund të ketë qasje në rezervën e klasifikuar sekret pa një procedurë të qartë ligjore sipas udhëzimeve të AKI-së e Agjencisë për Mbrojtjen e Informacionit të Klasifikuar.
“Ne si ministri e kemi klasifikuar lëndën sekret sipas Ligjit për Mbrojtjen e Informacionit të Klasifikuar, sipas Ligjit për Rezervën Shtetërore, por Prokuroria Speciale bëri një gabim ose një hap të pamenduar mirë, duke dërguar dy policë hetues pa certifikatën e sigurisë dhe duke marrë dokumentet brenda një ore në ministri.
Këtë e ka konstatuar edhe Inspektorati Policor në raportin informues se dy policët hetues shkuan në Ministrinë e Industrisë, Ndërmarrësisë e Tregtisë pa certifikatë sigurie të nivelit sekret,” tha Hajdari duke shtuar se ky raport nga IPK-ja u dërgua edhe në Prokurorinë Speciale për udhëzime të mëtejme, për veprim të mëtejme, sipas saj, ndaj këtyre dy policëve.
“Por, në realitet, vetë prokurori Valdet Gashi që po merret me këtë lëndë ka liruar nga përgjegjësia këta dy policë dhe vetë prokurori po shkelë ligjin. Dhe për më shumë mua më vjen keq, më vjen turp të them se për këtë proces asnjëherë nuk është raportuar drejt, pra për rezervën shtetërore të klasifikuara si sekret. Më vjen turp edhe për veprimet e prokurorit Valdet Gashi dhe për Prokurorinë Speciale për shkeljen e ligjit.”
Me këtë rast, ministrja në detyrë e Industrisë, Ndërmarrësisë e Tregtisë, Rozeta Hajdari ka treguar se si ministri kanë iniciuar hetim tek Agjencia për Parandalimin e Korrupsionit ndërsa përfundoi:
“Për të iniciuar një hetim dhe për të ardhur në konstatim të kësaj shkelje të këtij konflikti interesi, sepse e kemi dokumentuar me raportin e Inspektoratit Policor dhe me email, ku prokurori Valdet Gashi pranon konfliktin e interesit për të shqyrtuar këtë raport të IPK-së dhe për më keq Prokuroria Speciale, vetë i njëjti prokuror mbyllë rastin, mbyllë lëndën e raportit informues të IPK-së. Unë e di që pas këtij hetimi nga Agjencia për Parandalimin e Korrupsionit ne do të përballemi në gjykatë.”
