Prokuroria kërkon 12 vite burg për Saimir Tahirin

Prokuroria e Krimeve të Rënda ka kërkuar 12 vite burg për ish-ministrin e Brendshëm, Saimir Tahiri.

Kjo është pretenca që u lexua sot nga Prokuroria e Krimeve të Rënda për Saimir Tahirin, ku ishte i pranishëm Ish-Ministri i Brendshëm me avokatin e tij, Maks Haxhia.

Meqë në seancën e fundit, Gjykata e Krimeve të Rënda pranoi kërkesën e Ish-Ministrit Saimir Tahiri, për gjykim të shkurtuar, ai do të përfitojë ulje me 1/3 e dënimit, duke bërë që kërkesa e Prokurorisë të shndërrohet me 8 vite burg, si dhe hetimi të bëhet vetëm me provat e mbledhura deri në datën e pranimit të kërkesës.

Saimir Tahiri së bashku me Ish-Drejtorin Jaeld Cela, akuzohen për 3 vepra penale, atë të “Trafikut të lëndëve narkotike”, “Kryerjes së veprave penale nga organizata kriminale” dhe “Grup i strukturuar kriminal”.

Tre prokurorët e çështjes theksojnë se me provat dhe faktet e sjella në gjykim vërtetohet fajësia e dy ish zyrtarëve të lartë në trafikun e kanabisit. Ndërsa Saimit Tahiri ka mohuar akuzat duke e konsideruar një gjyq të montuar politikë.