Prokuroria kërkon urdhër nga Gjykata për paraqitjen e Albin Kurtit

Prokuroria Speciale e Kosovë ka dorëzuar në Gjykatën Themelore në Prishtinë kërkesën që Kryeministri, Albin Kurti, të paraqitet për të dhënë dëshmi si dëshmitar për dyshimet se ka pasur keqpërdorime të rezervave shtetërore.

Lajmin e ka konfirmuar zëdhënësja e Gjykatës Themelore në Prishtinë, Mirlinda Gashi, e cila ka bërë të ditur se kërkesa po shqyrtohet nga gjykata.

“Kërkesa nga Prokuroria Speciale është pranuar dhe aktualisht është në proces shqyrtimi nga gjykata,” tha Mirlinda Gashi.

Prokuroria Speciale e kishte ftuar Kryeministrin tre herë për intervistim, por nuk është paraqitur. Albin Kurti është shprehur se është i gatshëm të japë dëshminë, por ka kërkuar që prokurorët mund ta intervistojnë në zyrën e tij, një praktikë që sipas tij është ndjekur edhe më parë.