Prokuroria Speciale: Fatmir Sheholli u arrestua nën dyshimin për spiunazh

Prokuroria Speciale e Kosovës, ka bërë të ditur se pas zhvillimit hetimeve disa mujore, me urdhër të PSRK-së sot hetuesit policorë nga Drejtoria për Hetimin e Krimit të Organizuar dhe Krimeve të Rënda në Policinë e Kosovës kanë arrestuar Fatmir Sheholli, nën dyshimet për veprën penale “Spiunazh”.

I dyshuari Fatmir Sheholli është arrestuar në rajonin e Prishtinës, nën dyshimin e bazuar se ka kryer veprën penale “Spiunazh”, nga neni 124 paragrafi 3 të KPRK-së.

“Operacioni i arrestimit është kryer edhe me asistencë të Agjencisë së Kosovës për Inteligjencë. Me aktvendim të Prokurorisë Speciale, i dyshuari është ndaluar për 48 orë, dhe nga njësitet relevante të Policisë së Kosovës janë duke u kryer bastisje në vendbanimin e të dyshuarit, me qëllim të sigurimit edhe të provave të tjera materiale,” njofton Prokuroria Speciale e Kosovës.

Prokuroria Speciale e Kosovës, në bashkëpunim dhe koordnim me Policinë e Kosovës, është duke ndërmarrë të gjitha veprimet e nevojshme hetimore, në përputhje me Kodin e Procedurës Penale dhe ligjet në fuqi, për të cilat publiku do të njoftohet në kohë.

Ndryshe, i arrestuari Fatmir Sheholli që dyshohet se ka kryer veprën penale “Spiunazh’, dy vite më parë në një televizion privat në Kosovë, në një lidhje direkt kishte komunikuar direkt me terroristin Milan Radoiçiç i akuzuar për sulmin terrorist në Banjskë.