Prokurorja e Tiranës përballet me Vettingun, ja vlerësimet e KPK/ Vendimi merret …
Komisioni i Pavaruar i Kualifikimit ka nisur seancën dëgjimore ndaj Antoneta Bejko Sevdari, prokurore pranë Prokurorisë së Rrethit Gjyqësor Tiranë. KPK përbëhet nga Firdes Shuli, Roland Ilia dhe Valbona Sanxhaktari.
Sipas KPK, prokurorja ka qene e saktë në deklaratat e pasurisë. Bashkeshorti i saj ka qenë subjekt i hetimit dhe ka burime të ligjshme për pasurinë e tij. Gjithashtu DSIK ka dhënë një vlerësim pozitiv për prokuroren, duke e nxjerrë të përshatshme për detyrën.
“Në vleresimin për aftësitë profesionale, në vitin 2016 është regjistruar kallezim penal për shtetasin G.D. për refuzim të deklarimit të pasurisë. Prokurorja ka bere veprimet e duhura dhe ka kërkuar 4 muaj burgim. Gjykata e shkallës së parë ka vendosur pushimin e çështjes për të. Konstatohet se subjekti nuk e ka ankimuar brenda afatit vendimin e gjykatës. Ajo më pas ka kërkuar rivendosje në afat për çështjen në fjalë, pasi ka pritur zbardhjen e vendimit dhe gjykata ia ka rrëzuar kërkesën. Sipas gjykatës, dosja është dorezuar ne sekretari brenda afatit dhe prokurorja nuk e ka ankimuar në kohë vendimin”, u deklarua në seancë.
Vete prokurorja Antoneta Sevdari e ka quajtur të drejte vleresimin e KPK.
“Është i drejtë vlerësimi i KPK për mosankimimin e atij vendimi. Në atë periudhë më është dashur që të kujdesem për një familjar të sëmurë rëndë dhe ndaj e kam vonuar ankimimin. Gjykata ma refuzoi argumentin e forcës madhore. Praktika gjyqësore njeh faktorë të tjerë madhore për humbjen e afatit të ankimimit. Kërkoj rikonfirmimin në detyrë”, tha ajo.
Vendimi për prokuroren merret nesër në orën 09:30.
Sevdari e ka filluar karrierën si prokurore në Prokurorinë e Rrethit Gjyqësor Durrës në vitin 2002 dhe në vitin 2013 ajo është transferuar në Prokurorinë e Rrethit Gjyqësor Tiranë, ku ka qenë pjesë e task-force kundër krimit ekonomik dhe korrupsionit.
