Propagandë dhe akuza, Rama: Më mirë se ne për Korçën nuk gjejnë dot!
Kryeministri Edi Rama edhe në Korçë nuk solli ndonjë risi përveç propagandës dhe akuzave kundër Partisë Demokratike dhe Lulzim Bashës. “Më mirë se ne për Korçën nuk gjejnë dot” u mburrë Kryeministri por edhe sot pas 8 vitesh qeversje në mungesë të investimi kapital ose të huaj premtoi resort.
Dhe, sërish në Korçë bëri batuta me gjumin, dhe është e çuditshme se si një qeveri që nuk flen gjumë nuk punon asgjë.
“Programi ynë është vizioni ynë dhe kushdo që do ta konsultojë vizionin të shikojë Korçën. Programi ynë është karakteri ynë. Ne nuk iu ndahemi deri në fund gjërave që marrim përsipër. Programi ynë është puna. Ne punojmë pa pushim, ne besojmë tek puna dhe besojmë se përmes punës mund të transformojmë këtë vend. Nuk flemë gjumë, nuk hargalisemi ekraneve dhe pastaj të bëjmë si vizionarë kur vjen fushata dhe sa fiken kamerat flemë gjumë. Programi ynë është durimi dhe besimi dhe pastaj nëse duan të dinë se çfarë do të bëjmë te të gjithë sektorët kemi planin tonë të veprimit,” tha Edi Rama duke e pranuar se është vërtetë një fushatë e çuditshme:
“Mungon zhurma energjizuese, muzika përthithëse e mijëra njerëzve, por është një fushatë që na jep mundësinë të komunikojmë sikur jemi duke bërë një bisedë të shtruar dhe të kujdesemi që gjithçka që themi të jetë lehtësisht e dëgjueshme dhe e papërzier me zhurmën e entuziazmit dhe brohoritjeve që ndonjëherë ta bëjnë më të lehtë sepse nuk ka shumë vëmendje për fjalën, ndërkohë që kjo është një fushatë ku fjala ka më shumë vend dhe mundësia për të dëgjuar është më e madhe.
Përtej faktit që është kënaqësi të dëgjosh dhe fjalët e mira, dua të them që për hir të së vërtetës me këtë që ka ndodhur me transformimin urban, përtej marrjes së meritave dua ta them që Korça ka qenë një prej pionierëve të këtij transformimi. Rilindja urbane ka ardhur si rezultat i përpjekjeve të disa njerëzve, një ndër të cilët dhe Nikoja që këtu në Korçë, në pozicionin e kryetarit të bashkisë dhe në kushte komplet të tjera, dhe i rrethuar nga muret e shurdhët të qeverisë në Tiranë nisi një projekt që në këndvështrimin tim është projekti i parë i asaj që mori emrin më vonë rilindja urbane dhe u kthye në program. projektin e kalldrëmeve. Më kujtohet kur atëherë vija në Korçë dhe flisnim me Nikon pasi bënim shëtitjen në rrugicat që po merrnin formën e vjetër, diskutonim si mund të nxirreshin qytetet nga një errësirë, nga një izolim, nga një trishtim, për hir të së vërtetës përveç thesareve që kanë shumë qytete të Shqipërisë ishte e pamundur të bëje fotografi që mund t’i dërgoje, me të cilat mund të krenoheshe. Ishin lënë në një situatë shumë kritike. Me rilindjen urbane hapëm një rrugë e cila vazhdon,” tha Kryeministri Rama dhe në vazhdën e shumë kampioneve ai premtoi Shqipërinë si kampione të turizmit në Ballkan.
“Vizioni ynë është ta bëjmë Shqipërinë kampione të turizmit në Ballkan, kampione te agro-turizmit, kampione në eksportin e prodhimeve agro-bujqësore. Një proces që ka hyrë në rrugën e realizimit. Nëse sot flasim për disa investime të mëdha në turizëm, duke filluar nga investimi i madh në Durrës, ku do të investohet nga një kompanitë më të mëdha të botës për portin turistik. Nëse flasim për dy portet e reja kombëtare që do ndërtohen qoftë në Durrës, qoftë në Vlorë, për portin turistik të Shëngjinit, nëse flasim për 4 aeroportet, ku i Kukësit do të hapë dyert menjëherë, atë të Vlorës, do të nisë dhe ai i Sarandës”, tha Edi Rama dhe pas 8 vitesh qeverisje meqë nuk premtoi Aeroport, Korçën nuk e la pa gjë, nga mënga nxori një resort.
“Korça është zgjedhja e parë. Një resort i ri turistik në Korçë, si gur i parë në një tjetër themel të turizmit tonë do të sjellë shumë më tepër punë, reputacion për këtë qark dhe do të sjellë shtrirjen e infrastrukturës mikpritjes shumë përtej pikave ku është shtrirë sot”, tha ai.
Ndonëse shifrat tregojnë se Shqipëria është ndër vendet më pak të vaksinuara në Evropë, Edi Rama edhe sot e përsëriti se shumë vend po përpëliten, Shqipëria po bën vaksinimin masiv.
“Ne kemi pasur një mandat dhe një luftë. Një luftë e cila vazhdon dhe tani që po flasim. Mandati i dytë nuk ka qenë një mandat qeverisës mirëfilli, por një mandat i thyer në mes nga dy goditje shumë të rëndë. Dy fatkeqësi të mëdha që mund të kishin plandosur në tokë një elefant. Tërmeti katastrofik dhe pastaj pandemia që tronditi gjithë botën. Dy goditje që na vunë ne si vend dhe ne si qeveri në një sprovë të madhe karakteri, një sprovë të madhe qëndrueshmërie, kurajoje dhe aftësie për t’ia dalë mbanë. Kur ra tërmeti shumë pak besuan që mund t’ia dilnim mbanë.
Ne po ia dalim sot me vaksinimin masiv aty ku të tjerë akoma po përpëliten dhe mezi po bëjnë disa doza simbolike dhe po presin të hyjnë në vaksinimin masiv.
Shqipëria një nga dy vendet që ka filluar vaksinimin masiv dhe me ritmet që po ecim jemi në fashën e lartë të vaksinimit. Nuk ka qenë e lehtë sepse është dashur jashtëzakonisht shumë përpjekje, shumë këmbëngulje. Jashtëzakonisht shumë kombinimin e partneriteteve, bisedave për t’ia dalë që të kemi sasinë e nevojshme të vaksinave.”
Por Kryeministri Edi Rama edhe në Korçë bëri atë që bënë më së miri, sulmoi Partinë Demokratike dhe kryetarin e saj Lulzim Basha.
“Kjo nuk ka lidhje me fushatën elektorale në sensin që ne po mblidhemi pak dhe ata të tjerët shumë. ka lidhje me shëndetin e njerëzve dhe me të ardhmen e afërt të kësaj lufte. Vaksinimi masiv, arma që ka në dorë njerëzimi për të shporrur COVID-19. Por vaksinimi masiv duhet shoqëruar me distancimin. Të vaksinosh masivisht dhe të mos distancohesh do të thotë të ngatërrohesh me këmbët e tua,” tha Edi Rama duke vazhduar të flas si ekpsert i virologjisë dhe epidemiologjisë, gjë të cilën asnjë institucion kompetent që ai drejton:
“Të mbledhësh njerëz, t’i ngjeshësh me njeri-tjetrin për të krijuar imazhin sikur këtu ka një uragan dhe të infektosh masivisht njerëzit. Kosova kishte rënie drastike të numrave, u desh një fushatë elektorale, marshimet rrugëve dhe sot numrat janë rritur. Shikoni Malin e Zi, ishte një vend ku predikonin që COVID-i nuk e kishte prekur fare. U desh një fushatë elektorale dhe numrat sot janë rritur. Çfarë borxhi iu ka populli këtyre njerëzve që për të krijuar një iluzion optik në TV sikur janë shumë po e shpërndajnë virusin kudo ku shkojnë. Çfarë borxhi i kanë. Pse duhet Shqipëria të bëhet viktimë e këtij absurdi tragji-komik. Duke sfiduar rregullat dhe duke thënë se ne jemi mbi ligjin, mbi shtetin. Ne jemi PD, nuk pyesim për ligjin, për shtetin, gjë që ne e dimë, këtë gjë kanë bërë gjithmonë. Por në këtë rast nuk ka si pasojë djegien e ca godinave, djegien e pemës së vitit të ri, ka si pasojë jetën e njerëzve. Ka si pasojë jetën e një populli të tërë dhe insistojnë dhe bëjnë sikur këtu nuk ka asgjë tjetër përveç ankthit dhe frikës që e ka zënë Edi Ramën nga uragani, uragani i Noc Rrokut. Ankthi dhe frika ime sa herë i shoh ato pamje, është çfarë vjen mbrapa,” tha Kryeministri Edi Rama duke përfunduar ashtu si e nisi fushatën zgjedhore, me akuza:
“Një lidership që nuk e sheh çfarë vjen mbrapa nuk i duhet dreqit. Ne sigurisht nuk e zgjedhim dot opozitën sepse është realitet i jetës demokratike, nuk kanë minimumin e përgjegjësisë shoqërore, njerëzore.”
