Propozimi i BE/ Vuçiç i tha jo Pikës 4 , Stano nuk e komenton
Zëdhënësi i Bashkimit Evropian, Peter Stano, ka refuzuar t`i komentojë deklaratat e presidentit serb Aleksandar Vuçiç i cili një ditë pasi u pranua Propozimi evropian, deklaroi se nuk do ta respektojë Pikën 4 e cila parashikon që Serbia të mos e pengojë anëtarësimin e Kosovës në organizata të ndryshme ndërkombëtare.
“Nuk do të hyjmë në komentime të secilës deklaratë, apo secilit interpretim në rajon rreth asaj se për çfarë ishin pajtuar liderët. Kjo është shumë e qartë nga teksti,“ tha Peter Stano duke shtuar nga e hëna propozimi evropian u shndërrua në marrëveshje bazë për rrugën drejt normalizimit të raporteve në mes të Kosovës e Serbisë.
I pyetur lidhur me mosgatishmërisë e palës serbe që ta firmos marrëveshjen, ashtu siç kishe pohuar kryeministri kosovar, Stano sërish bëri avokatin e Vuçiçit:
“Nuk ishte planifikuar firmosja por diskutimet për propozimin për të cilin u pajtuan të dyja palët se nuk ka më nevojë për diskutime shtesë rreth këtij Propozimi evropian.”
Me këtë rast ai konfirmoi gjithashtu se do vazhdojnë angazhimet për planin e implementimit të kësaj marrëveshjeje në mënyrë që të sigurohen hapat konkret në rrugën drejt normalizimit të raporteve.
Ndërkohë, Përfaqësuesi i Posaçëm i Bashkimit Evropian për Dialogun Kosovë-Serbi, Miroslav Lajçak, ka paralajmëruar se takimi i radhës i liderëve do mbahet gjatë muajit mars në Ohër të Maqedonisë së Veriut.
Had an excellent meeting with DPM Marichikj. I am grateful to ?? for its strong support to the Dialogue and am looking forward to the next Dialogue meeting in Ohrid later this month. We also discussed issues of essence to North Macedonia’s ?? future. pic.twitter.com/zqxumS28Tw
— Miroslav Lajčák (@MiroslavLajcak) March 2, 2023
Burimet e BE-së kanë konfirmuar se ky takim do mbahet më 18 mars. Ndërsa Lajçak pritet që para këtij takimi të vizitoj sërish Prishtinën si dhe Beogradin për t’i bërë përgatitjet lidhur me mbajtjen e takimit të radhës.
Ndryshe, pasi u cilësua si tradhëtar kur dhe zyrtarët evropianë e bënë të ditur se Presidenti i Serbisë, Aleksandar Vuçiç e kishte pranuar Propozimin e BE i cili u bë edhe publik nga vetë Bashkimi Evropian, Vuçiç duke hedhur poshtë Propozimin hodhi poshtë dhe deklaratat e dy zyrtarëve të lartë, Borrell dhe Lajçak, se propozimi as nuk diskutohet dhe as nuk do të pësoj ndryshime, ndërsa iu drejtua kombit serb duke shtuar se ai i kishte kthyer përgjigje përfaqësuesve ndërkombëtar.
“Serbia është e gatshme të punoj në zbatimin e shumë gjërave nga Plani, por kemi një vërejtje të madhe që e kemi thënë. Këtë ia kam thënë edhe Macronit dhe Scholzit në Munchen, dhe gjithë liderëve të mëdhenjë. Fjala është se nuk mund të flitet për pranimin e ndërsjellë dhe anëtarësimin e Kosovës në OKB.”
