Protesta, artistët: Teatri nuk vdes! Basha: Ky është fillimi i fundit të tiranisë!

Për mbi 2 orë e gjysmë, artistë, shoqëria civile dhe përfaqësues të opozitës, kanë protestuar pranë Teatrit Kombëtar prej të cilit kanë ngelur vetëm rrënoja. Nga tribuna ku sot nuk foli politika por vetëm artistët, mesazhet dhe akuzat kryesisht ishin në adresë të qeverisë, policisë dhe Edi Ramës, për aktin makabër dhe dhunën e ushtruar ndaj përfaqësuesve të Aleancës për Mbrojtjen e Teatrit dhe mbështetësve të tyre.

Protesta nisi me këngët e grupit “Troja”, për të vijuar me himnin e krijuar enkas për mbrojtjen e Teatrit Kombëtar dhe u përmbyll me mesazhin:

Teatri nuk vdes!

Me përfundimin e protestës, meqë nesër është Nata e Kadrit, Aleanca për Mbrojtjen e Teatrit bëri të ditur se protesta e radhës do të mbahet të mërkurën në orën 17:30.

Pas këtij vendimi, Kryetari i Partisë Demokratike, Lulzim Basha, e bëri të qartë se Opozita e Bashkuar do të mbështesë të gjitha protestat e Aleancës për Teatrin, kudo që ato të zhvillohen.

Me këtë rast, Lulzim Basha e bëri të qartë se shkatërrimi i Teatrit nuk është fundi i kulturës dhe guximit të shqiptarëve, por fillimi i fundit të tiranisë që Rama ka luajtur me qytetarët e Shqipërisë.

Zyrtarisht protestën e hapi regjisori Robert Budina me emocion të rrallë duke folur mbi rrënojat e Teatrit Kombëtar të cilin e mbrojti me shpirt për dy vjet, tha se sot ai bashkë me pjesëmarrës të tjerë të Aleancës për Mbrojtjen e Teatrit, nuk ishin aty si përfaqësues të asnjë partie, por si qytetarë në mbrojtje të kulturës.

Dhuna e djeshme e ushtruar ndaj artistëve dhe shembja e godinës gjatë kohës kur brenda ishin aktorët, tha Budina, ishte një tentativë për vrasje. Dhe, për këtë tentativë vrasje, Robert Budina i bëri thirrje SPAK që të hetojë. Mes mesazheve të forta,

Aktorja Suela Bako tha se ka dalë sot në protestë kundër dhunës së ushtruar ndaj institucionit ku ka punuar kaq shumë kohë.

“Unë jam sot këtu për dhunën e ushtruar ndaj kolegëve të mi dhe dhunën ndaj atij institucioni ku unë kam punuar. Jam këtu për të ngritur zërin për shkeljen e të drejtave të mia, bashkësortit tim, fëmijëve të mi. Jam këtu për t’i thënë STOP politikës që po shkakton një dramë tek artistët, duke i vënë përballë njëri tjetrit,” tha aktorja Suela Bako.

Aktori Neritan Licaj, në fjalën e tij tha se Edi Rama dhe Erion Veliaj kërkojnë që të vrasin shpresën, por shpresa nuk vritet.

“Në atë skenë krimi aty janë dy kufoma politike Rama dhe Veliaj. Nuk më vjen keq për ata dy kufoma politike, por për të gjithë ne. Thërras të gjithë shqiptarët, gjithcka që ka mbetur e mirë nga Shqipëria, si bijtë e shqipeve që jemi të fluturojmë lart dhe të vrasim këta gjarpërinj.”

Aktori Mehdi Malkaj teksa ngjitej në podium tha me ironi se protestuesit ishin futur në territorin e bashkisë ndërsa përçoi mesazhe të forta kundër vendimit për shembjen e Teatrit Kombëtar.

Në mbështetje të artistëve sot doli edhe analisti Fatos Lubonja i cili në faljen e tij theksoi se godina u shemb nga një bandë kriminale e drejtuar nga Edi Rama.

Kryetari i Bashkisë, Erion Veliaj, tha Lubonja, duhet të japë dorëheqje, ndërsa shtoi se duhen protesta të vazhdueshme derisa përgjegjësit të dalin para gjyqit e të mbajnë përgjegjësi.

Emocione të veçanta solli aktorja e njohur e Teatrit Eksperimental, Adriana Tolka, me “Himnin e Teatrit” i cili teksa këndohej u shoqërua nga protestusit me duartrokitje.

Regjisori i njohur dhe njëri nga protagonistët kryesor të Aleancës për Mbrojtjen e Teatrit , Edmond Budina ftoi protestuesit për një minutë heshtje, jo në shenjë zie por në shenjë reflektimi.

“Një minutë heshtje për të reflektuar dhe më pas thërrisni Rroftë Teatri, Rroftë Demokracia, Rroftë Shqipëria,” tha Edmond Budina duke i kërkuar protestuesve dhe qytetarëve të ngrihen për demokracinë, dhe në fund nga bulevardi kumboi mesazhi i qartë:

E duam Shqipërinë si gjithë Europa!

Basha: Shkatërrimi i Teatrit, fillimi i fundit të tiranisë

Në fund të protestës, Kryetari i Partisë Demokratike, Lulzim Basha, konfirmoi edhe një herë mbështetjen për Aleancën për Mbrojtjen e Teatrit ndërsa u shprehë qartë se shpresa e Edi Ramës që me dhunë do të shuajë zërat e njerëzve të lirë e dëshirën e shqiptarëve për ndryshim ka marrë fund.

“Opozita, Partia Demokratike do të mbështesë të gjitha protestat e Aleancës për Teatrin, këtu në Tiranë dhe në krah të qytetarëve. Kudo që do të ketë protesta Partia Demokratike dhe opozita do të jetë në krah të tyre. Siç e patë sot, siç e pa e gjithë Shqipëria, shpresa e Edi Ramës që përmes frikës, terrorit dhe barbarisë do të shuante energjinë dhe dëshirën e shqiptarëve për ndryshim , mori fund. Shkatërrimi i Teatrit nuk është fundi i Teatrit, i kulturës, i artit, i guximit dhe i lirive të shqiptarëve, por është fillimi i fundit të tiranisë dhe të teatrit që Edi Rama ka luajtur tash shtatë vjet me shqiptarët, me jetët e tyre, me ekonominë e tyre, me varfërinë, me papunësinë, me lirinë, me institucionet, me kushtetutën e vendit. Ky fund do të jetë i shpejtë dhe do të jetë çlirimtar për shumicën dërmuese të shqiptarëve. Ripërsëris edhe njëherë vendosmërinë time dhe të Partisë Demokratike, të opozitës së bashkuar, për t’i qëndruar kontratës së firmosur me Aleancën për Mbrojtjen e Teatrit për rindërtimin e Teatrit në vendin ku ishte sipas të gjitha përcaktimeve, siç ishte nga jashtë dhe të modernizuar nga brenda dhe për dërgimin para drejtësisë dhe prapa hekurave të gjithsecilit prej personave të përfshirë në këtë krim, nga Edi Rama dhe Erjon Veliaj deri tek punonjësit të cilët shkelën ligjin natën e barbarisë, por që sot tregoi se nisi një ditë e re shprese, një ditë e re besimi të shqiptarëve te njëri-tjetri, tek Shqipëria, te demokracia dhe tek e nesërmja që nuk mund ta ndalë nata e errët e 17 majit,” tha Lulzim Basha ndërkohë ishte i prerë kur u pyet nëse do të lejoj ndërtimin e Teatrit të ri kur të fillojnë punimet:

“Nuk do të kenë kohë të vjedhin 30 milion euro të shqiptarëve. Nuk do të kenë kohë. Koha e tyre po mbaron dhe shqiptarët do të bashkohen që ato lekë t’ua kthejnë njerëzve që kanë më shumë nevojë, t’ua kthejnë të papunëve, t’ia kthejnë ekonomisë. Nuk do të ketë tjetër aferë 30 milionë euro zhvatje të parave të shqiptarëve për një apo dy oligarkë dhe xhepat e Edi Ramës dhe Erjon Velisë. Bashkë me betejën për demokraci do të fitojmë edhe betejën për t’i rikthyer Shqipërisë dhe shqiptarëve taksat e tyre dhe ekonominë e tyre.”

Në fund, kryetari i PD, Lulzim Basha, sqaroi dhe hapat e radhës të Opozitës së Bashkuar:

“PD do të mbështesë të gjitha protestat e Aleancës për Teatrin, këtu në Tiranë dhe kudo për të qenë në krah të qytetarëve, te protestat. Partia Demokratike do të jetë do jetë në krah të artistëve. Sic e patë sot, shpresa e Edi Ramës se me dhunë do të shuajë zërat e njerëzve të lirë e dëshirën e shqiptarëve për ndryshim ka marrë fund.

Shkatërrimi i Teatrit nuk është fundi i kulturës dhe guximit të shqiptarëve, por fillimi i fundit të tiranisë që Rama ka luajtur me qytetarët e Shqipërisë. Ne jemi të vendosur që bashkë me Aleancën e Teatrit për të rindërtuar TK dhe për të dërguar në burg të gjithë ata që morën pjesë në këtë akt makabër. Sot nisi një ditë e re shprese.”