Protesta e 10 Shkurtit, Kurti: Moni dhe Arbeni, dëshmorë të vullnetit të popullit për liri!

Kryetari i Lëvizjes Vetëvendosje, Albin Kurti sot ka bërë homazhe tek varri i Mon Balajt dhe Arben Xheladinit në 14 vjetorin e protestës së përgjakshme të 10 shkurtit, ku u vranë dy aktivistët.

Kurti i shoqëruar nga bashkëshortja e tij, anëtarët e partisë, aktivistë e familjarë të Xheladinit fillimisht bënë homazhe në Podujevë tek varri i Mon Balajt, e më pas tek varri i Arben Xheladinit në Prishtinë.

Me këtë rast lideri i Vetëvendosjes, Albin Kurti, tha se Moni dhe Arbeni janë dëshmorë të vullnetit të popullit për liri.

“Pas homazheve në Besianë tek Moni, ne erdhëm këtu tek varri i Arbenit që po ashtu të bëjmë homazhe dhe të vendosim lule të freskëta. Arbeni dhe Moni janë dëshmorë të vullnetit të popullit për liri, i cili është i pandalshëm pavarësisht pengesave dhe vështirësive,” tha Albin Kurti duke përfunduar:

“Besnikëria e Vetëvendosjes ndaj asaj demonstrate dhe këtyre dëshmorëve është thellë në organizatën tonë, në mendjen dhe zemrën e secilit aktivist.”

14 vjet nga protesta e 10 Shkurtit

Dy aktivistët e Lëvizjes Vetëvendosje, Arben Xheladini dhe Mon Balaj, derisa protestonin kundër negociatave të Kosovës me Serbinë dhe Pakos së Ahtisaarit, u vranë më 10 shkurt nga Policia rumune e UNMIK-ut, 14 vjet më parë.

Derisa mijëra protestues kundërshtonin pakon e Ahtisaarit, protesta eskaloi në momentin që u hoqën rrethojat e vendosura në mes të sheshit. Ishte policia e rumune e UNMIK-ut, ajo që reagoi në mënyrë të dhunshme me ç’rast janë përdorur edhe armë vdekjeprurëse.

Përveç vrasjes së dy aktivistëve, kishte edhe shumë të plagosur. Ndërkohë, lotsjellësi që është përdorur nuk ishte parë asnjëherë më herët, por as deri më sot. Madje, erërat e lotsjellësit nuk u hoqën pesë ditë nëpër sheshet e Prishtinës.

KMDLNj ka kërkuar drejtësi për viktimat e 10 shkurtit, si dhe ka kërkuar që viktimat e Arben Xheladini dhe Mon Balaj të pranohen si viktima politike, të rehabilitohen dhe ta fitojnë statusin e merituar, ndërsa, familjet e tyre të fitojnë të drejtën që e gëzojnë familjet e viktimave civile të luftës.

KMDLNj ka reaguar edhe për të plagosurit e kësaj proteste, duke thënë se duhet të kompensohen moralisht dhe materialisht, në përputhje me ligjin.