Protesta e 11 korrikut, Kryetari i Grupimit Dhjetor ’90: Ne duhet ta marrim sërish në dorë fatin e vendit!

Në emër të studentëve të Dhjetorit ’90, sot Kryetari i Grupimit Dhjetor ’90, Ajet Ramçaj, i ka bërë thirrje të gjithë studentëve që besuan atëherë dhe besojnë tani, te një Shqipëri më e mirë, të marrin pjesë në protestën e opozitës së bashkuar më 11 korrik.

“Sot, pas 34 vitesh, studentët e Dhjetorit ’90, por edhe ata të të gjithë dhjetorëve pas tij, që kanë mbetur këtu apo kanë ikur jashtë, po bëhen dëshmitarë të instalimit të një regjimi të dytë autoritar: thelbi është enverist, ndërsa mbulesa demokratike,” shprehet Ajet Ramçaj edhe sot kur kohët kanë ndryshuar:

“Parulla jonë atëherë ishte: E duam Shqipërinë si gjithë Europa. Kohët kanë ndryshuar dhe ne duhet ta marrim sërish në dorë fatin e vendit: Ta bëjmë Shqipërinë si gjithë Europa”, thekson Kryetari i Grupimit Dhjetor ’90, Ajet Ramçaj, duke përfunduar me thirrjen:

“Më 11 korrik ora 20:00, të gjithë në shesh! O sot o kurrë!”

Deklaratë:

Ne, studentët e Dhjetorit 1990, u ngritëm në revoltë ndaj regjimit më të egër komunist në Europën Lindore.

Ishim shumë pak, rreth 20 mijë persona, as 1% e popullsisë së asaj kohe, kundër regjimit diktatorial të Enver Hoxhës.

Në grevën e Urisë së 18-20 shkurtit të vitit 1991 ishim rreth 720 vetë.

Sot kohët kanë ndryshuar.

Jetojmë në një demokraci fiktive, krejt e kundërta e asaj për të cilën u ngritëm para 34 vjetësh.

Mbi 1 milion shqiptarë kanë braktisur vendin, në eksodin më të madh të kësaj toke, që nga rënia e Krujës dhe vdekja e heroit kombëtar Gjergj Kastrioti- Skënderbeu.

Sot, pas 34 vitesh, studentët e Dhjetorit ’90, por edhe ata të të gjithë dhjetorëve pas tij, që kanë mbetur këtu apo kanë ikur jashtë, po bëhen dëshmitarë të instalimit të një regjimi të dytë autoritar: thelbi është enverist, ndërsa mbulesa demokratike.

Sot, në emër të studentëve të Dhjetorit ’90, ju bëj thirrje të gjithë studentëve, të gjithë qëndrestarëve, të gjithë atyre që besuan atëherë, e besojnë tani, te një Shqipëri më e mirë, merrni pjesë në protestën e opozitës së bashkuar më 11 korrik, ora 20:00.

Parulla jonë atëherë ishte: E duam Shqipërinë si gjithë Europa. Kohët kanë ndryshuar dhe ne duhet ta marrim sërish në dorë fatin e vendit: Ta bëjmë Shqipërinë si gjithë Europa!

Më 11 korrik ora 20:00, të gjithë në shesh!

O sot o kurrë!