Protesta e 11 Majit/ Gjykata: 20 protestues në burg! Ja vendimi për 50 protestues…

Gjykata e Tiranës ka dhënë sot masën e sigurisë për 50 protestues.

Kështu,  me masën “arrest me burg” u dënuan 20 protestues, 11 protestuesve iu dha masa “arrest shtëpie” dhe për 19 të tjerë masa e sigurisë “detyrim paraqitjeje”.

Pasi vendimit të Gjykatës, ku 20 protestues u lanë në burg, Kryetari i Grupit Parlamentar të PD, Edmond Spaho, tha se ata janë të burgosur politik të regjimit të Edi Ramës.

Edmond Spaho tha se vendimi i sotëm pritej për sa kohë që gjyqtar është i ati i nënkryetarit të FRESH-it por i siguroi se gjyqtarët dhe prokurorët që dhanë vendimet do të japin nesër llogari kur Partia Demokratike do të jetë në pushtet:

“Damian Gjiknuri, hajduti i zgjedhjeve dhe që çoi për rrush e kumbulla 40 milion euro të buxhetit publik, ngarkohet të kryej reformën zgjedhore, kurse këta që protestojnë për të drejtat e liritë, futen në burg. Vendimi i sotëm pritej për sa kohë që gjyqtar është nipi i Shefqet Peçit dhe i ati i nënkryetarit të FRESH-it. Po e ndjekim me vëmendje dhe po i mbajmë shënim të gjitha rastet që po shkelin ligjin dhe do japin llogari në pushtetin e ardhshëm të PD-së.”  

Ndërsa për të burgosurit politikë, Kryetari i Grupit Parlamentar të PD, Edmond Spaho garantoi se do të dëmshpërblehen:

“Gjyqtarët dhe prokurorët janë vënë në shërbim të Edi Ramës. Ata janë bijtë e pinjollëve komunistë dhe do të japin llogari, kur nesër PD të jetë në pushtet. Këta të burgosur do të cilësohen si persona të burgosur politik e do dëmshpërblehen. Fundi i Ramës do të jetë i paevitueshëm. Në protestën e radhës do të na ketë më shumë kundër tij.”