Protesta e 28 Shkurtit, Berisha: Kryengritja kalon në fazën e diversifikimit të aksioneve!

Opozita do të vijojë me kryengritje paqësore, tha sot Kryetari i Partisë Demokratike, Sali Berisha, duke paralajmëruar se protesta e radhës në 28 Shkurt do të hyjë në një fazë të re me forma të diversifikuara veprimi.

Ndërsa akuzoi Kryeministrin Edi Rama dhe Zv/Kryeministren Belinda Balluku për korrupsion dhe abuzime me pushtetin, Kryetari i Partisë Demokratike, tha se largimi i tyre nga qeverisja është objektivi kryesor i protestave të opozitës.

“Ka një vendosmëri të papërmbajtur për t’i shkuar gjer në fund këtij misioni. Siç e dini, kryengritja paqësore e 20 shkurtit paraqiti para çdo shqiptari dyshen Rama-Balluku më të nxirë se kurrë ndonjëherë. Por kjo nuk ndodhi vetëm para shqiptarëve,” tha Sali Berisha duke folur për pasqyrim të rrufeshëm të kësaj kryengritje në mediat më të mëdha të botës, nga Zelanda e Re në Alaskë, nga Poli i Veriut në Polin e Jugut, në të katër anët e globit.

“Ka pasur një mirëkuptim të plotë dhe total nga mbarë shqiptarët dhe mbarë njerëzimi për kryengritjen paqësore të opozitës shqiptare më 20 shkurt. Ka një vendosmëri të papërmbajtur për t’i shkuar gjer në fund këtij misioni me rëndësi të jashtëzakonshme për fatin e Shqipërisë dhe shqiptarëve. Largimin e këtij binomi famëzi nga qeverisja.

Ndërkohë e dini, e shtuna është dita e kryengritjes paqësore. Qytetarët mezi e presin për të shprehur zemërimin, revoltën e tyre, urrejtjen e tyre ndaj hajdutëve,” tha Kryetari i Partisë Demokratike, Sali Berisha, për Protestën e 28 shkurtit duke theksuar se kjo do të jetë një revoltë jo e llojit të atyre që janë mësuar të shohin shqiptarët ndërsa përfundoi:

“Tani, kryengritja kalon në fazën e diversifikimit të aksioneve dhe veprimtarive të saj. Për të gjitha do informoheni në përputhje me vendimet që do merren.

Por e shtuna është dita e triumfit të opozitës, e triumfit të shqiptarëve mbi hajdutët.”

Fjala e plotë:

Mirëdita!

Së pari, Isa edhe 120 vite.

Ky është urimi tradicional.

Një jetë plot shëndet, suksese me më të mirat me njerëzit tuaj.

Ka një vendosmëri të papërmbajtur për t’i shkuar gjer në fund këtij misioni.

Siç e dini, kryengritja paqësore e 20 shkurtit paraqiti para çdo shqiptari dyshen Rama-Balluku më të nxirë se kurrë ndonjëherë.

Por kjo nuk ndodhi vetëm para shqiptarëve.

I rrufeshëm ka qenë pasqyrimi i kësaj ngritje në mediat më të mëdha të botës.

Nga Zelanda e Re në Alaskë, nga Poli i Veriut në Polin e Jugut, në të katër anët e globit, pas Ajatollahëve të Teheranit, figurat më të nxira në mediat botërore kanë qenë Edi Rama dhe Lubi Balluku.

Kjo është e vërteta.

Ka pasur një mirëkuptim të plotë dhe total nga mbarë shqiptarët dhe mbarë njerëzimi për kryengritjen paqësore të opozitës shqiptare më 20 shkurt.

Ka një vendosmëri të papërmbajtur për t’i shkuar gjer në fund këtij misioni me rëndësi të jashtëzakonshme për fatin e Shqipërisë dhe shqiptarëve.

Largimin e këtij binomi famëzi nga qeverisja.

Ju jeni dëshmitarë se si Edi Rama ka bërë ditë të tëra negociata sekrete të fshehtë për lëkurën e tij dhe të bashkëshortes së tij në shkëmbim të Lubisë.

Por në qoftë se një marrëveshje e tillë arrihet, ky do ishte kapitullimi përfundimtar i drejtësisë.

Kjo do të ishte marrëveshja e asgjësimit përfundimtar të institucionit të akuzës.

Unë jam i vetëdijshëm që Lubi Balluku ka shkelur ligjin dhe ka vjedhur, por gjithçka ka bërë, e ka bërë me urdhër të Edi Ramës dhe si aksionere në minorancë me Edi Ramën.

Se ti kujtove se thashë minorene, të shkon mendja tek Epstein direkt, se ajo e Ergys Agasit është një lloj Epsteini shqiptar.

Pra, gjithçka është bërë për lëkurën e tij, për familjen e tij.

Sot në parlament zhvillohet seanca e shtyrë 3 muaj, shtytje me të cilën Lubisë iu dha mundësi të shkatërrojë mijëra e mijëra dokumente, të intimidojë, të kërcënojë me dhjetëra dëshmitarë.

Ajo, aty nuk është.

Komshia thotë prej katër ditësh nuk e kam parë të hyjë në shtëpinë e saj.

Tjetër, nuk mund të them.

Një gjë i them, edhe prapa diellit të shkosh, do të gjejmë dhe do të sjellim në Shqipëri.

Prandaj, mos tento të largohesh nga Shqipëria. Asaj dhe çdo njeriu tjetër.

Ndërkohë e dini, e shtuna është dita e kryengritjes paqësore.

Qytetarët mezi e presin për të shprehur zemërimin, revoltën e tyre, urrejtjen e tyre ndaj hajdutëve.

Dhe, do të jetë një revoltë, një kryengritje do të thosha më e fuqishmja që ka njohur vendi.

Nuk do jetë e llojit të atyre që keni parë.

Tani, kryengritja kalon në fazën e diversifikimit të aksioneve dhe veprimtarive të saj.

Për të gjitha do informoheni në përputhje me vendimet që do merren.

Por e shtuna është dita e triumfit të opozitës, e triumfit të shqiptarëve mbi hajdutët.